​អ៊ុយក្រែន៖ ប្រធានាធិបតី​លោក Volodymyr Zelenskyy បាន​ជំរុញ​ឱ្យ​សម្ព័ន្ធមិត្ត​របស់​អ៊ុយ​ក្រែ​នផ្គត់ផ្គង់​អាវុធ​បន្ថែមទៀត​ដល់ទី​ក្រុង Kyiv ឱ្យបាន​ឆាប់​តាម​ដែល​អាចធ្វើ​ទៅបាន ដោយ​និយាយថា នេះ​នឹង​ជួយ​ធានាបាន​សន្តិសុខ​របស់​អ៊ុយ​ក្រែ​ន និង​អឺរ៉ុប​។​

​លោក Zelenskyy បាន​ថ្លែង​ដូច្នេះ​នៅក្នុង​ទីក្រុង Kyiv ក្នុង​សន្និសីទ​សារព័ត៌មាន​រួមគ្នា​ជាមួយ​ប្រធាន​ក្រុមប្រឹក្សា​អឺរ៉ុប​លោក Charles Michel។ ដើម្បី​ទប់ទល់​រថក្រោះ​រាប់ពាន់​គ្រឿង​របស់​សហព័ន្ធរុស្ស៊ី ភាពក្លាហាន​របស់​ទាហាន​របស់​យើង និង​ការលើកទឹកចិត្ត​របស់​ប្រជាជន​អ៊ុយ​ក្រែ​ន​គឺ​មិន​គ្រប់គ្រាន់​នោះទេ យើង​ត្រូវការ​អាវុធ យើង​ត្រូវការ​ប្រព័ន្ធ​កាំភ្លើង​ធំ​ជាច្រើន ឬ​រថក្រោះ​ឲ្យ​បាន​គ្រប់គ្រាន់​។​ ​លោក Zelenskyy កាលពី​ថ្ងៃ​ព្រហស្បតិ៍បាន​និយាយថា​ លោក​រំពឹង​ថា​នឹងមាន​ការសម្រេច​ចិត្តខ្លាំង​ក្លា នៅពេលដែល​រដ្ឋមន្ត្រី​ការពារជាតិ​ជាច្រើន​នាក់​បាន​ជួបប្រជុំគ្នា​ នៅមូលដ្ឋាន​ទ័ពអាកាស​ក្នុងប្រទេស​អាល្លឺម៉ង់​នៅ​ថ្ងៃ​សុក្រ​នេះ​។ លោក​និយាយថា យើង​កំពុង​រំពឹងថា ​នឹងមាន​កញ្ចប់​ជំនួយ​យោធា​ដ៏​មាន​ឥទ្ធិពល​ពី​សហរដ្ឋអាមេរិក​។

អង្គការ​សន្ធិសញ្ញា​អា​ត្ល​ង់​ទិ​ក​ខាងជើង ​(NATO) និង​មេដឹកនាំ​ការពារជាតិ​មកពី​ប្រទេស​ប្រមាណ ៥០ នឹង​ជួបប្រជុំគ្នានៅ​មូលដ្ឋាន​ទ័ពអាកាសរ៉េ​ម​ស្តេ​ន ​(Ramstein) ដែលជា​កិច្ចប្រជុំ​ចុងក្រោយ​ចាប់តាំងពី​រុស្ស៊ី​បាន​វាយលុក​លើ​អ៊ុយ​ក្រែ​នជិត ១១ខែ​មកនេះ​។ ​យោងតាម​នាយក​ប្រតិបត្តិ​ក្រុមហ៊ុន Roman Shimonov បាន​និយាយ​កាលពី​ថ្ងៃ​ព្រហស្បតិ៍ថា ក្រុមហ៊ុន​ប្រទេស​កាណាដា​មួយដែល​ផ្គត់ផ្គង់​យានយន្ត​ប្រយុទ្ធ​ដល់​ប្រទេស​អ៊ុយ​ក្រែ​ន ​គ្រោង​នឹង​ប្រគល់​រថយន្ត​ចំនួន ២០០គ្រឿង​ដែល​ទីក្រុង Ottawa បាន​សន្យា​ដល់ទី​ក្រុង Kyiv នៅមុន​រដូវក្តៅ៕

អត្ថបទ៖ ប៊ុនថន