អ៊ុយក្រែន៖ អង្គការសហប្រជាជាតិកាលពីថ្ងៃពុធបានរិះគន់ ចំពោះចំណាត់ការគ្មានប្រសិទ្ធភាពនៅក្នុងអនុវត្តកិច្ច កិច្ចព្រមព្រៀងដែលអនុញ្ញាតឱ្យអ៊ុយក្រែននាំចេញគ្រាប់ធញ្ញជាតិតាមច្រកសមុទ្រខ្មៅ ប៉ុន្តែមិនបានដាក់ការស្តីបន្ទោសចំពោះភាពជាប់គាំងនាវាជាង ១០០គ្រឿងនៅក្នុងដែនទឹកប្រទេសទួរគី ដែលកំពុងរង់ចាំការអនុម័តការធ្វើដំណើរ និងការត្រួតពិនិត្យ។
ក្រោមកិច្ចព្រមព្រៀងដែលបានព្រមព្រៀងដោយប្រទេសរុស្ស៊ី អ៊ុយក្រែន ទួរគី និងអង្គការសហប្រជាជាតិ កាលពីខែកក្កដា នាវាត្រូវបានត្រួតពិនិត្យនៅក្នុងដែនទឹកប្រទេសទួរគីនៅពេលធ្វើដំណើរទៅ និងមកពីអ៊ុយក្រែន។ ភាគីទាំងបួនធ្វើការរួមគ្នាដើម្បីអនុម័ត និងត្រួតពិនិត្យនាវាដែលធ្វើដំណើរក្រោមកិច្ចព្រមព្រៀង។ អ្នកនាំពាក្យរងរបស់អង្គការសហប្រជាជាតិលោក ហ្វាហាន ហាក(Farhan Haq) និយាយថា អង្គការសហប្រជាជាតិជំរុញឱ្យភាគីទាំងអស់ធ្វើការ ដើម្បីដកចេញនូវឧបសគ្គសម្រាប់ការកាត់បន្ថយភាពជាប់គាំង និងធ្វើឱ្យប្រសើរឡើងនូវប្រសិទ្ធភាពប្រតិបត្តិការ។ ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ លោកស្រី លីនដា ថូម៉ាស់ គ្រីនហ្វៀល(Linda Thomas-Greenfield) កាលពីសប្តាហ៍មុនបានចោទប្រកាន់ប្រទេសរុស្ស៊ី ពីភាពយឺតយ៉ាវនៃការត្រួតពិនិត្យដោយនិយាយថា ស្បៀងអាហារចំនួនប្រាំលានតោនក្នុងមួយខែដំណើរការនៅក្រោមកិច្ចព្រមព្រៀងនេះ។
លោក Haq បាននិយាយថា យើងបានជំរុញឱ្យមានការត្រួតពិនិត្យបន្ថែមទៀត។ យើងបាននិងកំពុងជំរុញឱ្យប្រាកដថា ការត្រួតពិនិត្យនឹងដំណើរការលឿន និងហ្មត់ចត់។ អ្វីគ្រប់យ៉ាងត្រូវធ្វើដោយកិច្ចសហប្រតិបត្តិការពីគ្រប់ភាគី ហើយយើងកំពុងព្យាយាមធ្វើអ្វីគ្រប់យ៉ាងដែលយើងអាចធ្វើបាន ដើម្បីដំណើរការឱ្យបានលឿនជាងមុន។ កិច្ចព្រមព្រៀងជាកញ្ចប់ រួមមានការសម្របសម្រួលការនាំចេញស្បៀងអាហារ និងជីរបស់រុស្ស៊ី រួមទាំងសារធាតុអាម៉ូញាក់ ហើយអង្គការសហប្រជាជាតិបាននឹងកំពុងព្យាយាម ដើម្បីពិភាក្សាការចាប់ផ្តើមឡើងវិញការបញ្ជូនសារធាតុអាម៉ូញាក់របស់រុស្ស៊ី តាមរយៈបំពង់បង្ហូរទៅកាន់កំពង់ផែសមុទ្រខ្មៅអ៊ុយក្រែន ដែលបំពង់បង្ហូរនេះត្រូវបានបិទ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
