ភ្នំពេញ៖ គោលនយោបាយជាតិស្តីពីស្វាយចន្ទីរាជរដ្ឋាភិបាល នឹងជំរុញអភិវឌ្ឍន៍ផលិតកម្ម ជាពិសេសជួយលើកកម្ពស់ដល់ប្រជាពលរដ្ឋអ្នកដាំដុះ ការកែច្នៃ ការធានានូវនិរន្តរភាព នៃទីផ្សារស្វាយចន្ទីឱ្យមានលក្ខណៈប្រកួតប្រជែង ប្រកបដោយបរិយាបន្ន។

​ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្ម លើកឡើងថា ការបង្កើតគោលនយោបាយជាតិ ស្តីពីស្វាយចន្ទីរបស់រាជរដ្ឋាភិបាល គឺដើម្បីលើកកម្ពស់ការដាំដុះឲ្យទទួលបានទិន្នផលខ្ពស់ ការជំរុញកែច្នៃដើម្បីទទួលបានតម្លៃបន្ថែម ខណៈដែលកន្លងមកនេះ ការកែច្នៃគ្រាប់ស្វាយចន្ទីនៅក្នុងស្រុក បានក្នុងរង្វង់ប្រមាណ ៥ ភាគរយប៉ុណ្ណោះ។

យោងតាមគោលនយោបាយជាតិ ដល់ឆ្នាំ ២០២៧ គឺធ្វើយ៉ាងណាកែច្នៃផលិតផលស្វាយចន្ទីក្នុងស្រុកឲ្យបាន ២៥ ភាគរយ និងជំរុញការនាំចេញឲ្យបានច្រើន ដោយក្នុងនោះក្រសួងស្ថាប័នពាក់ព័ន្ធ គឺត្រូវជំរុញគោលនយោបាយនេះឲ្យបានសម្រេច។

ឯកឧត្តម រំពឹងថា នៅពេលគោលនយោបាយជាតិ ស្តីពីស្វាយចន្ទី ដាក់ឲ្យអនុវត្តជាផ្លូវការ ការដាំដុះស្វាយចន្ទីមានកាន់តែច្រើន ប្រជាពលរដ្ឋទទួលបានកម្រៃសមរម្យ ជាពិសេសសេដ្ឋកិច្ចជាក៏រីកចម្រើនផងដែរ។

សេចក្តីព្រាងគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ ដំណាំស្វាយចន្ទី គឺជាដំណាំកសិឧស្សាហកម្មដ៏មានសក្តានុពល និងជាដំណាំអាទិភាពមួយក្នុងចំណោមដំណាំអាទិភាពទាំង១២មុខ ដែលរាជរដ្ឋាភិបាល កំពុងផ្តោតការយកចិត្តទុកដាក់លើការបង្កើនផលិតភាព និងការប្រកួតប្រជែង តាមរយៈការធ្វើពិពិធកម្មសេដ្ឋកិច្ចក្នុងសកម្ម ភាពដែលមានតម្លៃខ្ពស់។

សេចក្តីព្រាងគោលនយោបាយនេះ មានចក្ខុវិស័យអភិវឌ្ឍផលិតកម្ម ការកែច្នៃ និងទីផ្សារស្វាយចន្ទី ឱ្យមានលក្ខណៈប្រកួតប្រជែងប្រកបដោយបរិយាបន្ន ធានានូវនិរន្តរភាព និងការធ្វើពិពិធកម្មសេដ្ឋកិច្ច ក្នុងគោលបំណងប្រែក្លាយព្រះរាជាណាចក្រកម្ពុជា ឱ្យទៅជាប្រទេសផលិតនិងផ្គត់ផ្គង់ផលិតផលស្វាយចន្ទីដ៏សំខាន់មួយ សម្រាប់បម្រើដល់ទីផ្សារក្នុងស្រុក តំបន់ និងពិភពលោក៕ អត្ថបទ ៖ សុន រ៉ាឌី