​បាល់ទាត់៖ ​ប្រធាន​ក្លិប Real Madrid លោក Florentino Perez បានអោយដឹងថា European Super League មិនទាន់ចប់​ទេ ​គ្រាន់តែ​ផ្អាក​សិន​ប៉ុណ្ណោះ ទោះបី​ក្លិប​ចំនួន ៩ បាន​ដកខ្លួន​ក៏ដោយ​។

​​បន្ទាប់ពី​ការប្រកាស​នៃ​ការបង្កើតពាន European Super League នេះ​ឡើង​កាលពី​ថ្ងៃអាទិត្យ ការរិះគន់​យ៉ាង​ចាស់ដៃ​ពី​មជ្ឈដ្ឋាន​ទូទៅ បូករួម​ទាំង​នាយករដ្ឋមន្ត្រី​អង់គ្លេស​លោក Boris Johnson ផង​ដែរនោះ​ធ្វើអោយ​ក្លិប​ធំៗ​អង់គ្លេសទាំង ៦ ដែលជា​សមាជិក​បានប្រកាស​ដកខ្លួន​វិញ​។ ​ក្រោយមក​ក្លិប​អេ​ស្ប៉ា​ញ Atletico Madrid, ក្លិប​អ៊ីតាលី AC Milan និង Inter Milan ក៏​បានចេញ​សេចក្តី​ថ្លែង​ការណ៍ជា​ផ្លូវការ​ពី​ការដកខ្លួន​វិញ​។ ​មកដល់ពេលនេះ​នៅសល់តែ Real Madrid, Barcelona និង Juventus ប៉ុណ្ណោះ​ដែល​មិនទាន់​ដកខ្លួន ​ទោះបី​ប្រធាន​ក្លិប Juventus លោក Andrea Agnelli ​បាន​និយាយថា ​គំរោង​នេះ​មិនអាច​ទៅរួច​ក៏ដោយ​។ ក្នុង​កិច្ចសម្ភាសន៍​មួយ​ជាមួយ​វិទ្យុ​អេ​ស្ប៉ា​ញ El Larguero ​លោក Florentino Perez ដែលជា​ប្រធាន ESL នេះ​បាន​និយាយថា អ្វី​មិនទាន់​បញ្ចប់​នៅឡើយ​ទេ​។ ក្លិប​ដែល​ដកខ្លួន​ទាំងនោះ​មិនអាច​ចាកចេញ​បែបនេះ​ទេ ពួកគេ​សុទ្ធតែ​បាន​ចងដោយ​កិច្ចសន្យា​ទាំងអស់​។

​​លោក Perez ដែល​ធ្លាប់​និយាយថា​ ការបង្កើតពាន Super League នេះ​ឡើង​ដើម្បី​​សង្គ្រោះ​បាល់ទាត់​នោះបាន​និយាយទៀតថា អ្វីៗ​ហាក​ក្រឡាប់ចាក់​លឿន​បែបនេះ ​ប្រហែលជា​ពួកយើង​ពន្យល់​មិន​ច្បាស់លាស់ តែ​ពួកគេ (UEFA) ក៏​មិនបាន​ផ្តល់ឱកាស​អោយ​ពួកយើង​ពន្យល់​ដែរ​។ ​បុរស​វ័យ ៧៤ឆ្នាំ​រូបនេះ​បាន​និយាយថា ដោយសារតែ​វិបត្តិ​នៃ​មេរោគ​រាតត្បាត ​បានធ្វើអោយ​ក្លិប​ធំៗ​ខាត​សម្បើម​ណាស់​ក្នុង​មួយឆ្នាំៗ ដែល​វា​ជា​មូលហេតុ​ចំបង​ក្នុងការ​បង្កើតពាន​នេះ​ឡើង​៕

​អត្ថបទ​៖​នាង សុភា​វុ​ធ