​ចិន៖ កាលពី​ថ្ងៃ​ពុធ​លោក​ប្រធានាធិបតី​ចិន​ Xi Jinping បាន​ថ្លែង​ស្វាគមន៍​ក្នុង​ឱកាស​ពិធីបុណ្យ​ចូល​ឆ្នាំ​ថ្មី​ដល់​ប្រជាជន​ចិន​ទូទាំង​ប្រទេស ​នៅ​ពេល​លោក​បាន​ជួប​សំណេះសំណាល​តាម​វីដេអូ​ ជាមួយ​ពលរដ្ឋ​ទូទៅ​មកពី​ទូទាំងប្រទេស​ មុន​ពិធីបុណ្យ​និទាឃៈ​រដូវ​ ឬ​ចូលឆ្នាំ​ចិន​ដែល​នឹង​មកដល់​នៅ​ថ្ងៃ​ទី​២២ ​ខែ​មករា​សប្ដាហ៍​នេះ​។

​លោក Xi ដែល​ជា​អគ្គលេខាធិការ​នៃ​គណៈកម្មាធិការ​មជ្ឈិមបក្ស​កុ​ម្មុយ​និ​ស្ត​ចិន និង​ជា​ប្រធាន​គណៈកម្មាធិការ​យោធា​មជ្ឈិម​ផង​ដែរ​នោះ បាន​សំណេះសំណាល​ជាមួយ​បុគ្គលិក​ពេទ្យ​ក្នុង​មន្ទីរ​ពេទ្យ ប្រជាពលរដ្ឋ​ចាស់ៗ​នៅ​ឯ​ផ្ទះ​មណ្ឌល​ថែទាំ​មនុស្ស កម្មករ​នៅ​អណ្តូង​ប្រេង អ្នកដំណើរ បុគ្គលិក​នៅ​ស្ថានីយ​រថភ្លើង​ល្បឿន​លឿន អាជីវករ អតិថិជន​នៅ​ផ្សារ​លក់ដុំ និង​ប្រជាជន​នៅ​ក្នុង​ភូមិ​ជន​ជាតិ​ភាគតិច​តាម​វីដេអូ​។ ​លោក​ Xi ​បាន​ជូនពរ​ប្រជាជន​ចិន និង​ក្រុម​ជនជាតិ​របស់​ចិន​ទាំងអស់​ឲ្យ​មាន​សុខ​ភាពល្អ និង​មាន​សេចក្ដី​សុខ​នៅ​ក្នុង​ឆ្នាំថោះ​ និង​បាន​បង្ហាញ​ក្ដីសង្ឃឹម​របស់លោក​ថា ​ប្រទេស​ចិន​នឹង​ទទួល​តែ​ភាព​រុង​រឿង​ជា​រៀង​រហូត​។​ ជាមួយគ្នា​នោះ​លោក Xi Jinping បាន​បង្ហាញ​ក្ដីបារម្ភ​ផងដែរ​ពី​ករណី​ឆ្លង​វីរុស COVID-19 ​នៅ​តំបន់​ជនបទ​របស់​ប្រទេស​ចិន​។

​លោក​ប្រធានាធិបតី​បាន​ទាមទារ​ឲ្យ​មានការ​បង្កើន​ធនធាន​វេជ្ជសាស្ត្រ និង​សេវា​ផ្គត់ផ្គង់​ឱសថ និង​ផ្នែក​វេជ្ជសាស្ត្រដើម្បី​ត្រៀម​សម្រាប់​ការ​ព្យាបាល​អ្នកជំងឺ​ COVID-19​ ក្នុង​ករណី​ធ្ងន់ធ្ងរ​ណាមួយ​អំឡុង​ពិធីបុណ្យ​ចូលឆ្នាំ ជា​ពេលវេលា​ដែល​ពលរដ្ឋ​ចិន​មក​ជួប​ជុំ​គ្រួសារ​ក្នុង​សប្ដាហ៍​នេះ​។ លោ​កថា​ ចិន​បាន​ជ្រើសរើស​ផ្លូវ​ដ៏​ត្រឹមត្រូវ​ក្នុង​ការ​ដោះស្រាយ​បញ្ហា​ការ​ឆ្លង​រាលដាល​វីរុស COVID-19 ដោយ​ដាក់​ចេញ​វិធានការ​តឹងរ៉ឹង​កាលពី​ជិត​ ៣​ឆ្នាំ​កន្លង​ទៅ​នេះ​៕

អត្ថបទ៖ សុខមាន