​នេប៉ាល់៖ ក្រុម​អ្នក​ជួយ​សង្គ្រោះបាន​ប្រើប្រាស់​យាន​ដ្រូ​ន និង​បាន​ចុះទៅ​ជ្រោះ​ជ្រៅ​មួយកន្លែង​កាលពី​ថ្ងៃ​អង្គារ ដើម្បី​ស្វែងរក​អ្នក​បាត់​ខ្លួន​ចុង​ក្រោយ ពី​គ្រោះមហន្តរាយ​ផ្លូវអាកាស​ដ៏​អាក្រក់​បំផុត​របស់​ប្រទេស​នេប៉ាល់​ក្នុង​រយៈពេល ៣០ឆ្នាំ​មកនេះ ដែល​ក្នុង​ឧប្បត្តិហេតុ​នេះ​មនុស្ស​យ៉ាងហោចណាស់ ៧១នាក់​បាន​ស្លាប់​រួមមាន​ទាំង​កុមារ​។

ស្ថានភាព​លំបាក​នៅ​ជុំវិញ​ជ្រលង​ភ្នំ និង​អាកាសធាតុ​មិន​អំណោយផល បាន​រារាំង​កិច្ចខិតខំ​ប្រឹងប្រែង​ជួយសង្គ្រោះ​នៅ​ជិត​ទីក្រុង​ទេសចរណ៍ Pokhara ជា​កន្លែង​ដែល​យន្តហោះ​ជើងហោះហើរ Yeti Airlines ATR 72 ផ្ទុក​មនុស្ស ៧២នាក់​បាន​ធ្លាក់​កាលពី​ថ្ងៃអាទិត្យ​។ ​មន្ត្រីនគរបាល​នៅ​ទីក្រុង Pokhara និយាយថា ពេលនេះ​មាន​អ័ព្ទ​ក្រាស់​នៅទីនេះ យើង​កំពុង​បញ្ជូន​បុគ្គលិក​ស្វែងរក និង​ជួយសង្គ្រោះដោយ​ប្រើ​ខ្សែពួរ​ចុះទៅ​ក្នុង​ជ្រលង​ភ្នំ ដែល​បំណែក​ខ្លះ​នៃ​យន្តហោះ​បាន​ធ្លាក់​។ ក្រុម​អ្នក​ជួយសង្គ្រោះ​បាន​ប្រមូល​សាកសព​មនុស្ស ហើយ​បាន​បញ្ជូនទៅ​ធ្វើតេស្ត DNA ប៉ុន្តែ​កិច្ចខិតខំ​ប្រឹងប្រែង​ស្វែងរក​នឹង​បន្ត​រហូតដល់​អ្នកដំណើ​រ និង​សមាជិក​អាកាសយានិក​ទាំង ៧២នាក់​ត្រូវបាន​រកឃើញ​។

លោក Prakash Pokhrel មន្ត្រី​សម្របសម្រួល​ប្រតិបត្តិការ​ជួយសង្គ្រោះ​នៅ​អាកាសយានដ្ឋាន Kathmandu បាន​និយាយថា សាកសព​ទី​៧១ ត្រូវបាន​គេ​រកឃើញ​កាលពី​រសៀល​ថ្ងៃ​អង្គារ​។ ជាមួយគ្នានេះមន្ត្រី​អាកាសយានដ្ឋាន​បាន​និយាយថា សាកសព​ចំនួន ៤៨នាក់​ត្រូវបាន​នាំយក​ទៅកាន់​រដ្ឋធានី Kathmandu កាលពី​ថ្ងៃ​អង្គារ ហើយ​ត្រូវបាន​បញ្ជូនទៅ​មន្ទីរពេទ្យ​ដើម្បី​ធ្វើ​កោសល្យវិច័យ ខណៈ​សាកសព ២២​នាក់កំពុង​ត្រូវ​បានប្រគល់​ទៅឱ្យ​ក្រុមគ្រួសារ​។ ​ក្រុម​អ្នកស៊ើប​អង្កេត​គ្រោះថ្នាក់​យន្តហោះ​របស់​ប្រទេស​បារាំង និង​កាណាដាបាន​និយាយថា ពួកគេ​មាន​គម្រោង​ចូលរួម​ក្នុងការ​ស៊ើបអង្កេត​នេះដោយសារតែ​ក្រុមហ៊ុន​ផលិត​យន្តហោះ ATR មាន​មូលដ្ឋាន​នៅ​ប្រទេស​បារាំង ហើយ​ម៉ាស៊ីន​យន្តហោះ​ត្រូវបាន​ផលិត​នៅ​ប្រទេស​កាណាដាដោយ​ក្រុ​ហ៊ុន Pratt & Whitney Canada៕

អត្ថបទ៖ ប៊ុនថន