ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី ២០ ខែមករា ឆ្នាំ២០២៣នេះ នៅសណ្ឋាគារសុខាភ្នំពេញ បានដឹកនាំកិច្ចប្រជុំផ្សព្វផ្សាយការងារគ្រប់គ្រង​ហត្ថពលកម្មបរទេសនៅក្នុងប្រទេសកម្ពុជា។

ពិធីនេះមានការចូលរួមពីឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ឯកឧត្តមនាយឧត្តមសេនីយ៍អគ្គស្នងការនគរបាលជាតិ, ឯកឧត្តមអគ្គនាយក, ឯកឧត្តម លោកជំទាវអភិបាលរាជធានី ខេត្ត, តំណាងស្ថានទូត ស្ថានតំណាងប្រទេសនានា ប្រចាំកម្ពុជា, តំណាងអង្គការអន្តរជាតិ, អង្គការមិនមែនរដ្ឋាភិបាល, វិស័យឯកជន, តំណាងសហជីពផងដែរ ។

សម្ដេចក្រឡាហោមបានសម្តែងនូវការកោតសរសើរ និងវាយតម្លៃខ្ពស់ចំពោះក្រសួងការងារ​និង​បណ្តុះបណ្តាលវិជ្ជាជីវៈ ក្រសួងស្ថាប័ននានា ​ជាពិសេស​អគ្គនាយកដ្ឋានការងារ ​និងអគ្គនាយកដ្ឋាន​អន្តោប្រវេសន៍ អាជ្ញាធរ កងកម្លាំងមានសមត្ថកិច្ចពាក់ព័ន្ធទាំងអស់ ដែលបានសហការបានល្អ​ក្នុងការ​គ្រប់គ្រងហត្ថពលកម្មបរទេសដោយមានការគាំទ្រការចូលរួមពីកម្មករនិយោជិតបរទេស និង​ម្ចាស់រោងចក្រ សហគ្រាស​ មូលដ្ឋានអាជីវកម្មនានា។

សម្ដេចមានប្រសាសន៍ថា ​រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់ ​សម្តេចអគ្គមហា​សេនា​បតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធានារក្សាបាន​នូវ​សន្តិភាព​ ស្ថេរភាពនយោបាយ​ សន្តិសុខ​ សណ្តាប់ធ្នាប់​សាធារណៈ និង​សុវត្ថិភាព​សង្គម​បាន​យ៉ាងល្អប្រសើរ​ ដែលជាការបង្កលក្ខណៈអំណោយផលដល់ការជំរុញការអភិវឌ្ឍសេដ្ឋកិច្ចសង្គម ការទាក់ទាញការវិនិយោគទាំងនៅក្នុងប្រទេស និងពីបរទេស។

សម្ដេចបញ្ជាក់ថា ក្នុងពេលដែលអាជ្ញាធរ និងកងកម្លាំងមានសមត្ថកិច្ចកម្ពុជា កំពុងជាប់ដៃក្នុងការ​ប្រយុទ្ធ​នឹងជំងឺកូវីដ-១៩ និងការដោះស្រាយវិបត្តិបណ្តាលមកពីជំនន់ទឹកភ្លៀងនារដូវវស្សាកន្លងមក ពួកឧក្រិដ្ឋជននៅក្រៅប្រទេសមួយចំនួន​ បានឆ្លៀតឱកាសប្រព្រឹត្តបទល្មើសបោកបញ្ឆោតតាម​ប្រព័ន្ធ​អនឡាញ ដើម្បីទាក់ទាញជនបរទេសឱ្យប្រព្រឹត្តបទល្មើសល្បែងភ្នាល់អនឡាញខុសច្បាប់ និង​ទាក់ទាញបោកបញ្ឆោតពលករបរទេសឱ្យចូលមកធ្វើការខុសច្បាប់នៅកម្ពុជា ក្រោមរូបភាពផ្តល់​ប្រាក់ឈ្នួលពលកម្មក្នុងតម្លៃខ្ពស់ជាដើម។

សម្ដេចបញ្ជាក់ថា ​ប្រឈមមុខចំពោះសភាពការណ៍នេះ អាជ្ញាធរ ​និងកងកម្លាំងមានសមត្ថកិច្ចកម្ពុជា បានបើកយុទ្ធនាការប្រយុទ្ធប្រឆាំងអំពើជួញដូរមនុស្ស ​ជួញដូរពលកម្ម ​និងអាជីវកម្មផ្លូវភេទ ប្រកប​ដោយតម្លាភាព មានការចូលរួម និងគណនេយ្យភាព ​ដោយបើកចំហរឱ្យសាមីខ្លួន ក្រុមគ្រួសារ ឬអ្នកពាក់ព័ន្ធនានាដែលអះអាងថា បានរងគ្រោះដោយអំពើជួញដូរមនុស្ស ជួញដូរពលកម្ម ដើម្បី​ធ្វើការផ្តល់ព័ត៌មាន ឬប្តឹងតាមប្រព័ន្ធហ្វេសបុករបស់សម្ដេច ឬតាមប្រព័ន្ធទូរស័ព្ទទាន់ហេតុការណ៍​របស់អគ្គស្នងការដ្ឋាននគរបាលជាតិ ​និងប្រព័ន្ធទំនាក់ទំនងនានា​នៃអគ្គនាយកដ្ឋាន​អន្តោប្រវេសន៍​ផងដែរ៕អត្ថបទ៖ វ៉ន ដារ៉ា