ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍ថា សម្ដេច​មានមោទកភាព​ដែលបានអនុញ្ញាតឱ្យវិស័យឯកជន បានចូលរួមក្នុងវិស័យអប់រំរបស់​កម្ពុជាលើការ​បណ្ដុះបណ្ដាលធនធនមនុស្សតាំងពីមុនពេលកម្ពុជា ចុះកិច្ចព្រមព្រៀងសន្ដិភាពទីក្រុងប៉ារីស ១៩៩១ ទៅទៀត។

សម្ដេចតេជោ បានមានប្រសសន៍បញ្ជាក់បែបនេះ ក្នុងឱកាសអញ្ជើញជាអធិបតី ពិធីប្រគល់​សញ្ញាបត្រ​ដល់និស្សិតសាកលវិទ្យាល័យឯកទេសនៃកម្ពុជា (CUS) ជិត ៧ ០០០ នាក់ នៅ​មជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ (OCIC) នាព្រឹកថ្ងៃទី២៣ ខែមករា ឆ្នាំ២០២៣នេះ។

សម្តេចតេជោ ហ៊ុន សែន ថ្លែងថា ការផ្ដល់ឱកាសដល់វិស័យឯកជនចូលរួមក្នុងវិស័យអប់រំ គឺបាន​ផ្ដល់ឱកាសដល់គ្រូបង្រៀនឱ្យមានលទ្ធភាពបង្រៀងគួរសម្រាប់សិស្ស ប៉ុន្ដែពេលនោះ​ក៏បាន​ស្នើឱ្យគ្រូលើកលែងដល់សិស្សដែលគ្មានសមត្ថភាពបង់ថ្លៃអាចរៀនគួរផងដែរ ដែលនេះគឺជាផ្នែក​មួយ​នៃការអភិវឌ្ឍវិស័យអប់រំរបស់ប្រទេសកម្ពុជា។

សម្ដេចបញ្ជាក់ថា បើសិនជាកម្ពុជាមិនផ្ដល់ឱកាសដល់វិស័យអប់រំឯកជន ចូលរួមក្នុងការ​បណ្ដុះ​បណ្ដាលធនធានមនុស្សទេ សិស្សដែលបានបញ្ចប់ការសិក្សាមធ្យមសិក្សា (បាក់ឌុប) បច្ចុប្បន្ន ក្នុង ១ ឆ្នាំជិត ១០ ម៉ឺននាក់ តើពួកគេត្រូវទៅបន្តការសិក្សានៅឯណា? ខណៈគ្រឹះស្ថានឧត្ដម​សិក្សារបស់​រដ្ឋអាចទទួលសិស្សបានប្រមាណ ១ ម៉ឺននាក់ប៉ុណ្ណោះ។ ចំណុចនេះ គឺជាចំណុចដែលត្រូវរកវិធី​ដោះស្រាយបញ្ហា ​តាមរយៈការផ្ដល់ឱកាសដល់វិស័យឯកជនទទួលបាននូវ​ការវិនិយោគលើ​វិស័យអប់រំ​នៅកម្ពុជា៕