ភ្នំពេញ៖ ឯកឧត្តម ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា រយៈពេលមួយសប្តាហ៍ គ.ជ.ប ទទួលបាន៥៣បណ្តឹង ​ពាក់ព័ន្ធនឹងបញ្ហាខុសទិន្នន័យ របស់ពលរដ្ឋក្នុង ​បញ្ជីឈ្មោះបោះឆ្នោតដំបូង។

ឯកឧត្តម ហង្ស ពុទ្ធា អ្នកនាំពាក្យ (គ.ជ.ប) បានប្រាប់BTV នៅថ្ងៃនេះថា បន្ទាប់ពីការបិទផ្សាយ បញ្ជីឈ្មោះបោះឆ្នោតដំបូងបានដំណើរការទៅតាមបណ្តាឃុំ-សង្កាត់នៅទូទាំងប្រទេស គិតមក​ដល់ពេល នេះ មានរយៈពេលមួយសប្តាហ៍ហើយ ​ដែលប្រជាពលរដ្ឋបានទៅពិនិត្យដោយផ្ទាល់ និងតាមប្រព័ន្ធអន ឡាញជាបន្តបន្ទាប់។

ការពិនិត្យបញ្ជីឈ្មោះបោះឆ្នោតដំបូងនេះ សង្កេតឃើញថា​ ប្រជាពលរដ្ឋភាគច្រើន បានពិនិត្យ​តាមប្រព័ន្ធអនឡាញ ដើម្បីកាត់បន្ថយពេលវេលា ​និងការធ្វើដំណើរទៅតាមទីតាំងឃុំ-សង្កាត់ របស់ខ្លួន ។

ឯកឧត្តម បញ្ជាក់ថា រយៈពេលមួសប្តាហ៍នេះ គ.ជ.ប បានទទួលបណ្តឹង​ ចំនួន៥៣បណ្តឹង រួមមាន បណ្តឹងតវ៉ា ៤៩បណ្តឹង និងបណ្តឹងជំទាស់ ​៤បណ្តឹង​ ហើយបណ្តឹងភាគច្រើន ពាក់ព័ន្ធ​នឹង​ការស្នើកែតម្រូវ ទិន្នន័យ ដូចជា​ លេខអត្តសញ្ញាណបណ្ណជាដើម។

ឯកឧត្តម ហង្ស ពុទ្ធា ​បានអំពាវនាវដល់ប្រជាពលរដ្ឋ រួសរាន់ទៅពិនិត្យ​ផ្ទៀងផ្ទាត់​ឈ្មោះ ​និង​ទិន្នន័យ​ផ្សេងៗរបស់ខ្លួនក្នុងបញ្ជីបោះឆ្នោត​ ព្រមទាំងអាចសុំកែតម្រូវ ​តាមរយៈការប្តឹងតវ៉ា​ ឬប្តឹងជំទាស់។

ឯកឧត្តម ​បានបន្ថែមថា ការប្តឹងតវ៉ាលើបញ្ជីឈ្មោះបោតះឆ្នោតដំបូង​ មានរយៈពេល១០ថ្ងៃ ចាប់ពី ថ្ងៃទី១៣ ​ដល់ថ្ងៃទី២៣ ខែមករា ​នេះ ហើយប្រជាពលរដ្ឋរូបណា​ ដែលពិនិត្យឃើញទិន្នន័យ​របស់​ខ្លួនមិន ត្រឹមត្រូវ អាចប្តឹងទៅក្រុមប្រឹក្សាឃុំ-សង្កាត់ ក្នុងមូលដ្ឋានរបស់ខ្លួន។យោងតាមរបាយការណ៍របស់ គ.ជ.ប ដែលបានបង្ហាញកាលពីកន្លងទៅ ​ចំនួនអ្នកចុះឈ្មោះបោះ ឆ្នោតក្នុងបញ្ជីបោះឆ្នោតឆ្នាំ២០២២​ ដែលនឹងត្រូវប្រើសម្រាប់ការបោះឆ្នោត​ជ្រើសតាំង​តំណាងរាស្ត្រ នីតិកាលទី៧ ​នៅថ្ងៃទី២៣ ​ខែកក្កដា ឆ្នាំ២០២៣ ​មានជាង៩លាន៧សែននាក់ ខណៈអ្នកដែល​នឹងត្រូវ​លុប ឈ្មោះចេញពីបញ្ជី ​មានចំនួនជិត២៨ម៉ឺននាក់៕អត្ថបទ៖ សេក ឧត្តម