​ភ្នំពេញ៖ ឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី បានបញ្ជាក់ថា ទស្សនកិច្ចផ្លូវការរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ទៅកាន់​សាធារណ​រដ្ឋម៉ាល់ឌីវ ចាប់ពីថ្ងៃទី១៥ ដល់១៧ ខែមករា ឆ្នាំ២០២៣ តបតាមការអញ្ជើញរបស់ ឯកឧត្តម អ៊ីប្រាហ៊ីម ម៉ូហាមេដ សូលី ប្រធានាធិបតី នៃសាធារណរដ្ឋ ទោះបីជា​មានរយៈពេលខ្លី ប៉ុន្ដែត្រូវបានប្រមុខដឹកនាំប្រទេសទាំង២ បាន​ចាត់​ទុក​ជា​ដំណើទស្សនកិច្ចប្រវត្តិសាស្រ្ដ។

ឯកឧត្តម សុខ ចិន្តាសោភា បានថ្លែងក្នុងសន្និសីទសារព័ត៌មាន នារសៀលថ្ងៃទី១៧ ខែមករា ឆ្នាំ ២០២៣នេះ បន្ទាប់​ពីសម្ដេច​តេជោនាយករដ្ឋមន្ត្រី បានអញ្ជើញដឹកនាំគណៈប្រតិភូជាន់ខ្ពស់ នៃ​រាជរដ្ឋាភិបាលកម្ពុជាធ្វើ​ដំណើរ​ត្រឡប់​មក​ដល់​ទីក្រុងភ្នំពេញវិញប្រកបដោយសុវត្ថិភាព។

ឯក​ឧត្តម សុខ ចិន្តាសោភា បានបញ្ជាក់ថា លទ្ធផលនៃដំណើរអញ្ជើញបំពេញទស្សនកិច្ចរបស់សម្ដេចតេជោ ទៅកាន់​សាធារ​ណរដ្ឋម៉ាឌីវ រយៈពេល ៣ថ្ងៃកន្លងមកនេះ គឺទទួលបានលទ្ធផលយ៉ាងត្រចះត្រចង់សម្រាប់ជាតិមាតុភូមិ ជា​ពិសេស​សម្រាប់ទំនាក់ទំនងយ៉ាងជិតស្និទ្ធរវាងព្រះរាជាណាចក្រកម្ពុជា និងសាធារណរដ្ឋម៉ាល់ឌីវ។

គួរបញ្ជាក់ថា ដំណើរទស្សនកិច្ចរបស់ សម្តេចតេជោនាយករដ្ឋមន្ត្រី ទៅកាន់ប្រទេសម៉ាល់ឌីវនា នឹងបាន​ផ្ដល់​នូវកា​លានុវត្តភាពសម្រាប់ភាគីទាំងពីរធ្វើការពិនិត្យមើលឡើងវិញនូវដែនវិសាលភាពទាំងមូលនៃកិច្ចសហប្រតិបត្តិការទ្វេភាគី រួមទាំងការស្វែងរកអភិក្រមថ្មីៗ ដើម្បី​ពង្រឹងបន្ថែមទៀតនូវកិច្ចសហប្រតិបត្តិការលើវិស័យពាណិជ្ជកម្ម ការវិនិ​យោគ ការត​ភ្ជាប់ វិស័យសុខាភិបាល វប្បធម៌ កសិកម្ម និងការអភិវឌ្ឍធនធានមនុស្ស ដែលនឹងផ្តល់ផល​ប្រយោជន៍​ទៅ​វិញ​ទៅ​មកសម្រាប់ប្រទេស និងប្រជា​ជន​ទាំងពីរ៕ អត្ថបទ៖ វ៉ន ដារ៉ា