ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា បានមានប្រសាសន៍ថា សម្ដេចបានឱ្យ​ធ្វើការ​សិក្សាលើការការបណ្ដុះបណ្ដាល ជំនាញវិជ្ជាជីវៈ និងបច្ចេកទេសជូនដល់យុវជននៅ​គ្រួសារ​ក្រីក្រ និងងាយរងហានិភ័យទូទាំងប្រទេសមានប្រមាណ ១,៥ លាននាក់ ដើម្បីផ្ដល់ជូនការសិក្សា​ជំនាញវិជ្ជាជីវៈដោយមិនបង់ថ្លៃ និងទទួលបានប្រាក់​ឧបត្ថម្ភថែមទៀត នាចុងឆ្នាំ២០២៣នេះ ឬនៅដើមឆ្នាំក្រោយ។

សម្ដេចតេជោ បានមានប្រសសន៍បែបនេះ ក្នុងឱកាសអញ្ជើញជាអធិបតី ពិធីប្រគល់សញ្ញាបត្រ​ដល់​និស្សិតសាកលវិទ្យាល័យឯកទេសនៃកម្ពុជា (CUS) ជិត ៧ ០០០ នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ (OCIC) នាព្រឹកថ្ងៃទី២៣ ខែមករា ឆ្នាំ២០២៣នេះ។

សម្ដេចតេជោ ថ្លែងថា សម្ដេចកំពុងតែរៀបចំដាក់ឱ្យមានការសិក្សាលើការបណ្ដុះបណ្ដាល​ជំនាញ​វិជ្ជាជីវៈដល់យុវជននៅក្នុងគ្រួសារក្រីក្រនេះ ​ដោយការការសិក្សានេះ នឹងទៅជាការពិតមួយ​នាចុង​ឆ្នាំនេះ ឬនៅដើមឆ្នាំក្រោយ ដោយសារនៅឆ្នាំ២០២៣នេះ រាជរដ្ឋាភិបាលបានអនុម័ត​គម្រោង​ថវិកាជាតិរួចស្រេចទៅហើយដូច្នេះមិនអាចបញ្ចូលផែនការនេះបានទេ។

សម្ដេចតេជោ បានបញ្ជាក់ថា រាជរដ្ឋាភិបាលនឹងរ៉ាប់រង សម្រាប់សិស្សដែលទទួលបាន​ការសិក្សា​ជំនាញវិជ្ជាជីវៈដែលចេញពីគ្រួសារក្រីក្រ គ្មានលទ្ធភាពរៀននៅមហាវិទ្យាល័យ ដោយយក​ពួកគេទៅ​បណ្ដុះបណ្ដាល ដោយមិនបង់ថ្លៃប៉ុណ្ណោះទេ ប៉ុន្ដែរដ្ឋនឹងមានការឧបត្ថម្ភថវិកាដល់ពួកគេថែមទៀត៕