ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានឱ្យដឹងថា ចាប់ពីឆ្នាំ២០២២​ មកទល់ពាក់កណ្តាលខែមករា ឆ្នាំ២០២៣នេះ ​កងកម្លាំងមានសមត្ថកិច្ចកម្ពុជា បាន​ទទួលព័ត៌មាន និងពាក្យបណ្តឹងនានាចំនួន ៧០៧ ករណី ​បានស្រាវជ្រាវរកឃើញ ៤៤៥ ករណី ក្នុងនោះ ​មានជនបរទេសចំនួន ១ ០៤៥នាក់ បានឃាត់ខ្លួនជនសង្ស័យប្រព្រឹត្តបទល្មើសនានាចំនួន ១២០នាក់ មាន ៤សញ្ជាតិ ដើម្បីចាត់វិធានការតាមនីតិវិធីច្បាប់ និងបានបិទក្រុមហ៊ុនដែលពាក់ព័ន្ធ​បទ​ល្មើសចំនួន ៥ ក្រុមហ៊ុនព្រមទាំងផ្អាកអាជីវកម្ម ​និងបន្តស្រាវជ្រាវ ៤ ក្រុមហ៊ុន។

សម្ដេចក្រឡាហោម បានមានប្រសាសន៍ថា ក្នុងចំណោមពាក្យបណ្តឹងដែលទទួលបាន អាជ្ញាធរកម្ពុជា​បានបិទសំណុំរឿង ២២៩ ករណី ដោយមូលហេតុរកមិនឃើញទីតាំង និងផ្តល់ព័ត៌មានមិនច្បាស់លាស់។

សម្ដេច បានបន្តថា ឆ្លងតាមប្រតិបត្តិការស្រាវជ្រាវបង្ក្រាបបទល្មើសជួញដូរមនុស្ស កងកម្លាំងមាន​សមត្ថកិច្ចកម្ពុជា បានរកឃើញជនបរទេសមួយចំនួន ​ត្រូវបានមេខ្យល់ ​មេខ្លោងនៅក្រៅប្រទេស​បោកបញ្ឆោតតាមប្រព័ន្ធអនឡាញឱ្យចូលមកធ្វើការខុសច្បាប់ នៅតាមទីតាំងល្បែងភ្នាល់អនឡាញ​ខុសច្បាប់​នានា ដែលភាគច្រើននៅខេត្តព្រះសីហនុ។

បើតាមសម្ដេចក្រឡាហោម ស ខេង ដោយពិនិត្យឃើញភាពស្មុគស្មាញនៃល្បែងភ្នាល់​អនឡាញ​ខុសច្បាប់ និងការប្រើប្រាស់ពលកម្មបរទេសមិនស្របច្បាប់​នៅតាមទីតាំងទាំងនោះ រាជរដ្ឋាភិបាល​បានសម្រេចរៀបចំនូវយន្តការ ២ទៀត ដើម្បីជួយគាំទ្រដល់ប្រតិបត្តិការស្រាវជ្រាវ​បង្ក្រាប​អំពើ​ជួញដូរ​មនុស្សជួញដូរពលកម្ម​ និងអាជីវកម្មផ្លូវភេទ។

ក្នុងនោះបានបង្កើតនូវក្រុមការងារបង្ក្រាបល្បែងស៊ីសងខុសច្បាប់គ្រប់ប្រភេទទូទាំងប្រទេស ដែល​ដឹកនាំដោយ ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងគណៈកម្មការ​អន្តរក្រសួង​ជំរុញនិងត្រួតពិនិត្យការងារអធិការកិច្ចហត្ថពលកម្មបរទេសដែលដឹកនាំដោយ ​ឯកឧត្តម នៅ លក្ខណា ​អនុរដ្ឋលេខាធិការក្រសួងមហាផ្ទៃ។

រាជរដ្ឋាភិបាលកម្ពុជា ​បានឆ្លើយតបជាបន្ទាន់ ​តាមវិធានការបោសសម្អាតបទល្មើសយ៉ាងមាន​ប្រសិទ្ធភាព​នោះគឺ «ផែនការប្រតិបត្តិ ការបង្កើនការបង្ក្រាបអំពើជួញដូរមនុស្សគ្រប់ទម្រង់ និង​បទល្មើសពាក់ព័ន្ធ» តាមសេចក្ដីសម្រេចរបស់ គណៈកម្មាធិការជាតិប្រយុទ្ធប្រឆាំងអំពើជួញដូរ​មនុស្ស (គ.ជ.ប.ជ) និងបង្កើតក្រុមការងារប្រតិបត្តិការដឹកនាំដោយ ​អគ្គស្នងការនគរបាលជាតិ និង​បើកយុទ្ធនាការនៅទូទាំងប្រទេស រុករកបទល្មើស បណ្តាញជនល្មើស ​និងសង្គ្រោះជនរងគ្រោះ នៅ​តាមទីតាំង​ដែលមានការសង្ស័យយ៉ាងសកម្ម៕