កោះកុង៖ នាពេលថ្មីៗនេះ ក្រុមការងារអភិរក្សអណ្តើក នៃអង្គការ WCS និងរដ្ឋបាលជលផល បានរកឃើញពង អណ្តើកហ្លួង ចំនួន៤សម្បុក (ថ្ងៃទី១៦ ខែមករា រកឃើញមួយសម្បុក និងថ្ងៃទី១៩ រកឃើញបីសម្បុក) មានពងសរុបចំនួន៥៤គ្រាប់ ​នៅលើឆ្នេរខ្សាច់សិប្បនិម្មិត ក្បែរស្រះបង្កាត់​ពូជមួយ ក្នុងមជ្ឈមណ្ឌលអភិរក្ស សត្វល្មូនខេត្តកោះកុង។ នេះបើតាមប្រភពពីអង្គការ WCS ។

អង្គការនេះ​ បានបញ្ជាក់ថា យោងតាមរូបភាព ដែលថតបានដោយម៉ាស៊ីនថតស្វ័យប្រវត្តិ ដែល ក្រុមការងារបានដាក់នៅលើឆ្នេរខ្សាច់នោះ ​បានបង្ហាញថា​ មានអណ្តើកមេជាច្រើនក្បាល បាន​ឡើងពីស្រះ បង្កាត់ពូជ ​មកកាយខ្សាច់ទម្លាក់ពង នៅវេលាចន្លោះម៉ោង៩យប់ ដល់ពាក់កណ្តលយប់ កាលពីថ្ងៃទី១៦ និង១៨ ខែមករា នេះ។ នេះគឺជាឆ្នាំទី៣ហើយ ដែលអណ្តើកហ្លួងចិញ្ចឹម បានពងនៅក្នុងមជ្ឈមណ្ឌលក្នុង ប្រទេសកម្ពុជា។

ក្រុមការងារ បានរំពឹងថា នឹងរកឃើញពងអណ្តើកហ្លួងនៅក្នុងមជ្ឈមណ្ឌលនេះបន្ថែមទៀត ក្នុង រដូវពងកូនឆ្នាំនេះ ​ដែលចាប់ផ្តើមពីខែមករា​ រហូតដល់ខែមីនា ។ កាលពីឆ្នាំ២០២២ ក្រុមការងារ បានរក ឃើញពងអណ្តើកហ្លួងនៅលើឆ្នេរខ្សាច់ដដែលនេះ ​ចំនួន៩ សម្បុក មានពងសរុប​ចំនួន៨១គ្រាប់ និង ញាស់បាន៣៣កូន។

ការបង្កាត់ពូជអណ្តើកហ្លួងនៅក្នុងមជ្ឈមណ្ឌល ​គឺជាគោលដៅអភិរក្សរបស់អង្គការ ​WCS និងរដ្ឋ បាល​ជលផល សំដៅស្តារចំនួនអណ្តើកប្រភេទនេះ​ ឱ្យមានច្រើននៅក្នុងធម្មជាតិឡើងវិញ ។

បច្ចុប្បន្ន មជ្ឈមណ្ឌលអភិរក្សសត្វល្មូនខេត្តកោះកុង មានអណ្តើកហ្លួងចំនួន១៨៤ក្បាល។ ចាប់ តាំងពីឆ្នាំ២០១៥ ក្រុមការងារ បានលែងអណ្តើកហ្លួងជំទង់ ចំនួន១៤៧ក្បាល ចូលក្នុង​ទីជម្រក​ធម្មជាតិ វិញ។​ អណ្តើកជំទង់ និងស្ទើរជំទង់ នៅក្នុងមជ្ឈមណ្ឌល ត្រូវបានក្រុមការងារចិញ្ចឹម​ថែទាំ​នៅក្នុងស្រះបង្កាត់ ពូជ ចំនួន៤ ចំណែកឯកូនអណ្តើកតូចៗ ​ត្រូវបានដាក់ចិញ្ចឹមនៅក្នុងធុងប្លាស្ទិក មុននឹងផ្ទេរចូលក្នុងស្រះ បង្កាត់ពូជ។

អណ្តើកហ្លួង មានឈ្មោះជាភាសាអង់គ្លេស ថា Southern River Terrapin និងឈ្មោះវិទ្យាសាស្ត្រ ថា Batagur Affinis ។ អណ្តើកប្រភេទនេះ ត្រូវបានកត់ត្រានៅក្នុងបញ្ជីក្រហមរបស់អង្គការ​ IUC ថាជា ប្រភេទជិត​ផុតពូជបំផុត ។​ នៅឆ្នាំ២០០៥ រាជរដ្ឋាភិបាលកម្ពុជា​ បានចេញព្រះរាជក្រឹត្យ ចាត់​ចំណាត់ថ្នាក់ សត្វប្រភេទនេះ ជាសត្វល្មូនជាតិ តំណាងឱ្យព្រះរាជាណាចក្រកម្ពុជា៕