ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងឯកអគ្គរាជទូតថៃ បានឯកភាពគ្នាថា នឹងជំរុញឱ្យគណៈកម្មការព្រំដែនរួម រៀបចំពិនិត្យបង្គោលព្រំដែន និងបោះបង្គោលព្រំដែនរវាង​ប្រទេសទាំង២ឡើងវិញ។

ក្នុងឱកាសអនុញ្ញាតឲ្យឯកឧត្តមបណ្ឌិត ឆឺតគៀតអាត់ថាកន ឯកអគ្គរដ្ឋរាជទូតថៃថ្មី ចូលជួប​សំដែង​ការគួរសមនៅវិមានសន្តិភាព នាព្រឹកថ្ងៃទី២០មករានេះដែរ ​សម្តេចតេជោ ​ប្រមុខរាជរដ្ឋាភិបាល​កម្ពុជា​ និងឯកអគ្គរាជទូត បានឯកភាពគ្នា​ក្នុងការជំរុញឲ្យ​គណៈកម្មការព្រំដែនរួម ដើម្បីរៀបចំ​ពិនិត្យ​បង្គោលព្រំដែន និងបោះបង្គោលព្រំដែនឡើងវិញ ​ព្រមទាំងការដោះមីនចេញ​ពី​ព្រំដែន ​ដើម្បី​សុវត្ថិភាព​របស់​ប្រជាជន​ទាំងសងខាង ​ក្នុងការចេញចូលរកស៊ី ​និងត្រួតពិនិត្យព្រំដែន​នៅ​កន្លែងចាំបាច់​ដើម្បីជំរុញការឆ្លងកាត់របស់​ប្រជាពលរដ្ឋ និងការឆ្លងកាត់ទំនិញជាពិសេស​ដោយ​ចាត់ទុក​ការបើកច្រកព្រំដែនស្ទឹងបត់ គឺត្រូវធ្វើឱ្យ​លឿន ហើយច្រកផ្សេងៗទៀត​ក៏ត្រូវជំរុញបើក​ដោយ​ពុំរង់ចាំ​កាល​កំណត់នោះទេ។

សម្ដេចតេជោ នាយករដ្ឋមន្ត្រី​ក៏​បាន​ថ្លែង​អំណរគុណ​ចំពោះភាគីថៃ ដែលបានជំរុញការវិនិយោគ ការ​បណ្តុះបណ្តាលធនធានមនុស្ស និងអស់​គុណ​ដល់ព្រះអង្គម្ចាស់សុរិនថន ដែលបានផ្ដល់​អាហារូបករណ៍​និង​ការ​ហ្វឹកហ្វឺន​ដល់​មជ្ឈមណ្ឌល​កំពង់ឈើទាល នៅខេត្តកំពង់ធំ និងខេត្តកំពង់ស្ពឺ។ជាមួយគ្នានោះដែរសម្ដេច បានឯកភាពគ្នាជាមួយភាគីថៃ ជំរុញឲ្យក្រសួងយុត្តិធម៌​ពិចារណាបញ្ជូន​អ្នកទោស​ដែល​ស្ម័គ្រ​ចិត្តត្រឡប់​ទៅ​ប្រទេស​របស់​គេវិញដោយ​មិន​រង់ចាំការ​ធ្វើ​បត្យាប័ន និងផ្លាស់ប្ដូរ​អ្នកទោសទៅវិញទៅមកដោយយោងទៅលើការស្ម័គ្រចិត្ត៕អត្ថបទ៖ មុត​ សុទ្ធ