ភ្នំពេញ៖ ក្រុមអាជីវករលក់ដើមផ្កា នៅរាជធានីភ្នំពេញ បានលើកឡើងថា ក្នុងរដូវសែនចូលឆ្នាំចិន-វៀតណាមឆ្នាំ២០២៣នេះ តម្លៃផ្កានាំចូល គឺខ្ពស់ជាងឆ្នាំ២០២២ ដោយសារអ្នកដាំមានចំនួនតិច និងខ្សត់ផ្កាជាដើម ខណៈផ្កាទាំងអស់នោះភាគច្រើននាំចូលពីប្រទេសចិន ថៃ និងវៀតណាម។

​សូមបញ្ជាក់ថា ផ្កាជាច្រើនប្រភេទ និងសំខាន់ៗដូចជា ផ្កាស្បៃរឿង ដង្គុំ អង្គារសីល៍ អ័រគីដេ ដើមក្រូច ដើមម្ចាស់ សេមាន់ និងដើមរាសី-ល- ត្រូវបានគេទិញយកតាំងលម្អរក្នុងឱកាសបុណ្យ​ចូលឆ្នាំប្រពៃណី​ជនជាតិ​ចិន-វៀតណាម ដែលគេចាត់ទុកថា នាំលាភសំណាង សិរីសួស្តី និងត្រជាក់ត្រជុំ​ជាដើមទៅ​កាន់កូនចៅក្នុងក្រុមគ្រួសារ។

អ្នកស្រី សុខ លាង អាជីវកលក់ដើមផ្កា នៅបណ្តោយផ្លូវសហព័ន្ធរុស្ស៉ី ស្ថិតក្នុងខណ្ឌសែនសុខ រាជធានី​ភ្នំពេញ បានឲ្យទូរទស្សន៍ព័ត៌មាន ប៊ីធីវី ដឹងថា ភាគច្រើននៃផ្កានាំចូលពីក្រៅស្រុក ដើម្បីដាក់លក់រាយ​នៅកម្ពុជាក្នុងឱកាសបុណ្យចូលឆ្នាំ ចិន-វៀតណាមឆ្នាំនេះ បៀបធៀបនឹងឆ្នាំកន្លងទៅ តម្លៃនាំចូលគឺកើនឡើងជាងឆ្នាំងមុន តែចំពោះប្រភេទផ្កាអង្គារសីល៍ និងដើមក្រូចភ្នំប៉ុណ្ណោះ ក្រៅពីនេះដូចជាផ្កាស្បៃរឿងជាដើម នៅរក្សាតម្លៃថេរ។

បើតាមអាជីវករលក់ក្បែរៗគ្នាខាងលើនេះ បានឲ្យដឹងស្រដៀងគ្នាថា ទោះបីជាស្ថានភាពកូវីដធូរស្រាលច្រើនជាងឆ្នាំមុនៗយ៉ាងណាក្តី ប៉ុន្តែពួកគាត់មិនហ៊ានរំពឹងទេថា អាចនឹងលក់ផ្កាដាច់ច្រើន ឬក៏អស់យ៉ាងណាទេ ដោយសារបច្ចុប្បន្នទីផ្សារប្រកួតប្រជែង ជាពិសេសអ្នកលក់កើនឡើងពីមួយឆ្នាំទៅមួយឆ្នាំ និងគ្រប់ទីកន្លែង។ក្រុមអាជីវករលក់ផ្កាតាមបណ្តោយផ្លូវសហព័ន្ធរុស្ស៉ី បានអះអាងស្រដៀងគ្នាថា គិតមកដល់ថ្ងៃនេះ អាចលក់ផ្កាបានត្រឹម ៣០%ប៉ុណ្ណោះ ភាគច្រើនលក់ដាច់ប្រភេទផ្កាស្បៃរឿង ផ្ការអង្គារសីល៍ (ប្រភេទដើមតូច) និងផ្កាដង្គុំ។

សូមបញ្ជាក់ថា ប្រភេទផ្កាដង្គុំតម្លៃ ១០ដុល្លារ ក្នុង១ផើង, ដើមរាសី ៣ដុល្លារ, ផ្កាស្បៃរឿងតម្លៃ ៨ពាន់រៀល សម្រាប់១ផើងតូច និងផើងធំតម្លៃ ១ម៉ឺនរៀល, ដើមម្នាស់ ១៥ដុល្លារ។ ដោយឡែក ដើមផ្កាអង្គារសីល៍ តម្លៃចាប់ពី ៧ដុល្លារ ដល់៣៥០ដុល្លារ ទៅតាមទំហំតូចធំ និងដើមក្រូចភ្នំ តម្លៃចាប់ពី ២៥ដុល្លារ ដល់ ៤០០ដុល្លារ ទៅតាមទំហំតូចធំដូចគ្នា៕​ អត្ថបទ៖ ឈិត បូរ៉ាវី