ភ្នំពេញ៖ នៅព្រឹកថ្ងៃទី១៩ ខែមករា ឆ្នាំ២០២៣ រដ្ឋបាលខេត្តព្រះវិហារ ក្រោមការដឹកនាំរបស់ ឯកឧត្តម គីម រិទ្ធី អភិបាល នៃគណៈអភិបាលខេត្ត និងមានការសហការជាមួយ សហភាព សហព័ន្ធយុវជនកម្ពុជាខេត្តព្រះវិហារ ព្រមទាំងមានការចូលពីមន្ទីរជំនាញ និងអាជ្ញាធរទាំង០៨ក្រុង-ស្រុក បានបើកយុទ្ធនាការគោយន្តមានភ្លើង ដើម្បីកាត់បន្ថយគ្រោះថ្នាក់ ចរាចរណ៍ និងចែកភ្លើងបំភ្លឺទៅដល់អាជ្ញាធរទាំង០៨ក្រុង-ស្រុក ក្នុងខេត្តព្រះវិហារ ។ពិធីនេះ​ប្រារព្ធ​ធ្វើឡើងនៅក្នុងបរិវេណសាលាខេត្តព្រះវិហារ។

នាឱកាសនោះឯកឧត្តម គីម រិទ្ធី បានឱ្យដឹងថា យុទ្ធនាការគោយន្តមានភ្លើង ដែល​​បាន​ប្រារព្ធ​ធ្វើ​ឡើង​នាពេលនេះ គឺដើម្បីកាត់បន្ថយគ្រោះថ្នាក់ចរាចរណ៍ដែលបង្កឡើងដោយសារគោយន្ត​ដែល​បើកបរលើដងផ្លូវ ​ដោយគ្មានភ្លើងបំភ្លឺចរាចរណ៍។ យុទ្ធនាការនាពេលនេះ ជាយុទ្ធការ​ផ្សព្វផ្សាយ ​និងអប់រំទៅដល់បងប្អូនដើម្បីចូលរួមអនុវត្តន៍អោយបានគ្រប់ៗគ្នា ដែលមានរយៈពេល៣ខែ ដោយចាប់ផ្ដើមពីថ្ងៃបើកយុទ្ធការនេះតទៅ។ ក្នុងដំណាក់កាលទី២ បើសិនបងប្អូនមិនព្រម​ដាក់ភ្លើងបំភ្លឺ​ចរាចរណ៍នោះទេ​ មន្រ្តីអនុវត្តន៍ចរាចរណ៍ ​ក៏ដូចជា​ អាជ្ញាធរមានសម្ថតកិច្ចធ្វើការ​ឃាត់​គោយន្ត​រក្សាទុកនៅពេលដែលបងប្អូនធ្វើចរាចរណ៍ ​នៅតាមដងផ្លូវ រហូតដល់គោយន្តមានភ្លើងបំភ្លឺ​ចរាចរណ៍ ​ទើបអនុញ្ញាតអោយចរាចរណ៍បាន។

ឯកឧត្តមបន្តថា ក្នុងយុទ្ធការដំណាក់កាលទី១នេះ ​ឯកឧត្តមបានទទួលថវិកា​ ដើម្បីទិញ ភ្លើងបំភ្លឺ​គោយន្តពីការរៃអង្គាសគ្នារបស់សហភាព​ សហព័ន្ធយុវជនកម្ពុជាខេត្តព្រះវិហារ​ ដោយក្នុង១ក្រុង-ស្រុក ​ទទួលបាន១០០គោយន្ត ហើយក្នុង១គោយន្តមានភ្លើងបំភ្លឺចំនួន៤ ​សរុប​អស់ ភ្លើងបំភ្លឺ​ចំនួន២៤០០ភ្លើងអំពូល។

ទន្ទឹមនេះឯកឧត្តម ក៏បានផ្ដាំផ្ញើទៅដល់​ សហភាពសហព័ន្ធយុវជនកម្ពុជា ​ត្រូវសហការ គ្នាជា​មួយអាជ្ញាធរក្រុង-ស្រុក អធិការស្រុក ប៉ុស្តិ៍រដ្ឋបាល ​ដើម្បីធ្វើការបំពាក់ជូនបងប្អូន​ ប្រជាពលរដ្ឋ ដែលពួកគាត់មានគោយន្តបើកបរតាមដងផ្លូវ ​ក៏ដូចជាបងប្អូនមកបំពាក់នៅ ​ទីតាំងណាមួយ ពិសេស​នៅតាមសាលាឃុំសង្កាត់។ ហើយអាជ្ញាធរត្រូវផ្ដល់ របាយការណ៍អំពី សកម្មភាពរបស់ក្រុមការងារ​ស្ដីពីសកម្មភាព ចុះអនុវត្តន៍យុទ្ធការបំពាក់ ​ភ្លើងបំភ្លឺគោយន្តមករដ្ឋ បាលខេត្ត ដើម្បីធ្វើការបូកសរុប​លទ្ធផល។

តាមរបាយការណ៍របស់អាជាធរក្រុង-ស្រុងទាំង៨ ​មានគោយន្តសរុប ២០,០០០គ្រឿង ហើយ​ក្នុងដំណាក់កាលទី២ ​ឯកឧត្តម​នឹងទិញភ្លើងបំភ្លឺបន្ថែមទៀត ​ដើម្បីផ្ដល់ជូនបងប្អូន​ ក្នុង១ក្រុង-ស្រុក នឹងទទួលបាន ១០០០គោយន្ត ៕