សៀមរាប៖ ក្រុមសិក្ខាកាមដែលជាមន្រ្ដីជំនាញ ​សកម្មភាពមីន នៃអង្គភាពផ្តល់សេវាកម្មរដ្ឋ​ក្នុងគ្រា​អាសន្ន​នៃប្រទេសអ៊ុយក្រែន បានចុះអនុវត្តផ្ទាល់លើការប្រើប្រាស់សម្ភារៈបច្ចេកទេស​បោស​សម្អាតមីន​ការប្រើប្រាស់ ​ឧបករណ៍រាវមីន នៅក្នុងខេត្តបាត់ដំបង និងបានទៅធ្វើទស្សនកិច្ច​នៅសារមន្ទីរសកម្មភាពមីន ក្នុងខេត្តសៀមរាប ដើម្បីស្វែងយល់បន្ថែមអំពីការតាំងបង្ហាញ​ទាក់ទង​នឹងព្រឹត្តិការណ៍សំខាន់ៗ​ដែលបានកើតឡើងក្នុងប្រទេសកម្ពុជា។

ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុក ​អគ្គនាយកអង្គភាពស៊ីម៉ាក់ បានមាន​ប្រសសាន៍ប្រាប់ BTV ឱ្យដឹងថា នៅថ្ងៃទី២០ ខែមករា ឆ្នាំ២០២៣ ​ក្រុមសិក្ខាកាមអ៊ុយក្រែន បាន​អញ្ជើញទៅទស្សនកិច្ច ​សារមន្ទីរសន្តិភាពសកម្មភាពមីន ​ខេត្តសៀមរាប ដើម្បីស្វែងយល់បន្ថែម​អំពីបញ្ហាគ្រាប់មីនសង្គ្រាម និងការខិតខំរបស់រាជរដ្ឋាភិបាលក្នុងសកម្មភាពកំចាត់មីន ពិសេសការ​លើកកម្ពស់ការកសាងសន្តិភាព​ បន្ទាប់ពីសង្គ្រាមបានបញ្ចប់ជាង ២០ ឆ្នាំមកនេះ។

ឯឧត្ដមបញ្ជាក់ថា អង្គភាពស៊ីម៉ាក់បានហ្វឹកហ្វឺនក្រុមសិក្ខសាកាមអ៊ុយក្រែន ចាប់ពីថ្ងៃទី១៦​ដល់ថ្ងៃទី១៨ ​ខែមករានេះទាក់ទងនឹងបច្ចេកទេសបោសសម្អាតមីន ដោយផ្ដោតលើការប្រើប្រាស់​សម្ភារៈបច្ចេកទេសបោសសម្អាតមីន​ ជាពិសេសឧបករណ៍រាវមីនប្រភេទ ​អាលីស (ALIS) ផលិតនៅប្រទេសជប៉ុន។

កាលពីថ្ងៃទី១៩ ខែមករានេះ ក្រុមសិក្ខាកាមបានទៅទស្សនកិច្ច ចម្ការមីន ស្ថិតនៅក្នុងខេត្តបាត់ដំបង ដើម្បីស្វែងយល់អំពីប្រតិបត្តិការបោសសម្អាតមីនដោយប្រើប្រាស់ ​កម្លាំងដោះមីន ដូចជា កម្លាំងម៉ាស៊ីន កម្លាំងសុនក និងការដោះមីនដោយដៃជាដើម៕អត្ថបទ៖ វ៉ន ដារ៉ា