បាត់ដំបង៖ អភិបាលខេត្តបាត់ដំបងឯកឧត្ដម សុខ លូ បានអះអាងថា រដ្ឋបាលខេត្តបាត់ដំបង មានគម្រោងកសាងហេដ្ឋារចនាសម្ព័ន្ធជាច្រើនបន្ថែមទៀត ដូចជាផ្លូវលំហែកាយ ផ្លូវជិះកង់ នៅ​តាមបណ្តោយស្ទឹងសង្កែ និងវិថីផ្សេងៗទៀត ដើម្បីធ្វើឱ្យក្រុងបាត់ដំបង ដែលស្ថិតក្នុងភូមិភាគពាយព្យមួយនេះ ក្លាយជាក្រុងឆ្លាតវៃ ទៅពេលអនាគត ។

នៅក្នុងសន្និសីទសារព័ត៌មានស្តីពី «ភាពជោគជ័យក្នុងរយៈពេល៥ឆ្នាំកន្លងមក​ របស់រដ្ឋបាលខេត្តបាត់ដំបង» ​ដែលបានធ្វើឡើងនៅទីស្ដីការគណៈរដ្ឋមន្ត្រី ​នៅថ្ងៃទី២៤ ខែមករា នេះ ឯកឧត្ដម សុខ លូ បានបញ្ជាក់ថា គម្រោង ដែលរដ្ឋបាលខេត្តនឹងធ្វើឲ្យទីក្រុងបាត់ដំបងក្លាយ ទៅជាក្រុងឆ្លាតវៃ គឺដើម្បីជាការ​ទាក់ទាញភ្ញៀវទេសចរជាតិ និងអន្តរជាតិ ឱ្យចូលមកកម្សាន្ត​ក្នុង​ខេត្តនេះកាន់តែច្រើនបន្ថែមទៀត ដែលខេត្តនេះ ​មានសក្តានុពលទេសចរណ៍ច្រើន ទាំងផ្នែកវប្បធម៌ ប្រវត្តិសាស្ត្រ និងតំបន់ទេសចរណ៍ធម្មជាតិ។

ឯកឧត្ដម បានអះអាងផងដែរថា នាពេលបច្ចុប្បន្ននេះ រដ្ឋបាលក្រុងបាត់ដំបង កំពុងខិតខំយ៉ាង ខ្លាំង​ក្នុងការរៀបចំធ្វើប្រព័ន្ធលូរំដោះទឹកកខ្វក់​ និងទឹកភ្លៀង ​នៅក្រោមដី ​ទាំងខាងកើតស្ទឹង និងខាងលិច ស្ទឹង។ មួយវិញទៀតខេត្តបាត់ដំបង បាននឹងកំពុងសាងសង់ផ្លូវទៅកាន់ខេត្តកោះកុង និង​ខេត្តសៀមរាប ផងដែរ ដើម្បីផ្តល់ភាពងាយស្រួល ​និងឆាប់រហ័សដល់ការធ្វើដំណើរ​បស់ភ្ញៀវជាតិ និងអន្តរជាតិ ដោយផ្លូវកាត់ទាំងនេះ នឹងហើយជាស្ថាពរនៅក្នុងឆ្នាំ២០២៤ ។

ឯកឧត្ដម សុខ លូ អភិបាលខេត្តបាត់ដំបង ​ក៏បានរំពឹងយ៉ាងមុតមាំផងដែរថា ប្រជាជនខេត្តនេះ នឹង​មានសេដ្ឋកិច្ចរីកលូតលាស់កាន់តែខ្លាំងថែមទៀត ​ក្រោយពេលដែលរាជរដ្ឋាភិបាល ធ្វើផ្លូវថ្នល់​សំខាន់ៗ ទៅកាន់ខេត្តនានា, ​ពង្រីកព្រលានយន្តហោះវាលបែកចាន, ផ្លូវរថភ្លើងល្បឿនលឿន និង​ធ្វើប្រព័ន្ធធារាសាស្រ្តធំៗបន្ថែមទៀតផងដែរ ៕អត្ថបទ៖ បាន ចក់