កំពង់ឆ្នាំង៖ ព្រឹកថ្ងៃទី១៨ ខែមករា ឆ្នាំ២០២៣ ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង ឯកឧត្ដម លី ណារុន ក្រុមការងារចុះមូលដ្ឋានខេត្ត ឯកឧត្ដម ស៊ីវ រុន សមាជិក​ក្រុម​​ប្រឹក្សា​ខេត្ត អមដំណើរដោយលោកឧត្តមសេនីយ៍មេបញ្ជាការ មេបញ្ជា​ការ​រង​កង​រាជ​អាវុធ​ហត្ថ​ខេត្ត ស្នងការរងនគរបាលខេត្ត ក្រុមការងារមន្ទីររៀបចំដែនដី អាជ្ញាធររដ្ឋបាលស្រុកបរិបូណ៌ ឃុំ​មេលំ និងអ្នកពាក់ព័ន្ធ បានចុះដោះស្រាយវិវាទរវាងប្រជាពលរដ្ឋភូមិស្រះកែវ ឃុំមេលំ ចំនួន ១០​គ្រួសារ ជាមួយលោក យូ ប៉ាសិទ្ធិ ក្នុងទំហំ ១២,៥៦ ហិកតា (នៅចំណុចអូរឫស្សីសាច់) ដែល​បាន​កើត​ឡើងជាង១ឆ្នាំមកហើយ។

ជាលទ្ធផល ភាគីទាំងពីរបានឯកភាពបញ្ចប់រឿងតាមគោលការណ៍ឈ្នះ-ឈ្នះ របស់​ប្រមុ​ខ​រាជ​រដ្ឋាភិបាល​។

តំណាងប្រជាពលរដ្ឋបានគោរពថ្លែងអំណរគុណយ៉ាងជ្រាលជ្រៅបំផុតគោរពជូនសម្តេចអគ្គមហាសេនា​បតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបាន​ចាត់​តាំងឯកឧត្ដម អ​ភិបាលខេត្ត និងក្រុមការងារ ចុះមកដោះស្រាយ​បញ្ចប់​បញ្ហា​វិវា​ទ​ដី​ធ្លី​ជូន​ប្រជាពលរដ្ឋ​ក្នុងឃុំមេលំ ប្រកបដោយភាពយុត្តិធម៌ពិតប្រាកដ។

ក្នុងឱកាសនោះដែរ ឯកឧត្តមអភិបាលខេត្ត បានឧបត្ថម្ភដល់បងប្អូនប្រជាពលរដ្ឋចំនួន ២០នាក់ ក្នុងម្នាក់ៗថវិកា ១០ម៉ឺនរៀល និងឧបត្ថម្ភថវិកាដល់កម្លាំងការពារមួយចំនួនផងដែរ៕ ហុង វាស្នា