ភ្នំពេញ ៖ ស្ថានទូតជប៉ុនប្រចាំកម្ពុជា បានឱ្យដឹងថា កាលពីថ្ងៃទី១៨ ខែមករា ឯកឧត្តម ហាយ៉ាស៊ី យ៉ុស៊ីម៉ាសា រដ្ឋមន្ត្រីការបរទេស​ជប៉ុន​បាន​ប្រកាសតែងតាំងលោកស្រី មីណាមីណុ យ៉ូកុ ដែលជាតារាចម្រៀង និងសម្តែង ជាអគ្គរាជទូតសុច្ឆន្ទៈសម្រាប់​ខួបអនុស្សាវរីយ៍​លើកទី៧០​នៃមិត្តភាពជប៉ុន-កម្ពុជា ចាប់ពីថ្ងៃទី១៨ ខែមករា ដល់ថ្ងៃទី៣១ ខែធ្នូ ឆ្នាំនេះ ក្នុងគោលបំណងជំរុញការផ្លាស់ប្តូររវាងជប៉ុន និងកម្ពុជាបន្ថែមទៀ ត។

ក្រោយទទួលបានការតែងតាំងនេះ លោកស្រី មីណាមីណុ យ៉ូកុ បានឱ្យដឹងពីសេចក្តីប៉ងប្រាថ្នារបស់ លោកស្រីចំនួន ៤ ក្នុងនោះមានដូចជា៖

-លោកស្រីធ្លាប់មកប្រទេសកម្ពុជាក្នុងឆ្នាំ១៩៨៩ និង២០១៣ ហើយចាប់តាំងពីពេលនោះមក លោកស្រីមានអារម្មណ៍ពិសេសចំពោះកម្ពុជា។

-លោកស្រីមានសេចក្តីសោមនស្សរីករាយក្រៃលែង ដែលបានក្លាយជាអគ្គរាជទូតសុច្ឆន្ទៈក្នុងឆ្នាំនៃខួបអនុស្សាវរីយ៍លើកទី៧០ នៃមិត្តភាពរវាងជប៉ុន និងកម្ពុជា ដែលជាប្រទេសពិសេសសម្រាប់លោកស្រី។

-លោកស្រីនឹងបន្តធ្វើសកម្មភាពផ្សេងៗ ដើម្បីឱ្យប្រជាជនកម្ពុជាបានយល់ដឹងអំពីប្រទេសជប៉ុន ហើយប្រជាជនជប៉ុនក៏បានយល់ដឹងអំពីប្រទេសកម្ពុជាវិញដែរ។

-ឆ្នាំនេះ លោកស្រីពិតជាទន្ទឹងរង់ចាំការមកប្រទេសកម្ពុជា និងជួបប្រជាជនកម្ពុជាជាថ្មីម្តងទៀត៕

​

ដោយ៖ គង់ ឌិន​