អាហ្វហ្គានីស្ថាន៖ សេចក្តីថ្លែងការណ៍របស់ក្រសួងការបរទេសអាហ្វហ្គានីស្ថានបាននិយាយថា ប្រធានជំនួយរបស់អង្គការសហប្រជាជាតិបានធ្វើទស្សនកិច្ចទៅកាន់ទីក្រុងកាប៊ុលកាលពីថ្ងៃចន្ទ ហើយបានលើកឡើងពីការព្រួយបារម្ភអំពីការអប់រំ និងការងាររបស់ស្ត្រី ជាមួយរដ្ឋមន្ត្រីស្តីទីនៃរដ្ឋបាលក្រុមតាលីបង់។
រដ្ឋបាលដែលគ្រប់គ្រងដោយក្រុមតាលីបង់កាលពីខែមុន បានបញ្ជាឱ្យអង្គការក្រៅរដ្ឋាភិបាលមិនអនុញ្ញាតឱ្យបុគ្គលិកជាស្ត្រីភាគច្រើនធ្វើការ ដែលបណ្តាលឱ្យទីភ្នាក់ងារផ្តល់ជំនួយជាច្រើនផ្អាកប្រតិបត្តិការមួយផ្នែក នៅក្នុងពេលវិបត្តិមនុស្សធម៌កំពុងកើតឡើងក្នុងរដូវរងាត្រជាក់ខ្លាំង។ អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌លោក Martin Griffiths បានលើកឡើងពីបញ្ហានៃការអប់រំ និងការងាររបស់ស្ត្រី និងរបៀបដែលបញ្ហានេះប៉ះពាល់ដល់ប្រតិបត្តិការរបស់អង្គការសហប្រជាជាតិ។ ថ្លែងជាទូទៅអំពីដំណើរទស្សនកិច្ចរបស់លោក Griffiths ទៅកាន់ប្រទេសអាហ្វហ្គានីស្ថាន អ្នកនាំពាក្យអង្គការសហប្រជាជាតិលោក Stephane Dujarric បាននិយាយថា លោក Griffiths នឹងជួបជាមួយរដ្ឋបាលក្រុមតាលីបង់ ដោយមានសារដូចគ្នាដែលយើងបាននឹងកំពុងថ្លែងចាប់តាំងពីដើមដំបូង អំពីតម្រូវការក្នុងការបង្វែរគោលនយោបាយដែលត្រូវបានដាក់លើស្ត្រី។
លោកនិយាយថា លោក Griffiths នឹងបញ្ជាក់ក្នុងសារថា ការផ្តល់ជំនួយមនុស្សធម៌មិនធ្វើទៅបានដោយគ្មានស្ត្រីនោះទេ។ គ្មានរដ្ឋាភិបាលបរទេសណាមួយទទួលស្គាល់ជាផ្លូវការ នូវរដ្ឋបាលរបស់ក្រុមតាលីបង់នោះទេចាប់តាំងពីក្រុមនេះបានដណ្តើមអំណាច។ ប្រទេសជាច្រើនបានសម្តែងការព្រួយបារម្ភយ៉ាងខ្លាំងចំពោះក្មេងស្រី និងស្ត្រីភាគច្រើនដែលមានអាយុលើសពី ១២ឆ្នាំត្រូវបានបញ្ឈប់ពីមិនឲ្យចូលរៀននៅសាលា ឬសាកលវិទ្យាល័យ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
