​អាល្លឺម៉ង់៖ យោងតាម​អ្នកវិភាគ​យោធា និង​ជា​អតីតមន្ត្រី​ក្រសួងការពារជាតិ​អូទ្រីស​លោក Gustav Gressel បាន​និយាយ​កាលពី​ថ្ងៃ​ព្រហស្បតិ៍​ថា ការព្រួយបារម្ភ​ចម្បង​នៃ​សង្គ្រាម​នុយក្លេអ៊ែរ គឺជា​ហេតុផល​ដែល​អធិការបតី​អាល្លឺម៉ង់​លោក Olaf Scholz រហូត​មក​ដល់​ពេលនេះ​បាន​រារាំង​សម្ព័ន្ធមិត្ត​មិន​ឲ្យ​បញ្ជូន​រថក្រោះ Leopard 2 របស់​ខ្លួន​ទៅកាន់​ប្រទេស​អ៊ុយ​ក្រែ​ន​។

ថ្លែង​ទៅកាន់​សារព័ត៌មាន Reuters នៅ​ទីក្រុង​ប៊ែ​រ​ឡាំង លោក Gressel និយាយ​ថា អធិការបតី​ជឿ​ថា វា​ជា​គោលដៅ​សំខាន់​។ លោក​មិន​ដឹង​ថា​ តើ​ការយល់​ឃើញ​បែប​នេះ​កើតឡើង​ដោយ​របៀប​ណា​នោះ​ទេ​។​ ​លោក Gressel ដែល​បម្រើការ​នៅក្នុង​កងកម្លាំងប្រដាប់អាវុធ​ប្រទេស​អូទ្រីស​បាន​និយាយ​ថា លោក Scholz មិនបាន​មើល​ឃើញ​ថា អាល្លឺម៉ង់​ពិតជា​ផ្នែក​មួយ​នៃ​សម្ព័ន្ធ​យោធា​របស់​អង្គការ​ណា​តូ​។ ទីក្រុង​វ៉ាស៊ីនតោន និង​សម្ព័ន្ធមិត្ត​ប្រទេស​លោក​ខាង​លិចនិយាយ​ថា រថក្រោះ Leopards ដែល​ប្រទេស​អាល្លឺម៉ង់​ផលិត​រាប់ពាន់​គ្រឿងក្នុង​អំឡុង​សង្គ្រាមត្រជាក់ និង​នាំ​ចេញទៅ​ប្រទេស​សម្ព័ន្ធមិត្ត​របស់​ខ្លួន​ដែលជា​ជម្រើស​ដ៏​សមស្រប​តែមួយគត់​។​

​ប្រភព​រដ្ឋាភិបាល​អាល្លឺម៉ង់​បាន​និយាយ​ថា ទីក្រុង​ប៊ែ​រ​ឡាំង​នឹង​ដកចេញ​ការជំទាស់​របស់ខ្លួន ​ប្រសិន​បើ​ទីក្រុង​វ៉ាស៊ីន​តោន​បញ្ជូន​រថក្រោះ Abrams របស់​ខ្លួន​។ ប៉ុន្តែ​មន្ត្រី​សហរដ្ឋអាមេរិក​និយាយថា ពួកគេ​មិន​ទាន់​មាន​ផែនការ​បញ្ជូន​រថក្រោះ Abrams នៅឡើយ​។ សម្ព័ន្ធមិត្ត​ជាច្រើន​បាន​ជួប​ប្រជុំគ្នា​នៅក្នុង​សន្និសីទ​មួយ​ ដែល​គាំទ្រ​ប្រទេស​អ៊ុយ​ក្រែ​ន​នៅ​ថ្ងៃ​សុក្រ​នេះ​នៅ​មូលដ្ឋាន Ramstein ជា​មូលដ្ឋាន​កងទ័ពអាកាស​អឺរ៉ុប​ដ៏​សំខាន់៕

អត្ថបទ៖ ប៊ុនថន