ភ្នំពេញ៖ កម្លាំងគណៈបញ្ជាការឯកភាពខណ្ឌដូនពេញ បានបន្តចុះស្ដារប្រព័ន្ធលូដែលមានការកក​ស្ទះមាត់លូធ្វើឲ្យស្ទះទឹកលេងហូរបង្កជាជនលិចដល់ភូមិផ្ទះរបស់បងប្អូនពលរដ្ឋ ពេលមានភ្លៀងធ្លាក់ម្ដងៗ។

ជាក់ស្ដែងនៅព្រឹកថ្ងៃទី២៤ ខែមករា ឆ្នាំ២០២៣នេះ ដោយមានការណែនាំនិងយកចិត្តទុកដាក់ពី ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ ​ដូច្នេះលោក ជា ខេមា អភិបាលខណ្ឌដូនពេញ ​ដឹកនាំកម្លាំងសណ្ដាប់ធ្នាប់ ​និងសាធារណៈការ ​បរិស្ថាន អនាម័យ ខណ្ឌ ចុះធ្វើការស្ដារប្រព័ន្ធលូ ​តាមបណ្ដោយផ្លូវលេខR2 កែងផ្លូវលេខ៧០ ដែលមានប្រវែងជាង ១គីឡូម៉ែត្រ ភូមិ២០ និងភូមិ២៤ មូលដ្ឋានសង្កាត់ស្រះចក ខណ្ឌដូនពេញ រាជធានីភ្នំពេញ។

លោក ជា ខេមា អភិបាលខណ្ឌដូនពេញ បានឲ្យដឹងថា​ កន្លងមកនៅតាមផ្លូវលេខR2 កែងផ្លូវលេខ​៧០នេះ ដែលមានប្រវែង ១២២៧ម៉ែត្រ មានការជនលិចទឹកដល់ភូមិផ្ទះរបស់​ប្រជាពលរដ្ឋរស់នៅ​អមសងខាងផ្លូវ ​ពេលមានភ្លៀងធ្លាក់ម្ដងៗ។

ដូច្នេះពលរដ្ឋមានការសំណូមពរមកអាជ្ញាធរ​ខណ្ឌពេលនោះអាជ្ញាធរខណ្ឌ បាន​ចុះត្រួតពិនិត្យមើល​ដោយ​នៅតាមបណ្ដោយផ្លូវនេះមានប្រព័ន្ធលូ​ត្រឹមត្រូវ ​ដោយ​មុខកាត់​មួយ​ម៉ែត្រ២តឹក ​ទៅមួយ​ម៉ែត្រ ៥តឹក។ ​បន្ទាប់មកមន្ត្រីជំនាញ បានបន្តត្រួតពិនិត្យឃើញថា ​នៅមាត់លូ នីមួយៗតាម​បណ្ដោយ​ផ្លូវនេះ​គឺមានការកកស្ទះទៅដោយសំរាម​ សំបកកំប៉ុង​ ថង់ប្លាស្ទិក ដី.ជាដើម បង្កជាការកកស្ទះប្រព័ន្ធទឹកលែងហូរ។

លោកអភិបាល បានបន្តទៀតថា​ ធ្វើលើកនេះគឺធ្វើឲ្យស្អាត ធ្វើឲ្យអស់ ​ធ្វើឲ្យលែងមាន​ការកក់ស្ទះ​បន្តទៀត ​ដូច្នេះកម្លាំង​បរិស្ថានអនាម័យខណ្ឌ​បានចុះស្ដារអណ្ដូង​លូ​ ក្នុងមួយទីតាំងបានជាង៦០ បេ តូច ​ដូចឃើញ​ជាក់ស្ដែងស្រាប់។ រួចកម្លាំង​ និងបន្តចុះស្ដារតាមប្រព័ន្ធលូ​ បណ្ដោយផ្លូវលេខ៧០ ប្រវែងជាង១​គីឡូម៉ែត្រ ​បន្តទៀតធ្វើយ៉ាងឲ្យអស់ស្អាតកុំធ្វើកិច្ចការនេះដដែលៗ បើធ្វើដដែលៗ​នាំឲ្យខាតបង់ថវិកា ​និងពេលវេលាព្រោះ ​អាជ្ញាធរមូលដ្ឋានមានកិច្ចការច្រើនណាស់ដែលត្រូវ​ធ្វើ​ដើម្បី​បម្រើប្រជាពលរដ្ឋមូលដ្ឋាន។

ជាចុងក្រោយ ​លោកអភិបាលខណ្ឌដូនពេញ បានឆ្លៀតសួរសុខទុក្ខបងប្អូន​ពលរដ្ឋរស់នៅអមសង​ខាងផ្លូវលេខR2 ​កែងផ្លូវលេខ៧០នេះ ​និងបានណែនាំដល់អាជ្ញាធរមូលដ្ឋាន​សង្កាត់ស្រះចក ផង​ដែរថា ​ត្រូវយកចិត្តទុកដាក់បម្រើសេវាសាធារណៈជូន​ដល់ពលរដ្ឋឲ្យបានទាន់ពេលវេលា ​នូវ​ឯកសារផ្សេងៗ ​មិនត្រូវទុកចោល​ព្រងើយនោះឡើយ។សូមសំណូមពរដល់ពលរដ្ឋទាំងអស់​ជួយថែរក្សាអនាម័យ​ បរិស្ថាន កុំយកសំរាមទុកចោល​នៅ​លើមាត់លូ ​ត្រូវវិចខ្ចប់ឲ្យបានបានត្រឹមត្រូវ ​សំរាមត្រូវចេញតាមពេលកំណត់របស់ក្រុមហ៊ុន ចៀសវាង​ការចេញសំរាមក្រៅម៉ោង​ ដែលអាចបង្កការកកស្ទះដល់មាត់លូពេលមេឃភ្លៀង។

លោក អភិបាលសង្ឃឹម​យ៉ាងមុតមាំថា ​ប្រជាពលរដ្ឋនៅក្នុងមូលដ្ឋានខណ្ឌ ​សង្កាត់ទាំង១១ នឹង​បន្តសហការចូលរួមដើម្បីមូលដ្ឋានយើងទាំងអស់គ្នា៕អត្ថបទ៖ កុម្ភៈ