ភ្នំពេញ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ ទំនង​ជាមួយរដ្ឋ សភា-ព្រឹទ្ធសភា និងអធិការកិច្ច បានស្នើទៅកាន់ក្រសួងធម្មការ និងសាសនា និង​ព្រះសង្ឃ​គ្រប់លំដាប់ ថ្នាក់ ជួយបង្កើនការផ្សព្វផ្សាយនូវធម៌ របស់ព្រះសម្មាសម្ពុទ្ធបន្ថែមទៀតទៅ​ដល់យុវជន​ជំនាន់ក្រោយ ឲ្យបានទូលំទូលាយ ។

នៅក្នុងពិធីបិទសន្និបាទបូកសរុបលទ្ធផលការងារ ប្រចាំឆ្នាំ២០២២ និងលើកទិសដៅ ការងារបន្ត ឆ្នាំ២០២៣ របស់ក្រសួងធម្មការ​ និងសាសនា នៅថ្ងៃទី១៨ ខែមករា នេះ លោកជំទាវកិត្តិសង្គហបណ្ឌិត បនជំរុញដល់មន្ត្រីរាជការ ​និងព្រះសង្ឃគ្រប់លំដាប់ថ្នាក់ រួមគ្នាថែរក្សា​សុខសន្តិភាព និងសុខុដុមនីយកម្ម សាសនានៅកម្ពុជា ដើម្បីចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍប្រទេស ​ហើយមន្ត្រីរាជការ ​និងព្រះសង្ឃគ្រប់លំដាប់ថ្នាក់ ​ត្រូវ​ពុះពារគ្រប់ឧបសគ្គ ដើម្បី​ដោះស្រាយបញ្ហាធំៗនៅក្នុងសង្គម​ និងរួមគ្នា ដោះស្រាយនូវអធិករណ៍ ដែលកើតមានឡើង​នៅក្នុងមូលដ្ឋាននីមួយៗ ។

លោកជំទាវ បានសំណូមពរដល់ក្រសួងធម្មការ រួមជាមួយព្រះសង្ឃគ្រប់លំដាប់ថ្នាក់​ និងស្ថាប័ន ពាក់ព័ន្ធ ​ត្រូវពង្រឹងប្រសិទ្ធភាព នៃការគ្រប់គ្រងចំណេះដឹង ​និងសមត្ថភាព តាមរយៈការពង្រឹង​ពុទ្ធិកសិក្សា ​គោរពឲ្យបាន​ខ្ជាប់ខ្ជួន​នូវព្រះធម៌វិន័យ ​និងអប់រំផ្សព្វផ្សាយឱវាទ​ព្រះ​សម្មា​សម្ពុទ្ធ​បរមគ្រូ ឱ្យបានទូលំទូ លាយ​ និងទំនៀមទម្លាប់ប្រពៃណីដ៏ល្អ ប្រពៃរបស់ជាតិ​ សំដៅចៀសវាងឱ្យបាននូវ​បាតុភាព​អសកម្មនានា ព្រោះព្រះពុទ្ធសាសនា​ ជាសាសនា ​ដែលមានលក្ខណៈវិទ្យាសាស្រ្ត មានហេតុផល​ច្បាស់លាស់ ។

លោកជំទាវ ម៉ែន សំអន បានកោតសសើរថ្នាក់ដឹកនាំក្រសួងធម្មការ ​និងសាសនាគ្រប់លំដាប់ថ្នាក់ បានរួមសហការគ្នា ក្នុងការអនុវត្តការងារទទួលបានជោគជ័យគួរជាទីមោទនៈ​ ហើយលោកជំទាវ ក៏បាន​ លើកឡើងអំពីជោគជ័យរបស់រាជរដ្ឋាភិបាល​ ក្នុងការគ្រប់គ្រងកូវីដ-១៩​ និងសមិទ្ធផលថ្មីៗ របស់រាជរដ្ឋាភិ ​បាលសម្រេចបាន ​ក៏ដូចជាជោគជ័យការទូត ​នៅលើឆាកអន្តរជាតិ ​និងជោគជ័យ នៃកិច្ចប្រជុំអាស៊ាន និងកិច្ចប្រជុំអន្តរសភា ដែលកម្ពុជាធ្វើជាម្ចាស់ផ្ទះ ៕អត្ថបទ៖ បាន សុខរិទ្ធិ