ភ្នំពេញ ៖ ជារៀងរាល់ឆ្នាំ គ្រួសារមួយចំនួនបានជួបជុំគ្នាដើម្បីប្រារព្វពិធីបុណ្យចូលឆ្នាំតាមប្រពៃណីចិន និងវៀតណាម មិនផ្លូវការនៅទូទាំងប្រទេសកម្ពុជា។ នេះជាពេលវេលាសម្រាប់ក្រុមគ្រួសារ និងមិត្តភ័ក្តិធ្វើពិធីជប់លៀង និងអបអរឆ្នាំថ្មីដែល​នឹងចូលមកដល់នាពេលខាងមុខ។ ដូច្នេះក្នុងអំឡុងពេលនោះ នៅតាមដងផ្លូវកាន់តែមានភាពមមាញឹក និងកាន់តែប្រឈមនឹងគ្រោះថ្នាក់ ដោយសារមនុស្សធ្វើដំណើរដោយប្រញាប់ប្រញាល់ត្រឡប់ទៅផ្ទះឱ្យទាន់ពេលវេលា។

ដូច្នេះនៅថ្ងៃទី១៧ ខែមករា ឆ្នាំ២០២៣នេះ គណៈកម្មាធិការជាតិសុវត្ថិភាពចរាចរណ៍ផ្លូវគោកនៅកម្ពុជា បានរួមសហការគ្នាជាមួយ អង្គការមូលនិធិបង្ការរបួសអាស៊ី និងក្រុមហ៊ុនធានារ៉ាប់រងអាយុជីវិតមេនូឡាយហ្វ៍ខេមបូឌា ប្រកាសផ្តើមយុទ្ធនាការលើកកម្ពស់​ការយល់ដឹងអំពីសុវត្ថិភាពចរាចរណ៍ផ្លូវគោកទូទាំងប្រទេស អំឡុងពេលពិធីបុណ្យចូលឆ្នាំ​ថ្មីប្រពៃណី​ចិន និងវៀតណាមឆ្នាំ ២០២៣ ដើម្បីបង្ការអ្នកប្រើប្រាស់ផ្លូវដែលងាយរងគ្រោះ ដើម្បីកាត់បន្ថយចំនួនអ្នកស្លាប់ និងរងរបួសដោយសារគ្រោះថ្នាក់​ចរាចរណ៍នៅ​ទូទាំងប្រទេស។

យុទ្ធនាការលើកកម្ពស់ការយល់ដឹងអំពីសុវត្ថិភាពចរាចរណ៍ផ្លូវគោក នឹងប្រកាសផ្តើមជាមួយនឹងការផលិត និងផ្តល់នូវផ្ទាំងបដាចំនួន ៣៥០ ផ្ទាំងទៅដល់ទូទាំងរាជធានី និងខេត្ត។ ផ្ទាំងបដាទាំងននេះ នឹងរំលេចនូវខ្លឹមសារនៃហានិភ័យនៃគ្រោះថ្នាក់ចរាចរណ៍ធំៗចំនួន ៧ ប្រធានបទ រួមមាន៖ ការបើកបរលើសល្បឿនកំណត់ ការមិនពាក់មួកសុវត្ថិភាព ការជែង/វ៉ាគ្នា និងសារៈសំខាន់នៃសិទ្ធិអាទិភាពលើដងផ្លូវ ការគាំទ្រសត្វចិញ្ចឹមឆ្លងកាត់ផ្លូវ និងការគោរពច្បាប់ចរាចរណ៍ផ្លូវគោករបស់ប្រទេស។

គួរបញ្ជាក់ថា លពីឆ្នាំ ២០២២ ក្នុងរយៈពេល ៣ ថ្ងៃនៃពិធីបុណ្យចូលឆ្នាំចិន និងវៀតណាម មានមនុស្សចំនួន ២៥ នាក់បានស្លាប់ និង ៤៩ នាក់ ផ្សេងទៀតបានរងរបួសយ៉ាងធ្ងន់ធ្ងរក្នុងគ្រោះថ្នាក់ចរាចរណ៍ បើយោងតាមរបាយការណ៍ដែលផ្សព្វផ្សាយដោយ​នាយកដ្ឋាន​ចរាចរណ៍ផ្លូវគោក និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ៕ អត្ថបទ វ៉ន ដារ៉ា