អន្ដរជាតិ៖ ក្រុមអាជ្ញាធរនិយាយថា មនុស្សម្នាក់ស្លាប់ និងមនុស្ស ៧នាក់បាត់ខ្លួន ក្នុងហេតុការណ៍អគ្គិភ័យឆាបឆេះនាវាដឹកប្រេង​ក្នុង​ខេត្ត Samut Songkhram ​ប្រទេសថៃ​នាព្រឹកថ្ងៃអង្គារនេះ។ វីដេអូនៅលើបណ្តាញព័ត៌មានសង្គម ឃើញ​ផ្សែងខ្មៅយ៉ាង​ក្រាស់ផុសពីលើ​នាវាដឹកប្រេង Smooth Sea 22 ដែល​ចត​នៅតំបន់ភាគនិរតីទីក្រុងបាងកក ខណៈដែលក្រុមពន្លត់អគ្គិភ័យ​ព្យាយាមបាញ់ទឹកពន្លត់ចេញពីឆ្នេរ និងទូកតូចៗ។ សំឡេង​ផ្ទុះដ៏ខ្លាំង បានឮ​មុនពេលអគ្គិភ័យកើតឡើង ធ្វើឲ្យរញ្ជួញដល់​តំបន់ក្បែរនោះ។

ក្រុមអាជ្ញាធរ​បញ្ជាក់ថា មនុស្សម្នាក់បានស្លាប់ ៤នាក់រងរបួស និង​មនុស្ស ៧នាក់​បាត់ខ្លួន ហើយ​មូលហេតុ​បណ្តាល​ឲ្យមានការផ្ទុះ គេពុំទាន់បានបញ្ជាក់នៅឡើយនោះទេ៕