កណ្ដាល៖ អាជ្ញាធរ និងក្រុមការងារចុះជួយមូលដ្ឋានឃុំកំពង់ស្វាយ ស្រុកកៀនស្វាយ ខេត្ត កណ្ដាល បានរៀបចំពិធីលើកទឹកចិត្តដល់បេក្ខជន ដែលបានប្រឡងមធ្យមសិក្សាទុតិយភូមិ (បាក់ឌុប) ឆ្នាំសិក្សា២០២១-២០២២ ហើយបានជំរុញដល់ពួកគេ ត្រូវធ្វើយ៉ាង ណា​ធ្វើ​ខ្លួន​ឲ្យ​ក្លាយ​​ជាទំពាំងស្នងឫស្សីដ៏ល្អ សម្រាប់ប្រទេសជាតិ ។

 នៅក្នុងពិធីអបអរសាទរខួបអនុស្សាវរីយ៍ លើកទី៤៤ នៃទិវាជ័យជំនះ៧មករា និង​សំណេះ​សំណាល​បេក្ខជនប្រឡងបាក់ឌុប លោក ស្រេង សំណាង អនុប្រធានទី១ ក្រុម​ការងារ​ចុះ​ជួយ​ឃុំ​កំពង់ស្វាយ តំណាងឯកឧត្តម នួន ច័ន្ធរិទ្ធ ប្រធានក្រុមការងារ បានលើកនូវគុណតម្លៃថ្ងៃ៧មករា បាន​រំដោះប្រជាជនចេញពីរបបអាវខ្មៅ ប៉ុល ពត ហើយថ្នាក់ដឹកនាំរបស់យើង បានមាន​ឱកាស​អភិវឌ្ឍ​ប្រទេសជាតិឲ្យមានការរីកចម្រើនលើគ្រប់វិស័យ ។

លោកបានបន្តថា កម្ពុជាក្រោមដឹកនាំរបស់សម្ដេចតេជោ ហ៊ុន សែន ជានាយករដ្ឋមន្ត្រី បាន​យក​ចិត្ត​ខ្លាំង​ណាស់ ក្នុងវិស័យអប់រំ មានទាំងការសាងសង់សាលារៀនជាបន្តបន្ទាប់ ក៏ដូច​ជា​បាន​បង្កើន​នូវ​ប្រាក់បៀវត្សន៍ជូនលោកគ្រូអ្នកគ្រូ ការផ្ដល់អាហារូបករណ៍ ដល់សិស្សពូកែ សិស្សក្រីក្រ បានសិក្សា​ទាំងក្នុងស្រុក និងក្រៅស្រុក។

ជាមួយនេះ លោក ស្រេង សំណាង បានជំរុញបន្ថែមដល់សិស្សានុសិស្សទាំងអស់ ត្រូវ​បន្ត​ខិតខំ​រៀន​សូត្រ ដើម្បីឆ្លើយតបនឹងការយកចិត្តទុករបស់រាជរដ្ឋាភិបាល លើការ​បណ្ដុះ​នូវ​ធន​ធាន​មនុស្ស​នេះ ក្នុងការយកចំណេះដឹងជួយខ្លួនឯង និងចូលរួមអភិវឌ្ឍប្រទេសជាតិ ។

បើតាមលោក កុយ ណារ៉ុង មេឃុំកំពង់ស្វាយ បានឲ្យដឹងថា កម្មវិធីក៏មានការចូលរួមពីលោក ជា ប៊ុន​ធៀន ប្រធានក្រុមប្រឹក្សាស្រុកកែនស្វាយ សមាជិកសមាជិកាក្រុមប្រឹក្សាឃុំ និងបេក្ខ​ជន​ប្រឡង​ជាប់ និងប្រឡងធ្លាក់សរុបជាង ៥០នាក់ ៕ អត្ថបទ បាន សុខរិទ្ធិ