ភ្នំពេញ៖ ក្រសួងអប់រំ យុវជន និងកីឡា បានប្រកាសឱ្យគ្រប់មន្ទីរអប់រំ រាជធានី-ខេត្តឡើងមក​ទទួល​សញ្ញាបត្រមធ្យមសិក្សាទុតិយភូមិឆ្នាំសិក្សា ២០១៩ ក៏ដូចជាទទួលវិញ្ញាបនបត្របណ្ដោះអាសន្ន​សម្រាប់ការប្រឡងក្នុងឆ្នាំ ២០២២។

ក្រសួងអប់រំ យុវជន និងកីឡា នៅថ្ងៃនេះបានជម្រាបជូនប្រធានមន្ទីរអប់រំ រាជធានី-ខេត្តទាំងអស់ ឡើងមករាជធានីភ្នំពេញ ​ដើម្បីទទួលសញ្ញាបត្រមធ្យមសិក្សាទុតិយភូមិសម័យប្រឡង ​១៩ សីហាឆ្នាំ ២០១៩ ចាប់ពីថ្ងៃទី ១៦ ខែមករា ឆ្នាំ ២០២៣។

ទន្ទឹមគ្នានេះ ក្រសួងអប់រំ យុវជន និងកីឡា បាននឹងកំពុងផលិតវិញ្ញាបនបត្របណ្ដោះអាសន្នមធ្យម​សិក្សាទុតិយភូមិ ​សម័យប្រឡង ៥ធ្នូ ឆ្នាំ ២០២២ផងដែរ។​ វិញ្ញាបនបត្របណ្ដោះអាសន្នមធ្យម​សិក្សាទុតិយភូមិ ​សម័យប្រឡង ៥ធ្នូ ឆ្នាំ ២០២២ ​គឺ​មន្ទីរអប់រំ រាជធានី-ខេត្ត អាចឡើងមកទទួល​ចាប់ពីថ្ងៃទី ២៣ ខែមករា។ ការចេញសញ្ញាបត្រ ក៏ដូចជាវិញ្ញាបណបត្របាក់ឌុប​សម្រាប់សម័យ​ប្រឡង​ទាំងពីរនេះ គឺដើម្បីឱ្យ​បេក្ខជនអាចយកទៅប្រើប្រាស់ទៅតាមច្បាប់អនុញ្ញាត។

ក្រសួងអប់រំ បានបញ្ជាក់ផងដែរថា ការទៅទទួលសញ្ញាបត្របាក់ឌុប ក៏ដូចជាវិញ្ញាបណបត្រ គឺបេក្ខជនមិនចំណាយថវិកានោះទេ។

ពាក់ព័ន្ធនឹងការប្រគល់សញ្ញាបត្រ ក៏ដូចជាវិញ្ញាបណបត្របាក់ឌុប នៃឆ្នាំសិក្សាទាំងពីរនេះ ក្រសួងអប់រំ ក៏បានបញ្ជាក់ឱ្យប្រធានមន្ទីរនីមួយៗត្រូវប្រជុំថ្នាក់ដឹកនាំ ​មន្រ្តីជំនាញរបស់មន្ទីរ និងនាយក និយាការគ្រឹះស្ថានមធ្យមសិក្សាដែលមានសិស្សប្រឡងជាប់ ដើម្បីរៀបចំយន្តការ និង​នីតិវិធីផ្ដល់សញ្ញាបត្រ និងវិញ្ញាបណបត្រ​ និងធ្វើសេចក្ដីជូនដំណឹងលម្អិតបន្ថែម ប្រកបដោយ​ស្មារតីទទួលខុសត្រូវខ្ពស់។

បេក្ខជនដែលប្រឡងជាប់បាក់ឌុប សម័យប្រឡង ១៩សីហា ឆ្នាំ ២០១៩ គឺមានចំនួន ៧៩ ០៥២ នាក់ ​គិតជាភាគរយនៃបេក្ខជនមកប្រឡងសរុប ​គឺស្មើនឹង ៦៨, ៦២ភាគរយ។ រីឯការប្រឡងបាក់ឌុបសម័យប្រឡង ៥ធ្នូ ឆ្នាំ ២០២២ គឺមានបេក្ខជនដែលប្រឡងជាប់ចំនួន ៩០ ៩៥០ នាក់ ​គិតជាភាគរយនៃបេក្ខជនមកប្រឡង គឺចំនួន ៧២,៣៣ភាគរយ៕

អត្ថបទ៖គឹមហុក