កំពង់ឆ្នាំង៖ វគ្គបណ្តុះបណ្តាលកម្រិតបឋមវិជ្ជាជីវៈនគរបាលដល់ សិស្សនាយ នាយរងនគរបាល សម្រាប់​ក្របខណ្ឌថ្មី ត្រូវបានធ្វើឡើងនៅសាលានគរបាលជាតិភូមិភាគ៦ ស្ថិតឃុំជ្រៃបាក់ ស្រុក​រលា​ប្អៀរ ខេត្តកំពង់ឆ្នាំង ។ ពិធីបើកវគ្គបណ្តុះបណ្តាលនេះ ធ្វើឡើងកាលពីថ្ងៃទី២៣ ខែមករា ឆ្នាំ​២០២៣ ក្រោមអធិបតីភាពឯកឧត្តម នាយឧត្តមសេនីយសាស្រ្តាចារ្យ ឯក មនោសែន អនុប្រធាន​បណ្ឌិត​សភា​នគរបាលកម្ពុជា និង ជាប្រធាននាយកដ្ឋានបណ្តុះបណ្តាល នៃក្រសួងមហាផ្ទៃ និង លោក​ឧត្តមសេនីយ៍ទោ តុង អាន នាយកសាលានគរបាលជាតិភូមិភាគ៦ខេត្តកំពង់ឆ្នាំង ។

លោក​ឧត្តមសេនីយ៍ទោ តុង អាន បានឲដឹងថា វគ្គបណ្តុះបណ្តាល ល កម្រិតបឋមវិជ្ជា​ជីវៈ​នគរបាល ជំនាន់ទី១៧ លើកទី១ដែលរៀបចំឡើងនាពេលនេះ មានសិស្សជានាយ នាយរង នគរ​បាល​ជាតិ ចំនួន១៨៥នាក់សិក្សារយៈ៤ខែ សិស្សនគរបាល ដែលឆ្លងវគ្គបណ្តុះបណ្តាលនេះ ក្រោយ​បញ្ចប់ការសិស្សនឹងទទួលបានវិញ្ញាបនបត្រសិក្សា ពេលដែល​បាន​ប្រឡង​ជាប់​ទទួល​ជោគ​ជ័យ​ និង​អនុវត្តតាមនីតិវិធីជាធរមាន។

មានប្រសាសន៍នៅក្នុងឱកាសនោះ នាយឧត្តមសេនីយ៍សាស្រ្តាចារ្យ ឯក មនោសែន បាន​គូស​បញ្ជាក់​ថា ក្រោមការយកចិត្តទុកដាក់ពីថ្នាក់ដឹកនាំក្រសួងមហាផ្ទៃ ជាពិសេស​ក្រោម​កិច្ច​ដឹក​នាំ​របស់​សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បណ្ឌិត្យ​សភា​នគរបាល​កម្ពុជា បានដាក់ចេញនូវ ផែនការយុទ្ធសាស្ត្រ រយៈពេល៥ឆ្នាំ និងកម្មវិធី​កំណែ​ទម្រង់​លើ​ការងារ​សំខាន់ៗរួមមាន ការងារដឹកនាំ គ្រប់គ្រង ការ អភិវឌ្ឍកម្មវិធីអប់រំ ការអភិវឌ្ឍ​សមត្ថភាព​គ្រូ​បង្រៀន ការពង្រឹងវិន័យ និស្សិតសិក្ខាកាម សិស្សនាយនគរបាល និង សិស្សនាយនគរបាលរង ការ​អភិវឌ្ឍធនធានមនុស្ស ការបង្កើតឱ្យមានយន្តការធានាគុណភាពអប់រំផ្ទៃក្នុង ការបង្កើតឱ្យ មាន​វប្បធម៌គុណភាព ការអភិវឌ្ឍន៍ហេដ្ឋារចនាសម្ពន្ធនិងសម្ភារសិក្សា ការ​ពង្រឹង​សមត្ថភាព​ស្រាវ​ជ្រាវ​វិទ្យាសាស្ត្រ នគរបាល និងការពង្រឹងពង្រីកកិច្ចសហការប្រតិបត្តិការជាតិនិងអន្តរជាតិ សំ​ដៅ​លើក​កម្ពស់គុណភាពអប់រំបណ្ដុះបណ្ដាល ព្រមទាំងឆ្លើយតប ទៅនឹង​តម្រូវ​ការ​អង្គភាព​ប្រើ​ប្រាស់​កង​កម្លាំង​នគរបាលជាតិ ស្របតាមទិសដៅរបស់ក្រសួងមហាផ្ទៃ និង​គោល​នយោបាយ​កំណែ​ទម្រង់​កង​កម្លាំងប្រដាប់អាវុធរបស់រាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី ។ ឯកឧត្តម​មាន​ប្រសាសន៍​ផ្តាំ​ផ្ញើដល់​សិស្ស​នគរបាល​ទាំង​អស់​ត្រូវ​យក​ចិត្ត​ទុកដាក់សិក្សារៀនសូត្រ ដោយធ្វើស្វ័យសិក្សាទាំងទ្រឹស្ដី និង ការអនុវត្តជាក់ស្តែង ត្រូវ​មាន​វត្ត​មានគ្រប់ពេលម៉ោងសិក្សា គោរពវិន័យឲ្យបានខ្ជាប់ខ្ជួន និង​ហាម​ដាច់​ខាត​ចំពោះកា​រ​ប្រព្រឹត្ត​នូវ​សកម្មភាពខុសច្បាប់នានា ៕ ហុង វាស្នា