កណ្ដាល៖ នៅថ្ងៃទី២០ ខែមករានេះ នៅរោងអ្នកតាចិនក្រុងតាខ្មៅ ខេត្តកណ្តាល បានធ្វើពិធីសែនបើកសែនបើកភ្នែកម៉ុងសាយ យកក្បាលម៉ុងសាយទៅលូតដេញឧបទ្រុពចង្រៃ និងនាំលាភសំណាង នៅក្នុងឱកាស​ប្រារព្ធ​កម្មវិធីបុណ្យចូលឆ្នាំថ្មីប្រពៃណីចិន ​វៀតណាម រយៈពេលបីថ្ងៃ ​ដែលនឹងចាប់ផ្តើមនៅថ្ងៃទី២១​ មករា ស្អែកនេះតទៅ។

លោក ឌុល កូ តំណាងក្រុមម៉ុងសាយ ក្រុងតាខ្មៅ ថ្លែងបា្រប់BTVថា មកដល់ថ្ងៃនេះ ក្រុមម៉ុងសាយ​របស់លោក បានធ្វើការហ្វឹកហាត់ត្រៀមខ្លួនរួចរាល់អស់ហើយ និងបានធ្វើពិធីសែន​បើកភ្នែក​ម៉ុងសាយ យកក្បាលម៉ុងសាយពីអ្នកតាធំនៅក្រុងតាខ្មៅ ​ដើម្បីទៅសំដែងលូតសុំសុខសុំជ័យ ផ្តល់​លាភសំណាងជូនដល់ពលរដ្ឋកាត់សែចិន​ តាមភូមិ តាមផ្ទះ ​តាមហាងអាជីវកម្ម ​និងស្ថាប័ននានា ។

ក្រុមម៉ុងសាយ ​និងអ្នកលក់គ្រឿងសែន ថ្លែងថា​ នៅរោងអ្នកតាចិនក្រុងតាខ្មៅ ក៏ដូចនៅតាមរោង​អ្នកតា​ចិន​នានាទៀត ​មកដល់ថ្ងៃនេះ ​បានត្រៀមខ្លួនរួចរាល់អស់ហើយ ទទួលពលរដ្ឋកាត់សែន​ស្រឡាយចិន ​មកធ្វើពិធីសែនសុំពរជ័យ​ និងធ្វើពិធីកាត់ឆុងនានា​ ក្នុងរយៈពេលបីថ្ងៃ ចាប់ពីថ្ងៃស្អែកនេះទៅ។

លោក ឌុល កូ ថ្លែងថា​ ក្នុងឱកាសបុណ្យចូលឆ្នាំថ្មីប្រពៃណីចិន ​វៀតណាម ក្រុមម៉ុងសាយ​របស់​លោក បានបែងចែកជាង៣ក្រុមធំៗ​ និងមានភាពរវល់ខ្លាំង ​ក្នុងរយៈពេល៤ទៅ៥ថ្ងៃជាប់ៗគ្នា ដោយសារ​មានពលរដ្ឋកាត់សែស្រឡាយចិនតាមផ្ទះ ​និងតាមហាង តាមស្នាក់ការ​ក្រុមហ៊ុន​អាជីវកម្មធំៗ ទាំងនៅក្រុងតាខ្មៅ ​និងនៅរាជធានីភ្នំពេញ គឺគេបានអញ្ជើញក្រុមម៉ុង​សាយ​ទៅសំដែងឡូត ​សុំសេចក្តីសុខចំរើន រកស៊ីមានបាន៕ អត្ថបទ ស៊ុម សុខជា