ភ្នំពេញ៖ គិតមកទល់ពេលនេះគណៈកម្មាធិការជាតិរៀបចំការបោះឆ្នោត (គ.ជ.ប) ទទួលបានបណ្តឹងតវ៉ា ៦៧ ស្របពេលដែលថ្ងៃនេះ គ.ជ.ប នឹងបិទបញ្ចប់ការប្តឹងតវ៉ានៃបញ្ជីឈ្មោះបោះឆ្នោតដំបូង។

ឯកឧត្តម ហង្ស ពុទ្ធា សមាជិក និងអ្នកនាំពាក្យ (គ.ជ.ប) បានឲ្យដឹងថា បន្ទាប់ពីការបិទផ្សាយបញ្ជី​ឈ្មោះ​បោះឆ្នោតដំបូងបានដំណើរការទៅតាមបណ្តាឃុំ-សង្កាត់នៅទូទាំងប្រទេស គិតមកដល់​ពេល​នេះមានរយៈពេល១០ថ្ងៃហើយ​ ដែលប្រជាពលរដ្ឋបានអញ្ជើញពិនិត្យដោយផ្ទាល់ និងតាមប្រព័ន្ធ​អនឡាញ​ជាបន្តបន្ទាប់។

ឯកឧត្តម បន្តថា ការពិនិត្យបញ្ជីឈ្មោះបោះឆ្នោតដំបូងនេះ ​សង្កេតឃើញមាន ​ប្រជាពលរដ្ឋភាគ​ច្រើន​បានពិនិត្យតាមប្រព័ន្ធអនឡាញ ​ដើម្បីកាត់បន្ថយពេលវេលា និងការធ្វើដំណើរទៅតាម​ទីតាំង​ឃុំ-សង្កាត់របស់ខ្លួន។

ជាមួយគ្នានេះ ឯកឧត្តម បញ្ជាក់ថា រយៈពេល១០នេះ គ.ជ.ប បានទទួលបណ្តឹងចំនួន ៦៧បណ្តឹង រួមមាន​ បណ្តឹងតវ៉ា ៦៣បណ្តឹង ​និងបណ្តឹងជំទាស់ ៤បណ្តឹង ហើយបណ្តឹងភាគច្រើនពាក់ព័ន្ធ​នឹង​ការស្នើកែតម្រូវទិន្នន័យ ដូចជា ​លេខអត្តសញ្ញាណបណ្ណជាដើម។

ស្របពេលថ្ងៃនេះជាថ្ងៃចុងក្រោយ ឯកឧត្តម ហង្ស ពុទ្ធា បានអំពាវនាវដល់ប្រជាពលរដ្ឋរួសរាន់​អញ្ជើញ​ទៅពិនិត្យផ្ទៀងផ្ទាត់ឈ្មោះ ​និងទិន្នន័យផ្សេងៗរបស់ខ្លួនក្នុងបញ្ជីបោះឆ្នោត ព្រមទាំងអាចសុំ​កែតម្រូវ តាមរយៈការប្តឹងតវ៉ា ឬប្តឹងជំទាស់ ហើយប្រជាពលរដ្ឋរូបណាដែលពិនិត្យ​ឃើញ​ទិន្នន័យ​របស់ខ្លួនមិនត្រឹមត្រូវអាចប្តឹងទៅក្រុមប្រឹក្សាឃុំ-សង្កាត់ក្នុងមូលដ្ឋានរបស់ខ្លួន​។

យោងតាមរបាយការណ៍របស់ គ.ជ.ប បង្ហាញកាលពីកន្លងទៅ ​ចំនួនអ្នកចុះឈ្មោះបោះឆ្នោត ក្នុង​បញ្ជីបោះឆ្នោតឆ្នាំ២០២២ ដែលនឹងត្រូវប្រើសម្រាប់ការបោះឆ្នោតជ្រើសតាំងតំណាងរាស្ត្រ នីតិកាលទី៧ ​នៅថ្ងៃទី២៣ ខែកក្កដា​ ឆ្នាំ២០២៣ ​មានជាង ​៩លាន៧សែននាក់ ខណៈអ្នកដែលនឹង​ត្រូវ​លុប​ឈ្មោះចេញពីបញ្ជីជិត ២៨ម៉ឺននាក់៕អត្ថបទ៖ សេក ឧត្តម