ភ្នំពេញ៖ លោកវេជ្ជបណ្ឌិត ស្រី វណ្ណថន ប្រធានផ្នែកត្រចៀក ច្រមុះ បំពង់ក នៃមន្ទីរពេទ្យព្រះអង្គឌួង បានលើកឡើងថា មកដល់ពេលនេះ មន្ទីរពេទ្យព្រះអង្គឌួង ​បានវះកាត់ ​ព្យាបាលជំងឺគ-ថ្លង់​ពីកំណើតឲ្យស្តាប់ ឮនិងចេះនិយាយ ​ទទួលបានជោគជ័យ១០០%។

លោកវេជ្ជបណ្ឌិត ស្រី វណ្ណថន បានរំលឹកពីបេសកកម្មការងាររបស់ខ្លួនថា ក្នុងការវះកាត់ជំងឺគ-ថ្លង់ពីកំណើត បានចាប់ផ្តើមដំបូងកាលពីខែតុលាឆ្នាំ២០១៨ វះកាត់ជំងឺគ-ថ្លង់ ជូនកុមារចំនួន៥ករណី ហើយរហូតមកដល់ពេលនេះ មន្ទីរពេទ្យព្រះអង្គឌួងបានវះកាត់ដល់កុមារគ-ថ្លង់ពីកំណើត និងដោយសារជំងឺផ្សេងៗបានចំនួនជិត៥០នាក់​ ដោយអ្នកខ្លះវះកាត់ត្រចៀកមួយចំហៀង និងកុមារខ្លះទៀត វះកាត់ត្រចៀកសងខាង​ ជាពិសេសក្រោយការវះកាត់ គឺពួកគាត់​ទទួល​ជោគជ័យ​១០០% ក្នុងនោះអាចស្ដាប់ឮ​ និងនិយាយបានធម្មតា។

អាណាព្យាបាលមកពីបណ្តារាជធានី-ខេត្ត​ បានយកកូនមកវាស់ត្រចៀក ក្រោយទទួលការវះកាត់​ជំងឺគ-ថ្លង់ នាពេលកន្លងមក​ និងពិនិត្យឧបករណ៍ដាក់ត្រចៀកព្រមទាំងទទួល​ការណែនាំពី​របៀប​បង្ហាត់ឲ្យកូនៗ​របស់ខ្លួនឲ្យហាត់រៀននិយាយនៅផ្ទះបន្ថែមទៀត ដើម្បីឲ្យអណ្តាតរបស់កុមារ​ក្រលាស់​បានលឿន​ និងឆាប់ចេះ​និយាយ និងនិយាយបានច្បាស់ល្អ។

ឯកឧត្តម សាស្ត្រាចារ្យ លូ លីឃាង​ នាយកមន្ទីរពេទ្យព្រះអង្គឌួង​ នៃក្រសួងសុខាភិបាល ព្រះរាជា​ណា​ចក្រ​កម្ពុជា ​បានថ្លែងថា ​មន្ទីរពេទ្យព្រះអង្គឌួង​ក្រោមការយកចិត្តទុកដាក់ខ្ពស់​ពី​ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល ដើម្បីចូលរួមចំណែក​អភិវឌ្ឍន៍​វិស័យ​សុខាភិបាល ស្របតាមគោលនយោបាយរបស់រាជរដ្ឋាភិបាលកម្ពុជា ក្រោមការដឹកនាំ​ដ៏ឈ្លាសវៃ​ប្រកបដោយគតិបណ្ឌិតរបស់សម្តេចតេជោ ​ដែលជានិច្ចកាលសម្តេច តែងតែយក​ចិត្ដទុក​ដាក់គិតគូរជួយឧបត្ថម្ភគាំទ្រ​ និងផ្ដល់អាទិភាពដល់វិស័យសុខាភិបាល​៕អត្ថបទ រដ្ឋា