ភ្នំពេញ៖ នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ បានក្រើនរំលឹក និងណែនាំ មន្ត្រីថ្នាក់ដឹកនាំនគរបាល នៅតាមអង្គភាពនីមួយៗ ត្រូវពង្រឹងតួនាទីភារកិច្ចរបស់ខ្លួន ហើយត្រូវធ្វើខ្លួនជាគំ រូល្អដល់មន្ត្រីក្រោមឱវាទ ។

ក្នុងពិធីផ្ទេរ និងប្រកាសតែងតាំងចូលកាន់មុខដំណែង នៃមន្ត្រីអគ្គស្នងការនគរបាលជាតិ នៅ រសៀលថ្ងៃទី២៣ ខែមករា នេះ នាយឧត្តមសេនីយ៍សន្តិបណ្ឌិត នេត សាវឿន បានធ្វើការណែនាំ​ដល់ថ្នាក់ ដឹកនាំនគរបាលតាមអង្គភាព ត្រូវយកចិត្តទុកដាក់ដឹកនាំកងកម្លាំងដោយប្រកាន់ខ្ជាប់​នូវ​គុណធម៌ មានតម្លាភាពគណនេយ្យភាពចំពោះកងកម្លាំង​ ចេះសណ្ដោសប្រណី អប់រំ ថែរក្សាសុខភាព ​ហើយត្រូវមាន ​ភាពច្បាស់លាស់ និងម៉ឺងម៉ាត់ ។

អគ្គស្នងការនគរបាលជាតិ បានបន្តថា​ ថ្នាក់ដឹកនាំនគរបាល ត្រូវចៀសវាងការធ្វើអំពើមិនគប្បី ពាក់ព័ន្ធ​នឹងភាពមិនប្រក្រតី ជាពិសេសមិនត្រូវកិបកេងនូវប្រាក់ ឬជំនួយ ដែលជារបបរបស់​កង​កម្លាំង ដែលនេះជាបំរាមដាច់ខាត​ មិនត្រូវកើតមានឡើងនោះទេ ។

នាយឧត្តមសេនីយ៍សន្តិបណ្ឌិត​ បានបន្ថែមថា ត្រូវខិតខំរក្សាអង្គភាព ​លើកកម្ពស់ស្មារតីសាមគ្គីភាព ត្រូវ​កសាងសាមគ្គីភាពផ្ទៃទាំងខាងក្នុងផង ​និងខាងក្រៅផង ​ហើយត្រូវធ្វើជាគំរូដ៏ល្អ ទើបអាចប្រមូល បាននូវបេះដូងរបស់កងកម្លាំង ។

ឧត្តមសេនីយ៍ឯក លាង ភារម្យ ប្រធាននាយកដ្ឋានកណ្ដាលនគរបាលព្រំដែន ​បានឡើងប្ដេជ្ញាថា នឹង​ខិតខំការពារព្រះមហាក្សត្រ​ ការពាររដ្ឋធម្មនុញ្ញ ​ការពាររាជរដ្ឋាភិបាលស្របច្បាប់ បម្រើ​ប្រជាពលរដ្ឋ ​និងបូរណភាពទឹកដី ។​ ប្ដេជ្ញាគោរពនូវតួនាទីភារកិច្ច​ ឲ្យបានខ្ជាប់ខ្ជួន ខិតខំ​ថែរក្សា​នូវសាមគ្គីភាពផ្ទៃក្នុង​ ក្នុងនាមជាគ្រួសាររបស់កងកម្លាំង​នគរបាលជាតិ ​និងបន្តខិតខំបម្រើការងារ ក្នុងតួនាទីថ្មីនេះ ៕អត្ថបទ៖ បាន សុខរិទ្ធិ