ភ្នំពេញ៖ ឯកកឧត្តម ឈិត សុខុន រដ្ឋមន្ត្រីក្រសួងធម្មការ និងសាសនា បានជំរុញទៅគ្រប់អ្នក ពាក់ព័ន្ធ​ទាំងអស់ ខិតខំយកចិត្តទុកដាក់ឲ្យបានខ្ពស់បំផុត ក្នុងការលើកស្ទួយវិស័យសាសនា ប្រពៃណីទំនៀមទម្លាប់របស់ជាតិ នៅតាមរយៈសកម្មភាពផ្សេងៗ ។

នៅក្នុងកិច្ចប្រជុំសន្និបាតបូកសរុបលទ្ធផលការងារ ​ប្រចាំឆ្នាំ២០២២ និងលើកទិសដៅ អនុវត្តការងារ​បន្តឆ្នាំ២០២៣​ នៃក្រសួងធម្មការ ​និងសាសនា ​នៅថ្ងៃទី១៨ ខែមករា ​ឆ្នាំ២០២៣ ​ឯកឧត្តម ឈិត សុខុន​ បានមានប្រសាសន៍ថា ឆ្នាំ២០២២ ថ្នាក់ដឹកនាំក្រសួង​ និងមន្រ្តីរាជការ ទាំងអស់ បានបំពេញ​ការងារ​របស់ខ្លួន ​ដោយឈរលើស្មារតីទទួលខុសត្រូវខ្ពស់ ​និងការងារ ​គ្រប់គ្រងសាសនា កាន់តែ​មានប្រសិទ្ធភាព តាមរយៈការពង្រឹងការងារអភិបាលកិច្ច ជាប្រចាំក្នុងព្រះពុទ្ធសាសនា និងពាហិរសាសនា។

ឯកឧត្តម រដ្ឋមន្រ្តីបន្តថា ស្របតាមគោលនយោបាយរបស់រាជរដ្ឋាភិបាល ក្រសួងបានដាក់ចេញ​នូវផែនការ​យុទ្ធសាស្រ្ត​ មួយចំនួនសម្រាប់អនុវត្តនៅឆ្នាំបន្ទាប់ ​ដោយផ្តោតសំខាន់ទៅលើការគោរព​សេរីភាពខាងជំនឿ ​និងសាសនា ការលើកស្ទួយព្រះពុទ្ធសាសនា ​ដែលជាសាសនារបស់រដ្ឋ ។

បច្ចុប្បន្នរាជរដ្ឋាភិបាល​ បានយកចិត្តទុកដាក់យ៉ាងខ្លាំង ក្នុងការអភិវឌ្ឍ និងលើកស្ទួយទាំងវិស័យ​អាណាចក្រ និងពុទ្ធចក្រ ​ដែលបញ្ហានេះភាគីទាំអស់ត្រូវខិតខំបន្ថែមទៀត និងយកចិត្តទុកដាក់​ខ្ពស់ក្នុង ការលើកស្ទួយវិស័យសាសនា ​ប្រពៃណីទំនៀមទម្លាប់របស់ជាតិ តាមរយៈសកម្មភាពនានា ។

ឯកឧត្តម រស់ វណ្ណី អគ្គនាតករដ្ឋបាល និងហិររញ្ញវត្ថុ បានលើកឡើងថា បច្ចុប្បន្នកម្ពុជាមានវត្តអារាម​ចំនួនជាង ៥០០០វត្ត ក្នុងនោះគណៈមហានិកាយ ចំនួនជាង ៤.៨០០វត្ត និងគណៈធម្មយុត្តិ​ចំនួន២៦១វត្ត, ព្រះសង្ឃជាង ៧ម៉ឺនអង្គ, អាស្រមចំនួនជាង១០០, មណ្ឌលវិបស្សនា ចំនួន២៤ ។ សាសនាឥស្លាម មានវិហារ/ស៊ូរ៉ាវ ជាង ១៤០០កន្លែង, សាសនាគ្រិស្ដ មានវិហារ/ស្នាក់ជាង ២ ០០០កន្លែង, ពុទ្ធសាសនាមហាយាន មានវត្ត/វិហារ/ស្នាក់ការជាង ២០០កន្លែង, សាសនាបាហៃមានវិហារ/ស្នាក់ការ ចំនួន២៦កន្លែង, សាសនាកៅដាយ និងសាសនាផ្សេងៗ មានវត្ត/ស្នាក់ការ ៣កន្លែង ៕អត្ថបទ បាន សុខរិទ្ធិ