កំពត៖ ក្នុងឱកាសបុណ្យចូលឆ្នាំថ្មីប្រពៃណីជនជាតិចិន នៅថ្ងៃទី២ម្សិលមិញនេះ ភ្ញៀវទេសចរយ៉ាង​ច្រើនកោះករបាននាំគ្នាទៅកម្សាន្ត នៅឆ្នេរខ្សាច់កោះស្មៅ ដែលជា​សមិទ្ធផល​ទេសចរណ៍ថ្មីរបស់​ខេត្តកំពត ​។ មូលហេតុដែលពលរដ្ឋ ​និងទេសចរទៅច្រើនព្រោះឆ្នេរស្អាតគ្មានសំរាម ខ្យល់បរិសុទ្ធ ទេសភាពស្អាតអាចមើលភ្នំ ​និងថ្ងៃលិច​ ម្ហូបអាហារឆ្ងាញ់តម្លៃក៏សមរម្យ។

ប្រជាពលរដ្ឋ និងភ្ញៀវទេសចរ បានប្រាប់ឲ្យដឹងថា ចាប់តាំងពីឆ្នេខ្សាច់កោះស្មៅត្រូវ​បាន​ស្ថាបនា​រួមមក នៅពេលល្ងាច ​ពួកគាត់តែងតែនាំគ្នា ​មកអង្គុយជជែកកម្សាន្ត និងទទួល​ទាន​អាហារ​ជាមួយគ្នានៅទីនេះ។ ដោយឡែកនៅក្នុងឱកាសបុណ្យចូលឆ្នាំចិននេះ ​ឃើញថា ទើបតែថ្ងៃទី​២នេះទេ ​ដែលពលរដ្ឋជាប់ខ្សែស្រឡាយចិន និងភ្ញៀវទេសចរបានធ្វើដំណើរ​មកកម្សាន្តនៅ​ខេត្តកំពតច្រើន ​ជាក់ស្តែងដូចនៅឆ្នេរកោះស្មៅល្ងាចនេះជាដើម។

ពួគគាត់បានបន្តថា ​កាលពីមុនប្រជាពលរដ្ឋ ​និងទេសចរមកលេងខេត្តកំពត នាំគ្នាអង្គុយលេងតែ​នៅ​តំបនសួនច្បារមាត់ព្រែកតែប៉ុណ្ណោះនៅពេលល្ងាច ​ប៉ុន្តែឥឡូវពួកគាត់ចូលចិត្តមក​លេងនៅឆ្នេរ​កោះស្មៅនេះជាង ​ព្រោះទីនេះមានទេសភាពស្អាត ​និងខ្យល់អាកាសបរិសុទ្ធត្រជាក់ ឆ្នេរខ្សាច់​ស្អាតគ្មានសំរាម ​និងមានលក់ម្ហូបអាហារឆ្ងាញ់ៗ រួមនឹងភេសជ្ជៈក្នុងតម្លៃសមរម្យ។

ក្នុងឱកាសនោះដែរ ភ្ញៀវទេសចរក៏បានថ្លែងអំណរគុណដល់ថ្នាក់ដឹកនាំខេត្ត ដែលបានរៀបចំ​កន្លែង​កម្សាន្តស្អាតៗសំបូរបែប ​សម្រាប់ទទួលទេសចរ ​និងបានថ្លែងអំណរគុណដល់​កងកម្លាំង​ចម្រុះដែលខិតខំរក្សាសណ្តាប់ធ្នាប់​ សន្តិសុខទូទាំងខេត្តបានល្អ ។

ប្រធានមន្ទីរទេសចរណ៍លោក សយ ស៊ីណុល បានប្រាប់ឲ្យដឹងថា ​នៅថ្ងៃទី២នៃពិធីបុណ្យចូលឆ្នាំថ្មី​ប្រពៃណីជនជាតិចិន ខេត្តកំពត ​ទទួលបានទេសចរមកកម្សាន្តរង្វង់​៣ម៉ឺននាក់ ហើយស្ថានភាព​ទូទៅនៅតាមរមណីយដ្ឋាន​ និងកន្លែងកម្សាន្តនានា​មានភាពល្អប្រសើរ ​គ្មានអ្វីគួរឲ្យកត់សំគាល់ទេ៕អត្ថបទ៖ អន សារឹម