ភ្នំពេញ៖ ជាថ្មីម្តងទៀត ពលរដ្ឋរស់នៅក្នុងរាជធានីភ្នំពេញ បានបញ្ជាក់ថា បន្ទាប់ពីបានចាក់វ៉ាក់សាំងបង្ការជំងឺ កូវីដ-១៩ដូសជំរុញឆ្លាស់គ្នាបន្តបន្ទាប់រួចមក សុខភាពធម្មតា មិនប្រតិកម្មនឹងវ៉ាក់សាំងនោះទេ ។

ក្នុងពេលមកទទួលការចាក់វ៉ាក់សាំងកូវីដ-១៩ នៅមណ្ឌលសុខភាពផ្សារដើមថ្កូវ រាជធានីភ្នំពេញ នៅថ្ងៃទី១៧ ខែមករានេះ ប្រជាពលរដ្ឋ បាននិយាយថា ​ការមកទទួលការចាក់វ៉ាក់សាំងបង្ការ​ជំងឺ​កូវីដ-១៩ ដូសជំរុញទី៦ក្នុងពេលនេះ ​គឺ​ដើម្បី​ការពារខ្លួន​ពីជំងឺកូវីដ-១៩ និងមិនចង់ឱ្យ​ប្រទេស​កម្ពុជា​មានការឆ្លងរីក ​រាលដាលជំងឺកូវីដ-១៩ ដូចពេលមុននោះទេ​ ព្រោះថា​ពេលឆ្លងជំងឺកូវីដច្រើន ពិបាករស់នៅណាស់។

ក្នុងពេលចុះពិនិត្យការចាក់វ៉ាក់សាំងបង្ការជំងឺកូវីដ នៅខេត្តព្រះសីហនុ និងខេត្តកោះកុង នៅចុង សប្តាហ៍​កន្លងទៅ ​លោកជំទាវវេជ្ជបណ្ឌិត ឱ វណ្ណឌីន ​ប្រធានគណៈកម្មការចំពោះកិច្ចចាក់វ៉ាក់សាំង​បង្ការ ជំងឺកូវីដ-១៩ ​ក្នុងក្របខណ្ឌទូទាំងប្រទេស ​បានក្រើនរំលឹកពលរដ្ឋមិនត្រូវភ្លេចខ្លួច ឬពន្យា​ពេលទុកយូពេក​ មិនទៅចាក់វ៉ាក់សាំងបង្ការជំងឺកូវីដ-១៩​ ដូសជំរុញនោះទេ។

ការពន្យាពេលយូរពេក ​ដោយខ្លះរហូតដល់៨ ខែ ទៅ១ឆ្នាំ អាចនឹងធ្វើឲ្យកងការពារនៅក្នុងខ្លួនរបស់​បុគ្គល​ម្នាក់ៗ មានការថយចុះ​ ហើយងាយប្រឈម ​ជាមួយនឹងការវាយលុកនៃជំងឺកូវីដ។

លោកជំទាវវេជ្ជបណ្ឌិត ​បានអំពាវនាវដល់ប្រជាពលរដ្ឋកុំរើសអើងការចាក់វ៉ាក់សាំង ​ព្រោះថាការ ចាក់វ៉ាក់សាំងកូវីដចម្រុះគ្នា ​ជួយបង្កើនភាពស៊ាំក្នុងសារពាង្គកាយបានខ្ពស់ជាងការវ៉ាក់សាំង​តែ​មួយ​​មុខ ដូច្នេះ​សូមពលរដ្ឋមកទទួលការចាក់វ៉ាក់សាំងដួស​ជំរុញឲ្យបានគ្រប់គ្នា ។

បច្ចុប្បន្ន ការចាក់វ៉ាក់សាំងបង្កាជំងឺកូវីដ-១៩​ ត្រូវបានរាជរដ្ឋាភិបាល ​បន្តចាត់ទុកជាយុទ្ធសាស្រ្តដ៏ សំខាន់មួយ ​ដើម្បីធានានិរន្តរភាពសេដ្ឋកិច្ច ​និងការរស់នៅជាធម្មតា ​តាមបែបគន្លងថ្មី ជាមួយវត្តមានជំងឺ កូវីដ-១៩។ ​សម្រាប់ប្រជាពលរដ្ឋ មិនទាន់ចាក់វ៉ាក់សាំងកូវីដ ពីដូសមូលដ្ឋាន​រហូត​ដល់ដូសជំរុញ ​គឺអាច ​ទៅទទួលការចាក់វ៉ាក់សាំងបាន ​នៅគ្រប់ទីតាំងសុខាភិបាលសាធារណៈ ឬទីតាំងចល័ត ​រៀបចំដោយក្រសួងសុខាភិបាល​ សហការជាមួយដៃគូរពាក់ព័ន្ធផ្សេងៗ ៕អត្ថបទ៖ ទូច សោភ័ណ