ភ្នំពេញ៖ ក្នុងពិធីប្រគល់សញ្ញាបត្រជូននិស្សិតជ័យលាភីនៃសាកលវិទ្យាល័យ​ឯកទេសនៃកម្ពុជា (CUS)ជិត៧ពាន់នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វា នាព្រឹកថ្ងៃទី ២៣ ខែមករានេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា នៅថ្ងៃ២៥មករានេះ កម្ពុជានឹងបើកយុទ្ធនាការរាប់ថយក្រោយ១០០ថ្ងៃ នៃការទទួលធ្វើម្ចាស់ផ្ទះ ដើម្បីប្រកួត​ស៊ីហ្គេម​លើកទី៣២។

សម្ដេចបញ្ជាក់ថា ត្រូវធ្វើយុទ្ធនាការនេះឱ្យបានផុសផុលនៅទូទាំងប្រទេស ដែលព្រឹត្តិការណ៍នេះ កម្ពុជាបានរងចាំអស់ជាង ៦០ ឆ្នាំកន្លងមកហើយ។

ជាមួយការអរគុណដល់ជនរួមជាតិព្រះសង្ឃប្រជាពលរដ្ឋ ដែលបានគាំទ្រដល់ការខិតខំ​របស់​រាជរដ្ឋាភិបាល សម្ដេចបន្តថា ឆ្នាំ២០២៣នេះ យើងនឹងធ្វើម្ចាស់ផ្ទះនៃការប្រកួតស៊ីហ្គេមដែលនឹង​មាន​កីឡាករ កីឡាការិនីរាប់ពាន់នាក់ អញ្ជើញមកនៅទីក្រុងភ្នំពេញ​សម្រាប់ការប្រកួតរាប់​ទាំង​សម្រាប់​ស៊ីហ្គេម និងប៉ារ៉ាហ្គេម (កីឡាជនពិការ) គឺយើង​ត្រូវ​ខិតខំ​ធ្វើកិច្ចការងារ​នេះជាមួយ​នឹង​ការទទួលខុសត្រូវរបស់យើង។

សម្តេចបន្តថា យើងមិនគ្រាន់តែជាបញ្ហាសម្រាប់ការយកឈ្នះមេដាយទេគឺធ្វើ​ជាម្ចាស់ផ្ទះឲ្យមានការ​ទទួលខុសត្រូវ ផ្ដល់នូវការសប្បាយរីករាយសម្រាប់ពួកគេទាំងឡាយ​ដែលមកដល់ទឹកដី​នៃព្រះរាជា​ណា​ចក្រកម្ពុជា។ដូច្នេះ​សម្រាប់ថ្ងៃ២៥មករានេះ គឺធ្វើឲ្យមានចលនាជាតិមួយ​សម្រាប់​ការរាប់ថយ​ក្រោយ​ដែលនៅថ្ងៃចុងក្រោយ ព្រះមហាក្សត្រព្រះអង្គនឹងយាងទៅអង្គរវត្តដើម្បីប្រទាន​ភ្លើងកីឡា​ចេញពីអតីតរាជធានីអង្គរតែម្ដង។

សម្ដេចតេជោ បញ្ជាក់ថា សម្រាប់ការប្រកួតស៊ីហ្គេមលើកទី៣២នេះ កម្ពុជាបានត្រៀមថវិកាជាង ១០០ លានដុល្លារអាម៉េរិក លើការរៀបចំការប្រកួតនេះ ខណៈការប្រកួតនេះ គឺជាមុខមាត់ និងកិត្តិយសធំធេងណាស់របស់កម្ពុជា។

សូមបញ្ជាក់ថា ស៊ីហ្គេមលើកទី៣២ដែល កម្ពុជាទទួលធ្វើម្ចាស់ផ្ទះនឹងប្រព្រឹត្តិទៅពីថ្ងៃ៥ ដល់ថ្ងៃ១៧ ខែឧសភាឆ្នាំ២០២៣៕