ភ្នំពេញ៖ នាយកដ្ឋានប្រកាសទ្រព្យសម្បត្តិ និងបំណុល បានឱ្យដឹងថា គិតត្រឹមព្រឹកថ្ងៃទី២៣ ខែមករា ឆ្នាំ២០២៣ឯកសារប្រកាសទ្រព្យសម្បត្តិ និងបំណុល របស់ខេត្តព្រៃវែង បានមកប្រកាសបញ្ចប់ ១០០ ភាគរយរួច រាល់អស់ហើយ។ នេះបើតាមអង្គភាពប្រឆាំងអំពើពុករលួយ ហៅកាត់ ACU បានផ្សព្វផ្សាយឱ្យដឹងនៅ ថ្ងៃទី២៣ ខែមករា។

ប្រភពដដែលឱ្យដឹងទៀតថា ចាប់ពីម៉ោង ៨ព្រឹក ដល់ ម៉ោង១២ ថ្ងៃត្រង់នៃថ្ងៃទី២៣ ខែមករា ឆ្នាំ២០ ២៣ នាយកដ្ឋានប្រកាសទ្រព្យសម្បត្តិ និងបំណុល បានទទួលឯកសារពីអ្នកជាប់កាតព្វកិច្ចត្រូវប្រកាសទ្រព្យសម្បត្តិ និងបំណុល បានចំនួន ១០៣ រូបបន្ថែម ដែលធ្វើឱ្យឯកសារប្រកាសទ្រព្យសម្បត្តិ និងបំណុល បានកើនទៅដល់ចំនួន ២១៧៨៣ រូប ស្មើនឹង ៩៥.២៧ ភាគរយ នៃចំនួនត្រូវប្រកាសសរុប ២២៨៦៤ រូប៕ ដោយ៖ គង់ ឌិន