ភ្នំពេញ៖ ក្រសួងផែនការ បានប្រកាសផ្សព្វផ្សាយលទ្ធផល អង្កេតសេដ្ឋកិច្ច សង្គមកិច្ចឆ្នាំ ២០២១ សម្រាប់បណ្ដាក្រសួងស្ថាប័ន បណ្ដាអង្គការជាតិ អន្តរជាតិ អាចប្រើប្រាស់ទិន្នន័យពីអង្កេតនេះ ក្នុងគោលដៅនានា។

អង្កេតសេដ្ឋកិច្ច សង្គមកិច្ចជាអង្កេតដែលធ្វើឡើងរៀងរាល់ ២ឆ្នាំម្ដង និងប្រើប្រាស់ថវិការាជ​រដ្ឋា​ភិបាល​កម្ពុជា​ទាំងស្រុង។​ លទ្ធផលនៃអង្កេតនេះ គឺមានសារៈសំខាន់ជាខ្លាំងសម្រាប់បណ្ដាក្រសួង​ស្ថាប័ន​ជាតិ-អន្តរជាតិ។ នេះជាការលើកឡើងរបស់ ​ឯកឧត្តម ទេសរដ្ឋមន្រ្តី ឆាយ ថន រដ្ឋមន្រ្តី​ក្រសួងផែនការ ក្នុងឱកាស​ផ្សព្វផ្សាយ​លទ្ធផលអង្កេតសេដ្ឋកិច្ច ​សង្គមកិច្ចកម្ពុជាឆ្នាំ ២០២១។

ឯកឧត្តមរដ្ឋ មន្រ្តីបន្តថា អង្កេតនេះជាការប្រមូលទិន្នន័យបានមកពីគ្រួសារចំនួនជាង ​១ម៉ឺនគ្រួសារ ដែលជ្រើសរើសពី ២៥ រាជធានី-ខេត្ត។ ​ការប្រមូលទិន្នន័យនេះដែរ គឺធ្វើឡើងជាចាំបាច់រៀងរាល់​ខែក្នុងរយៈពេល ១២ខែ។

ឯកឧត្តមបន្តថា លទ្ធផលនៃអង្កេតសេដ្ឋកិច្ច សង្គមកិច្ច គឺក្ដោបជារួមនូវទិន្ន័យសំខាន់​ជាច្រើនរបស់​គ្រួសារ។ ក្នុងនោះរួមមាន ផ្នែកប្រជាសាស្ត្រ, ស្ថានភាពលំនៅដ្ឋាន, កសិកម្ម, កម្លាំងពលកម្ម, សុខភាព និង​ជនមានពិការភាព, ការទទួលរងគ្រោះ, ​ចំណូលនិងឥណទាន(បំណុល)របស់គ្រួសារ, ការ​ចំណាយ​ប្រើប្រាស់​ទំនិញម្ហូបអាហារ ​និងមិនមែនម្ហូបអាហារ និងលក្ខណៈប្រើប្រាស់ស្បៀង​អាហាររបស់គ្រួសារ។

លោកជំទាវ ហង់ លីណា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកវិទ្យាស្ថានជាតិស្ថិតិ បាន​បញ្ជាក់ថា​ លទ្ធផលនៃអង្កេតសេដ្ឋកិច្ច ​សង្គមកិច្ចគឺនឹង​អាច​ប្រើប្រាស់ជាផ្លូវការ ​ដើម្បី​គណនា​ពីជីវភាពប្រជាពលរដ្ឋ កំណើនសេដ្ឋកិច្ច ​និងជាប្រភពដ៏សំខាន់សម្រាប់បណ្ដាក្រសួងស្ថាប័ន។

ខណៈចេញផ្សាយលទ្ធផលនៃអង្កេតសេដ្ឋកិច្ច ​សង្គមកិច្ចឆ្នាំ ២០២១នេះ មន្រ្តីជំនាញ​នៃក្រសួងផែនការ ​ក៏បាន​នឹងកំពុងចុះប្រមូលទិន្នន័យ ​ពីគ្រួសារសំណាក ​តាមមូលដ្ឋាន ឃុំសង្កាត់នៃ ២៥ រាជធានី-ខេត្តផងដែរ។​ កិច្ចការនេះ ​នឹងមានរយៈពេលពេញមួយឆ្នាំ ​ដោយចាប់ផ្ដើមពីខែ មករា ដល់ខែធ្នូ ឆ្នាំ ២០២៣៕ អត្ថបទ៖ គឹមហុក