ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានមានប្រសាន៍ថា ជំងឺកូវីដ១៩ បាន​ផ្ដល់​មេរៀនអាក្រក់ដល់យើងទាំងអស់គ្នា ប៉ុន្ដែជំងឺនេះបានដាស់តឿនពិភពលោក​ឱ្យមានការប្រុងប្រយ័ត្ន នឹងជំងឺឆ្លង ដូច្នេះកម្ពុជា​បានសាងសង់ «មន្ទីរពេទ្យតេជោសន្តិភាព» ​ជាមន្ទីរពេទ្យមានស្ដង់ដា គ្រប់គ្រាន់​និងមានសមត្ថភាពទទួលអ្នកជំងឺជិត ​១​ ម៉ឺននាក់​។

សម្ដេចតេជោ នាយករដ្ឋមន្រ្ដី បានមានប្រសាសន៍​ ពេលអញ្ជើញពិនិត្យមើលវឌ្ឍនភាព​នៃការ​សាងសង់ «មន្ទីរពេទ្យជាតិតេជោសន្ដិភាព» ​និងសំណេះសំណាល​ជាមួយកម្មករសំណង់នៅ​ក្នុងការ​ដ្ឋាន​មន្ទីរពេទ្យនេះប្រមាណ ១ ២០០ នាក់ ស្ថិតនៅសង្កាត់គោករកា ​ខណ្ឌព្រែកព្នៅ រាជធានីភ្នំពេញ នាថ្ងៃទី១៩ ខែកមរានេះថា ​ការកសាង «មន្ទីរពេទ្យតេជោសន្តិភាព» គោលដៅធំរបស់រាជរដ្ឋាភិបាល គឺសម្រាប់គ្រប់គ្រងជំងឺឆ្លង។ ប៉ុន្ដែបើសិនជាគ្មានជំងឺឆ្លងគឺត្រូវរៀបចំមន្ទីរពេទ្យនេះ​ឱ្យទៅជាមន្ទីរ​ពេទ្យពហុព្យាបាលវិញ ដើម្បីកាត់បន្ថយភាពតាងនឹងនៅក្នុងរាជធានីភ្នំពេញ។

គួរបញ្ជាក់ថា ក្រោមការដឹកនាំដ៏ប៉ិនប្រសប់របស់ប្រមុខរាជរដ្ឋាភិបាលកម្ពុជា​ សម្ដេចតេជោ នាយក​រដ្ឋ​​មន្ត្រី​ ក្នុងការ​គ្រប់គ្រង​ក៏ដូចជា​កិច្ច​ខិតខំ​ចាក់វ៉ាក់សាំង​បង្ការជំងឺកូវីដ ១៩ ដល់​ពលរដ្ឋ​តាមរយៈ «យុទ្ធសាស្ត្រផ្ការីក» ​បានធ្វើឱ្យកម្ពុជា​សម្រេច​បានជោគជ័យ និងបើកដំណើរ​ការប្រទេសឡើងវិញ និងត្រូវបានពិភពលោកទទួលស្គាល់លើជោគជ័យនៃការគ្រប់គ្រងកូវីដ១៩ របស់ប្រទេសកម្ពុជា។

សម្តេចតេជោ ​បានបញ្ជាក់ថា នាអំឡុងពេលផ្ទុះជំងឺកូវីដ១៩ ​កម្ពុជា​ គ្មាន​ពលរដ្ឋណាម្នាក់ ​ដេកតាម​ចិញ្ចើម​ថ្នល់​ និង​គ្មានក្ដាមឈូសឡើយ៕អត្ថបទ៖ វ៉ន ដារ៉ា