បន្ទាយមានជ័យ៖ ដោយមានការយកចិត្តទុកដាក់ខ្ពស់ចំពោះសុខទុក្ខមន្ត្រីក្រោមឱវាទកន្លងមក លោក​ឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាល​ច្រកទ្វារព្រំដែនអន្តរជាតិប៉ោយប៉ែត ​តែងតែ​បរិច្ចាគ​ថវិកាផ្ទាល់ខ្លួន​របស់​លោក​ឧបត្ថម្ភ​ដល់​មន្ត្រីជួបការលំបាកគ្រប់ៗគ្នា។

ជាក់ស្ដែងនៅថ្ងៃទី២៣ខែមករា ឆ្នាំ២០២៣ លោក​ឧត្តមសេនីយ៍ត្រី អ៊ី ចំរើន បាន​ចាត់​បញ្ជូន​លោកវរសេនីយ៍ទោ យ៉ូន សាមាន​ និងលោកវរសេនីយ៍ត្រី សឿង សុខេន តំណាងប៉ុស្តិ៍​ចុះសួរសុខទុក្ខលោកស្រីអនុសេនីយ៍ត្រី ញ៉ាន លីដា អត្តលេខ ៩៥៩៦១ ​ឋានៈនាយរងផ្នែក ដែល​បាន​លម្ហែមាតុភាព ​កាលពីថ្ងៃទី០៧ ​ខែមករា ឆ្នាំ២០២៣ ​វេលាម៉ោង ១១:១៥នាទី នៅមន្ទីរ​សម្រាកព្យាបាល​ និងសម្ភព ឃាង សុឃឿន មានទីតាំងស្ថិតនៅផ្លូវជាតិលេខ ៨ ស្រុកស្វាយអន្ទរ ខេត្តព្រៃវែង ​និង​កំពុងសម្រាកព្យាបាលបន្តនៅគេហដ្ឋាន ​ស្ថិតនៅភូមិព្រៃទួលថ្មី ឃុំក្របៅ ស្រុកកំចាយមារ ខេត្តព្រៃវែង ​ដោយមានសុខភាពល្អប្រសើរ ។

ក្នុងឱកាសនោះក្រុមការងារ បាន​នាំយកនូវថវិកាព្រមទាំងគ្រឿង​ឧបភោគបរិភោគ​មួយ​ចំនួន​ដែល​ជាជំនួយឧបត្ថម្ភរបស់លោកឧត្ដមសេនីយ៍ត្រី នាយប៉ុស្តិ៍ ប្រគល់ជូន ដើម្បីជួយសម្រាលនូវការ​លំបាក​ខ្វះខាតក្នុងនោះរួមមាន៖ ថវិកាចំនួន ២,០០០,០០០រៀល ,ទឹកដោះគោឆៅ ១កេសធំ ,ទឹកក្រូច ៥កេស ,ទឹកសុទ្ធ ៥កេស ,ត្រីខ ១កេសធំ ,មី ១កេសធំ ,ទឹកត្រី ៥យួរ ,ទឹកស៊ីអ៊ីវ ៥យួរ។

លោក​ឧត្តមសេនីយ៍ត្រី អ៊ី ចំរើន បានឲ្យដឹងថា ​ការចែករំលែក និងជួយសម្រាលនូវទុក្ខលំបាករបស់​បងប្អូនរួម​ការងារនៅពេលនេះ វាអាចជួយកាត់បន្ថយការខ្វះខាតរបស់បងប្អូន​បានមួយគ្រាផងដែរ បើ​ទោះបី​មានចំនួន​តិចតួច​ក្តី ​គឺជាការរួមចំណែកមួយដ៏​សំខាន់​របស់​អង្គភាពក្នុងការជួយគ្នា​ក្នុង​គ្រាលំបាក៕