​សូម៉ាលី៖ នគរបាល​និយាយថា ក្រុម​អ្នក​ប្រយុទ្ធ​អ៊ីស្លាម​និយម​បាន​បំផ្ទុះ​គ្រាប់បែក​មួយគ្រា​ប់ បន្ទាប់មក​បាន​សម្រុក​ចូល​អគារ​រដ្ឋាភិបាល​ក្នុង​រដ្ឋធានី​របស់​ប្រទេស​សូ​ម៉ាលីកាលពី​ថ្ងៃអាទិត្យ បណ្តាល​ឲ្យ​ជន​ស៊ីវិល​យ៉ាងហោចណាស់​ ៦នាក់​ស្លាប់​។

អ្នកនាំពាក្យ​នគរបាលលោក សា​ឌី​ក អាដេ​ន​ (Sadiq Aden) បាន​និយាយថា អ្នក​វាយប្រហារ​មកពី​ក្រុម al Shabaab បាន​សម្រុកចូល​ទៅក្នុង​ប្លុក​ដែលមាន​ការិយាល័យ​រប​ស់​អភិបាលក្រុង Mogadishu នៅពេល​ថ្ងៃត្រង់ ហើយ​បាន​ប៉ះទង្គិច​ដោយ​ការបាញ់ប្រហារ​ជាមួយ​កងកម្លាំង​សន្តិសុខ​។ លោក Aden និយាយ​ទៅកាន់​អ្នកសារព័ត៌មាន​នៅ​ទីក្រុង Mogadishu ថា កងកម្លាំង​សន្តិសុខ​បានសម្លាប់​អ្នក​វាយប្រហារ​ទាំងអស់ ហើយ​ជន​ស៊ីវិល​ជាច្រើន​ទៀត​បាន​រងរបួស​។ ក្រសួង​ព័ត៌មាន​បាន​និយាយ​នៅលើ​ទំព័រ​ហ្វេ​ស​ប៊ុ​ក​របស់ខ្លួន​ថា សន្តិសុខ​បានសម្លាប់​ក្រុម​សកម្មប្រយុទ្ធ​ ៦នាក់ ហើយ​បាន​បោសសម្អាត​តំបន់​នោះ​នៅ​ម៉ោង​ប្រហែល ៦ល្ងាច​។​

​ក្រុម Al Shabaab បាន​បង្កើន​ការវាយប្រហារ​នៅក្នុង​ការបង្ហាញ​ពី​ភាពខ្លាំង ចាប់តាំងពី​រដ្ឋាភិបាល​របស់​ប្រធានាធិបតី​លោក Hassan Sheikh Mohamud បាន​បើក​ការវាយលុក​ប្រឆាំង​ក្រុម​ដែលមាន​ទំនាក់ទំនង ​ជាមួយ​ក្រុម​អាល់​កៃ​ដា​កាលពី​ខែសីហា​។ ​នាយក​អង្គភាព​សេវា​សង្គ្រោះបន្ទាន់​លោក Aamin បានដាក់​ការប៉ាន់ប្រមាណ​ខ្ពស់ជាង​នេះ​នៃ​ចំនួន​អ្នកស្លាប់ ដោយ​និយាយថា អង្គភាព​បាន​ដឹកជញ្ជូន​សាកសព​ជនរងគ្រោះ​ជា​ជន​ស៊ីវិល​ចំនួន ៨​នាក់ ខណៈ​ក្រសួង​ព័ត៌មាន​បាន​រាយការណ៍​ថា​មាន​អ្នកស្លាប់​ជា​ជន​ស៊ីវិល​ត្រឹមតែ ​៥​នាក់​។ សកម្មភាព​ដែល​បាន​ប្រយុទ្ធ​ប្រឆាំង​ជាមួយ​រដ្ឋាភិបាល​ចាប់តាំងពី​ឆ្នាំ​២០០៦ និង​កំពុង​ស្វែងរក​ការដាក់​ការ​បក​ស្រាយ​អំពី​ច្បាប់​ឥស្លាម តែងតែ​ធ្វើ​សកម្មភាព​បំផ្ទុះ​គ្រាប់បែក និង​វាយប្រហារ​ដោយ​កាំភ្លើង​នៅ​ទូទាំង​ប្រទេស​សូ​ម៉ាលី​៕

អត្ថបទ៖ ប៊ុនថន