សៀមរាប៖ គិតក្នុងរយៈពេល ៣ថ្ងៃកន្លងមកនេះ ក្នុងអំឡុងពិធីបុណ្យចូលឆ្នាំចិន ឆ្នាំ២០២៣នេះ ទូកទេសចរណ៍នៅរាជធានីភ្នំពេញ បានទាក់ទាញភ្ញៀវទេសចរណ៍ជាតិ ​និងអន្តរជាតិចំនួនប្រមាណ ១ពាន់នាក់ ​មកជិះទូកកម្សាន្ត ​ដើម្បីមើលថ្ងៃរៀបលិច ​ក៏ដូចជាសម្រាកលំហែរកាយតាមខ្យល់​អាកាស​បរិសុទ្ធ​នៅតាមដងទន្លេមេគង្គ ​និងទន្លេចតុមុខ។

លោក ប៉ាង វណ្ណៈ តំណាងក្រុមហ៊ុនទូកទេសចរណ៍ ក្រូខូលដាល (Crocodile) លើកឡើង កាល​ពីរសៀលថ្ងៃទី២៣ មករា ឆ្នាំ២០២៣នេះ​ ក្នុងបុណ្យចូលឆ្នាំចិននេះ គឺមានចំនួនទេសចរច្រើន​ជា​ប្រមាណ៥០% ធៀបនឹងថ្ងៃធម្មតា ​ដែល​បាន​អញ្ជើញ​ជិះទូកកម្សាន្ត ក្នុងគោលបំណង​ដើម្បីមើលថ្ងៃរៀបលិច លំហែកាយ ​ក៏ដូចជាទស្សនាមើលព្រះបរមរាជវាំង ​និងដងទន្លេសាប ដងទន្លេបាសាក់។

លោកបានឲ្យដឹងទៀតថា ពាក់ព័ន្ធតម្លៃសំបុត្រ រវាងថ្ងៃធម្មតា ចុងសប្តាហ៍ ឬក្នុងឱកាសបុណ្យទាន ឬក៏បុណ្យជាតិធំៗ​ មិនមានការតម្លើងថ្លៃនោះទេ ​ដែលក្នុងម្នាក់ៗ ​ចំពោះភ្ញៀវជាតិតម្លៃ​ ៥ពាន់រៀល និងភ្ញៀវអន្តរជាតិតម្លៃ ​២ម៉ឺនរៀល។

ពលរដ្ឋរស់នៅរាជធានីភ្នំពេញ លោក ហ៊ាម ស៊ុននីកា បាននិយាយថា ​ដោយសារជាប់រវល់ការងារ និង​មិនមានគម្រោងទៅទីណាផងនោះ ​នៅក្នុងឱកាសបុណ្យចូលឆ្នាំចិននេះ​ រូបលោក រួមទាំង​ក្រុមគ្រួសារ បាននាំគ្នាមកជិះទូកលេងកម្សាន្តដើម្បីគយគន់ទេសភាព ក៏ដូចសម្រាក​លំហែអារម្មណ៍​តាមដងទន្លេ ​បន្ទាប់ពីខកខានមួយរយៈពេលធំ ​ដោយសារវិបត្តិសាកលកូវីដ១៩។

ជាការកត់សម្គាល់ ​ភ្ញៀវទេសចរណ៍​អញ្ជើញ​ជិះទូកកម្សាន្ត ​ដើម្បីមើលថ្ងៃរៀបលិច និងដើម្បី​សម្រាក​លំហែរកាយតាមខ្យល់អាកាសបរិសុទ្ធនៅតាមដងទន្លេមេគង្គ ​និងទន្លេចតុមុខ នៅរាជធានី​ភ្នំពេញនេះ ភាគច្រើនចាប់ពីម៉ោង៤រសៀល ​រហូតដល់ត្រឹមម៉ោង៩យប់។

ការជិះទូកកម្សាន្តនៅលើទន្លេចតុមុខ​ ក្លាយជាទិសដៅទេសចរណ៍​ទាក់ទាញមួយ ក្នុងចំណោម​ទិសដៅ​ទេសចរណ៍ដទៃទៀត ​នៅរាជធានីភ្នំពេញ​ ដែលភ្ញៀវទេសចរទាំងជាតិ ​និងអន្តរជាតិ និយម​ជិះកម្សាន្តនៅពេលរសៀល ​និងពេលយប់៕ អត្ថបទ៖ ឈិត បូរ៉ាវី