ភ្នំពេញ: ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរទោចក្រយាន បានស្នើសុំជំនួយបន្ថែមពី សហព័ន្ធកីឡាទោចក្រយានអន្តរជាតិ (UCI) ដូចជា ការបណ្ដុះបណ្ដាល ឧបករណ៍ និងសម្ភារៈសម្រាប់រៀបចំការប្រកួត ក៏ដូចជាសម្ភារៈកីឡាករដូចជាកង់ និងសម្ភារៈផ្សេងៗមួយចំនួនទៀត ដើម្បីបន្តជំរុញការអភិវឌ្ឍន៍កីឡាទោចក្រយាននៅកម្ពុជា ឱ្យរឹតតែរីកចម្រើនបន្ថែមទៀត។

ក្នុងឱកាសដឹកនាំគណៈប្រតិភូកម្ពុជាធ្វើដំណើទស្សនកិច្ចការងារនៅទីស្នាក់ការសហព័ន្ធកីឡាទោចក្រយានអន្តរជាតិ ដើម្បីជួបប្រជុំពិភាក្សាការងារជាមន្ត្រីនៃសហព័ន្ធកីឡាទោចក្រយានអន្តរជាតិ និងធ្វើទស្សនកិច្ចក្នុងមជ្ឈមណ្ឌលហ្វឹកហ្វឺន និងបណ្ដុះបណ្ដាលរបស់សហព័ន្ធ UCI នៅប្រទេសស្វីស កាលពីថ្ងៃទី២០ ខែមករាកន្លងទៅនេះ ឯកឧត្តម ប៉ាន សូរស័ក្ដិ បានជម្រាបជូនពីកិច្ចសហប្រតិបត្តិការ រវាងសហព័ន្ធខ្មែរ និងសហព័ន្ធ នូវការងារមួយចំនួន រួមមាន៖ ការបណ្ដុះបណ្ដាលគ្រូបង្វឹកកម្រិត១ របស់សហព័ន្ធខ្មែរ គម្រោងជំនួយជាសម្ភារៈ មានដូចជាសម្លៀកបំពាក់ និងកង់គួក ព្រមទាំងកង់ភ្នំសម្រាប់កីឡាករហ្វឹកហាត់ និងគម្រោងជំនួយពិសេសសម្រាប់ការផ្សព្វផ្សាយយុទ្ធនាការ “ប្រជាជនម្នាក់ កង់មួយគ្រឿង” ឆ្ពោះទៅកីឡាស៊ីហ្គេមឆ្នាំ២០២៣ ដែលបានធ្វើឡើងនៅខេត្តកែប។

ជាមួយគ្នានេះដែរ ឯកឧត្តមរដ្ឋមន្ត្រីប្រធានសហព័ន្ធ ក៏បានលើកឡើងពីការត្រៀមខ្លួនរបស់កីឡាករទោចក្រយានកម្ពុជា ដើម្បីចូលរួមប្រកួតនៅក្នុងកីឡាស៊ីហ្គេមឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះចាប់ពីថ្ងៃទី៥ ដល់១៧ ខែឧសភា ឆ្នាំ២០២៣ខាងមុខនេះ៕