ភ្នំពេញ៖ សារមន្ទីរព្រះស្រីឦសានវរ្ម័ន ដែលស្ថិតក្រោមធនាគារជាតិកម្ពុជា បានរៀបចំការតាំង ពិព័រណ៍​មិន​អចិន្ត្រៃយ៍រូបថតឯកសារ​ នៃដំណើរព្រះរាជកិច្ចរបស់ព្រះបាទ ​ស៊ីសុវត្ថិ យាងទៅប្រទេស​បារាំង ក្នុងឆ្នាំ១៩០៦​ និងដើម្បីអបអរសាទរខួបទី៧០ឆ្នាំ ​ដែលកម្ពុជាទទួលបានឯករាជ្យ ពីប្រទេស​បារាំង​ផងដែរ ។

លោក ប្លែស គីលីយ៉ង់ សហប្រធានសារមន្ទីរព្រះស្រីឦសានវរ្ម័ន ​បានឲ្យដឹងថា ការតាំងពីពិព័រណ៍​រូបថត​ឯកសារព្រះបាទស៊ីសុវត្ថិនេះ ​ធ្វើជារៀងរាល់ថ្ងៃ រហូតដល់ខែមេសា ​ចាប់ពីម៉ោង៩ព្រឹក ដល់៦ល្ងាច​ លើកលែងតែថ្ងៃច័ន្ទ និងថ្ងៃបុណ្យ ​ដែលមានទីតាំងជិតរមណីយដ្ឋាន​វត្តភ្នំ និងអាចចូល​តាមផ្លូវ១០២ ឬច្រកខាងមុខ ​នៅលើផ្លូវលេខ១០៦ ។

លោក បានបន្តថា ព្រះបាទស៊ីសុវត្ថិ ​ជាព្រះមហាក្សត្រខ្មែរដំបូងគេ បានយាងធ្វើដំណើរទស្សនកិច្ច​ក្នុងបច្ចឹមប្រទេស និធ្វើឲ្យប្រទេសក្នុងតំបន់នោះ ​បានស្គាល់ពីប្រទេសខ្មែរកាន់តែច្រើន ហើយ​ដំណើរព្រះរាជទស្សនកិច្ចនេះ ​ក៏ដើម្បីផ្សារភ្ជាប់ទំនាក់ទំនងការទូត រវាងប្រទេសកម្ពុជា និងបារាំងផងដែរ ។

លោក ប្លែស គីលីយ៉ង់ ការតាំងពិព័រណ៍នេះ ក៏បានបង្ហាញពីប្រភពឯកសារផងដែរ ដល់អ្នក​ស្រាវជ្រាវ​ពីព្រះប្រវត្តិរបស់ព្រះអង្គ ​ខណៈសារមន្ទីរព្រះស្រីឦសានវរ្ម័ន កំពុងស្រាវជ្រាវបន្ថែមនូវ​ឯកសារនានា ពាក់ព័ន្ធនឹងព្រះអង្គ ​និងព្រះមហាក្សត្រខ្មែរជាច្រើនអង្គទៀត ដើម្បីយកមកតាំង​ពិព័រណ៍ ដល់ភ្ញៀវទេសរជាតិ និងអន្តរជាតិបានទស្សនា ​និងស្រាវជ្រាវ ។

គួរបញ្ជាក់ថា ក្រៅពីរូបថតឯកសារព្រះបាទស៊ីសុវត្ថិ ​សារមន្ទីរព្រះស្រីឦសានវរ្ម័ន​ក៏បាននាំយករូប​ថតផ្សេងៗ​មកតាំងពិព័រណ៍​ ក្នុងពិព័រណ៍មិនអចិន្ត្រៃយ៍នេះ​ ជាច្រើនប្រភេទទៀត ហើយភ្ញៀវអាច​ចូល​ទស្សនាដោយឥតគិតថ្លៃ ​ដែលកន្លងមកមានភ្ញៀវចូលទស្សនា​ ជាច្រើនពាន់នាក់មកហើយ ៕

អត្ថបទ៖ បាន សុខរិទ្ធិ