ភ្នំពេញ៖ នៅព្រឹកថ្ងៃទី១៩ ខែមករា ឆ្នាំ២០២៣នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញពិនិត្យមើលអំពីវឌ្ឍនភាពនៃការសាងសង់«មន្ទីរពេទ្យជាតិតេជោសន្ដិភាព» មានទីតាំងស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញ និងសំណេះសំណាលជាមួយ​កម្មករ​នៅក្នុងការដ្ឋាននៃមន្ទីរពេទ្យនេះប្រមាណ១,២០០ នាក់។

ក្រោយពីបានពិនិត្យមើលពីវឌ្ឍនភាព នៃសំណង់មន្ទីរពេទ្យមួយនេះ ឯកឧត្តម ឃួង ស្រេង អភិបាលរាជធានីភ្នំពេញ បានឱ្យដឹងថា សំណងអគារ​«មន្ទីរពេទ្យជាតិតេជោសន្ដិភាព»​មាន១១អគារ ដែលមានអគារព្យាបាល និងសង្គ្រោះបន្ទាន់(E)មានទំហំ ៧,៤៨០ ម៉ែត្រការ៉េ,អគារព្យាបាល​កម្រិតធ្ងន់(H1និង H2) មានគ្រែសរុបចំនួន៥២៧គ្រែ, អគារព្យាបាលកម្រិតស្រាល(H3,H4,H5,H6និងH7)មានគ្រែសរុប៨,៩៦៩ គ្រែ,គ្រែបុគ្គលិកពេទ្យប្រចាំការមានចំនួន៤៦គ្រែ​និងគ្រែបុគ្គលិកស្នាក់​នៅ​ចំនួន២០៦ គ្រែ,អគារបច្ចេកទេស(T1),អគារបច្ចេកទេស (T2),អគារផ្គត់ផ្គង់និង​ព័ត៌មាន(A)​មានទំហំ២,៨៣៥ ម៉ែត្រការ៉េ,អគារស្នាក់នៅសម្រាប់បុគ្គលិក (S)មានគ្រែសរុបចំនួន ២៣៤ គ្រែ។ ចំណតរថយន្តមានផ្ទៃក្រឡា ៧,០២៦ ម៉ែត្រការ៉េ ដែលអាចចត រថយន្តបានចំនួន ២១០ គ្រឿង មានសួនច្បារពណ៌បៃតងទំហំ ៤,៤៩០ ម៉ែត្រការ៉េ ។ មន្ទីរពេទ្យនេះ ស្ថាបនាដោយក្រុមហ៊ុន ស៊ីជេអ៊ីស៊ី CJEC.co,Ltd សហការជាមួយសាលារាជធានីភ្នំពេញ។

មន្ទីរពេទ្យជាតិតេជោសន្ដិភាពនេះត្រូវបានរដ្ឋបាលរាជធានីភ្នំពេញ​ បើកការដ្ឋាន​សាងសង់ កាលពីថ្ងៃទី១៤ ខែកុម្ភៈ ឆ្នាំ២០២២ ។មន្ទីរពេទ្យជាតិដ៏ធំមួយនេះគ្រោងនឹងបញ្ចប់ការសាងសង់ រួចជាស្ថាពរនិងដាក់ឲ្យដំណើរការជាផ្លូវការនៅខែមិថុនាឆ្នាំ២០២៣។ «មន្ទីរពេទ្យជាតិ តេជោ​សន្ដិភាព» នឹងក្លាយជាមន្ទីរពេទ្យជាតិធំជាងគេនៅប្រទេស កម្ពុជាដែលនឹងផ្ដល់នូវសេវាគ្រប់​ផ្នែកទាំង​អស់ ជូនប្រជាពលរដ្ឋទូទាំងប្រទេស ។ ក្នុងករណីមានជំងឺឆ្លងលក្ខណៈទ្រង់ទ្រាយធំ​មន្ទីរពេទ្យ​ជាតិដ៏ធំមួយនេះអាចមានលទ្ធភាពទទួលអ្នកជំងឺ​ដោយមិនមានការព្រួយបារម្ដ​នោះទេ​ដោយមន្ទីរពេទ្យនេះបំពាក់សម្ភារៈបរិក្ខារវេជ្ជសាស្ត្រទំនើបៗស្របតាមលក្ខណៈស្តង់ដារ។

ក្នុងវត្តមានដ៏ថ្លៃថ្លានេះ សម្តេចតេជោ បានវាយតម្លៃ និងកោតសរសើរពីវីរភាពនៃការលះបង់ខិតខំ​ប្រឹង​ប្រែងរបស់ក្រុមគ្រូពេទ្យនិងស្ថាប័នពាក់ព័ន្ធនៃស្ថាប័នជាតិ និងប្រជាពលរដ្ឋដែលបានចូលរួម ប្រយុទ្ធប្រឆាំងការឆ្លងរីករាលដាលកូវីដ១៩ បានយ៉ាងជោគជ័យ។ សម្តេចបញ្ជាក់ថា មន្ទីរពេទ្យថ្មីដែលសាងសង់មានគ្រែជិត១ម៉ឺនគ្រែបែបនេះ ប្រហែលមិនមានមន្ទីរពេទ្យ​ណានៅ​លើពិភពលោក មានដូចនោះទេ។

សម្តេច បញ្ជាក់ថា ការសាងសង់មន្ទីរពេទ្យនេះ ផ្តើមចេញពីគោលដៅទប់ស្កាត់ការផ្ទុះជំងឺ​ឆ្លង​ឡើងវិញ ប៉ុន្តែដោយពេលនេះមិនមានការផ្ទុះឡើងវិញទើបតម្រូវឱ្យប្រែក្លាយ​ទៅ​ជាមន្ទីរពេទ្យ​ពហុព្យាបាល ដើម្បីឈានទៅកាត់​បន្ថយ​សម្ពាធ​ចូលទៅព្យាបាលនៅកណ្តាលទីក្រុង។ជាមួយនឹងការបង្ហាញពីហេដ្ឋរចនាសម្ព័ន្ធនៃមន្ទីរពេទ្យថ្មីនេះ សម្តេចថា កូវីដ១៩ វាអាក្រក់ ប៉ុន្តែវា​បានដាស់តឿនយើងឱ្យប្រុងប្រយ័ត្ន ​និងនាំឱ្យមានការសាងសង់ដ៏ធំបែបនេះ ខណៈពេលមុនយើង​បានខ្ចីកន្លែងនេះ ​កន្លែងនោះសម្រាប់ការព្យាបាល។

សម្ដេចបានបន្តថា នៅពេលខាងមុខក្រសួងសុខាភិបាលត្រូវគ្រប់គ្រងមន្ទីរពេទ្យនេះដែល​ឥឡូវ​បានតែងតាំងប្រធានមន្ទីរពេទ្យរួចហើយៗសម្តេចក៏បានណែនាំ អនុញ្ញាតឱ្យរដ្ឋមន្ត្រីសុខាភិបាល ចុះហត្ថលេខាតែងតាំងអនុប្រធាន៥រូបទៀត តែម្តងដោយមិនចាំបាច់រង់ចាំមាន លិខិត ពីក្រសួង​មុខងារសាធារណៈជាមិននោះទេ ដើម្បីឱ្យមានរចនាសម្ព័ន្ធគ្រប់គ្រងមន្ទីរពេទ្យនេះ។

សម្តេច បន្តថា ក្របខណ្ឌពេទ្យ១៥០នាក់ឱ្យមន្ទីរពេទ្យនេះ មិនទាន់គ្រប់គ្រាន់នៅឡើយ គឺត្រូវការ​រហូត​ដល់១០០០នាក់ ដែលមានគ្រប់ឯកទេសនានា និងបានប្រកាសផ្តល់​ក្របខណ្ឌបន្ថែម២០០នាក់​ទៀត​តាមរយៈការប្រឡង និងបានសម្រេចផ្តល់មន្ត្រីជាប់កិច្ចសន្យា៣០០នាក់សម្រាប់​អ្នកបើកបរ​រថយន្ត​ពេទ្យឬផ្នែកអគ្គិសនីជាដើម។សម្តេចថា ទោះបីតម្រូវការផ្នែកការពារជាតិ សន្តិសុខកាន់តែធំ ប៉ុន្តែវិស័យសុខាភិបាលនិងអប់រំក៏សំខាន់ផងដែរ។

ឆ្លៀតក្នុងឱកាសនេះ សម្តេចបានផ្ញើសារនយោបាយឱ្យក្រុមអ្នកប្រឆាំង ជាពិសេសអ្នកដែលបាន​ចេញ​សេចក្តីថ្លែងការណ៍កាលពីម្សិលមិញដែលថា គណបក្សកាន់អំណាចកៀបសង្កត់ ការដែលត្រូវ​បានចាប់ខ្លួនលោក ថាច់ សេដ្ឋា អនុប្រធានគណបក្សភ្លើងទៀនអំពីរឿងចេញសែកស្អុយ សម្តេចបាន​ព្រមាន​ឱ្យមានការសុំទោសសម្តេច បើមិនដូច្នោះសម្តេចក៏បានណែនាំឱ្យមេធាវី​គណបក្ស​ប្រជាជនពិនិត្យមើល និងប្តឹងតាមផ្លូវច្បាប់​ជាបន្តទៀត។

សម្តេចថា សម្តេចមិនអត់ឱនឱ្យបានជាដាច់ខាត ​ព្រោះបើចង់ឈ្នះការឃោសនាផ្នែកនយោបាយ ត្រូវយកគំរូតាមការឃោសនាពាណិជកម្ម ដោយមិនត្រូវមកបង្អាប់ប៉ះពាល់អ្នកដ៏ទៃនោះឡើយ៕