ភ្នំពេញ៖ ភ្ញៀវទេសចរជាតិ និងអន្តរជាតិ បាននិងកំពុងដើរកម្សាន្តនៅកម្ពុជា កើន​ឡើង​ជា​បន្ត​បន្ទាប់​នោះ ឧត្តមសេនីយ៍ឯក កឹន ឃន អគ្គស្នងការរងនគរបាលជាតិ ជំរុញ​កម្លាំង​នគរបាល​ប្រចាំ​នៅ​តាម​ព្រំដែនទឹក ត្រូវពង្រឹងការការពារសន្តិសុខ សណ្ដាប់ធ្នាប់ជូនភ្ញៀវទេសចរ ដើម្បីឲ្យ​ពួក​គេដើ​រ​លេង​មានភាពកក់ក្ដៅ ។

ក្នុងពិធីប្រកាសផ្ទេរភារកិច្ច តែងតាំងមុខតំណែង និង​បំពាក់​ឋានន្តរសក្កិ​ជូន​ដល់​មន្ត្រី​នគរបាល​ជាតិ នៃនាយកដ្ឋាននគរបាលការពារព្រំដែនទឹក នៅថ្ងៃទី១៧ ខែមករា ឆ្នាំ២០២៣ ឧត្តម​សេនីយ៍​ឯក កឹន ឃន មានប្រសាសន៍ថា កម្លាំងកាពារនគរបាលការពារព្រំដែនទឹក ត្រូវគោរពវិន័យ ត្រូវ​អនុវត្ត​តាម​ការចាត់ទុកនានា របស់ថ្នាក់ដឹកនាំអង្គភាព ដើម្បីទប់ស្កាត់នូវបទល្មើសផ្សេងៗ ដែល​ជា​ការ​ផ្ដល់ទំនុកចិត្តពីរាជរដ្ឋាភិបាល ក្រសួងមហាផ្ទៃ និងអគ្គស្នងការនគរបាលជាតិ ។

លោកឧត្តមសេនីយ៍ឯក បានបន្តថា ក្រៅពីការងារទប់ស្កាត់បង្ក្រាបបទល្មើស ដែនទឹក កម្លាំង​នគរបាល​ទាំងអស់ ត្រូវចូលរួមការពារសុខសុវត្ថិភាពជូនប្រជាពលរដ្ឋ ដើម្បីធ្វើឲ្យ​ភូមិ​ឃុំ​មាន​សុវត្ថិភាព ក៏ដូចជាការពារភ្ញៀវជាតិ និងអន្តរជាតិ ដើរកម្សាន្តតាមតំបន់សមុទ្រ តំបន់ឆ្នេរ កោះ​ជា​ដើម។

ជាមួយនេះ ឧត្តមសេនីយ៍ឯក កឹន ឃន បានជំរុញបន្ថែម ដល់កម្លាំងការពារដែនទឹក ត្រូវ​បន្ត​សហការ​ជា​មួយឆ្មាំដែនទឹករបស់ប្រទេសជិតខាង លើការងារទប់ស្កាត់បទល្មើសផ្សេងៗ ក៏​ដូច​ជា​ការ​ផ្លាស់​ប្តូរ​នូវបទពិសោធន៍ដល់គ្នាទៅវិញទៅមក ។

បើតាមឧត្តមសេនីយ៍ឯក ទូច ពលៈ ប្រធាននាយករដ្ឋានការពារព្រំដែនទឹក បានលើកឡើងថា ក្នុង​ឆ្នាំ​កន្លងមក ការងារការពារដែនទឹក ទទួលបានលទ្ធផលល្អប្រសើរ រួមទាំង​បាន​សហការ​យ៉ាង​ល្អ​ជា​មួយ សមត្ថកិច្ចនៃប្រទេសជិតខាង លើការពារសន្តិសុខ សណ្ដាប់ធ្នាប់ជូនប្រទេសជាតិ និង​ប្រជាពលរដ្ឋ ។

គួរបញ្ជាក់ថា ចាប់តាំងពីកម្ពុជា បើកដំណើរការទេសគ្រប់សភាពទាំងអស់ភ្ញៀវទេសចរ អន្តរជាតិ បាន​ចាប់​ផ្ដើមើលលេងកម្សាន្តនៅប្រទេសកម្ពុជាជាហូរហែររាល់ថ្ងៃ ក្នុង​នោះ​ក៏​មាន​នាវា​ដឹក​ភ្ញៀវ​ទេសចរ​ចម្រុះជាតិសាសន៍ជាច្រើនរយនាក់ ចូលចត់នៅកំពង់ផែ និងដើរលេង​កម្សាន្ត​នៅ​ខេត្ត​ព្រះសីហនុ ជាបន្តបន្ទាប់ផងដែរ ៕ អត្ថបទ បាន សុខរិទ្ធិ