ភ្នំពេញ៖ ក្រសួងអប់រំ យុវជន និងកីឡា បានដាក់ចេញនូវចំណុចអាទិភាពចំនួន ៨ ក្នុងយុទ្ធសាស្រ្ត​កំណែទម្រង់វិស័យអប់រំឆ្នាំ២០១៨-២០២៣។ ចំណុចអាទិភាពមួយ គឺជាកំណែទម្រង់សាលារៀន ដោយផ្លាស់ពីសាលារៀនធម្មតា ទៅជាសាលារៀនជំនាន់ថ្មី ដែលផ្តោតសំខាន់លើការបង្រៀនផ្នែក STEM។

សាលារៀនជំនាន់ថ្មី ជាជោគជ័យសំខាន់មួយនៃកំណែទម្រង់សាលារៀនរបស់ក្រសួងអប់រំ យុវជន និងកីឡា។ សាលារៀនជំនាន់ថ្មី ផ្តោតលើការផ្ដល់ស្វ័យភាព ក្នុងការអនុវត្តកម្មវិធីសិក្សា បណ្ដុះ​ធនធានមនុស្សឱ្យមានបំណិនសតវត្សរ៍ទី ២១។ គិតត្រឹមឆ្នាំ ២០២២កន្លងទៅនេះ កម្ពុជា​គឺ​មានសាលារៀនជំនាន់ថ្មី ចំនួន ១០ ​ដែលបាននឹងកំពុងបណ្ដុះបណ្ដាល​ធនធាន​មនុស្សជាច្រើន។

ជាក់ស្ដែងសម្រាប់វិទ្យាល័យព្រះ​ស៊ីសុវត្ថិ ​សាលារៀនជំនាន់ថ្មី ​ក្នុងឆ្នាំសិក្សាឆ្នាំទី ៨របស់ខ្លួន គឺ​បន្តយកចិត្តទឹកដាក់លើការបណ្ដុះមូលធនមនុស្សឱ្យកាន់តែខ្លាំងក្លា។

លោក សម្យ កំសាន្ត ជានាយករងគ្រប់គ្រងនៅសាលារៀនជំនាន់ថ្មី លើកឡើងថាសិស្សសិក្សា​នៅ​សាលារៀនជំនាន់ថ្មី គឺទាមទារការ​ប្ដេជ្ញា​ខ្ពស់ ​ក្នុងការសិក្សា។ លោកបន្តថា ការសិក្សានៅ វិទ្យាល័យ​ស៊ីសុវត្ថិជំនាន់ថ្មី ​គឺមានវិធីសាស្រ្តសិក្សាផ្សេងពីការសិក្សាទូទៅ។ការសិក្សាគឺផ្តោតលើការធ្វើគម្រោងភ្ជាប់​ជាមួយការអនុវត្តជាក់ស្ដែង និងជំរុញឱ្យសិស្សចូលរួម​ការ​ប្រកួតប្រជែងទាំងថ្នាក់ជាតិ-អន្តរជាតិ។​ កិច្ចប្រឹងប្រែងទាំងនេះ ក៏បានផ្ដល់មកវិញភាពជោគជ័យ​ជាច្រើន របស់សិស្សសិក្សានៅទីនេះ។

សម្រាប់សិស្សបាននឹងកំពុងសិក្សា នៅវិទ្យាល័យព្រះស៊ីសុវត្ថិជំនាន់ថ្មី គឺពួកគាត់មើលឃើញ​ពី​ភាពវិជ្ជមាននៃវិធីសាស្រ្តរៀន និងបង្រៀន។ ​ពួកគេពេញចិត្ត ​ព្រោះការសិក្សាប៉ុន្មានឆ្នាំមកនេះ បានផ្ដល់នូវ​សមិទ្ធផល​ជាច្រើនដល់ពួកគេ។វិស័យអប់រំ ជាវិស័យសំខាន់មួយដែលទទួលបានការយកចិត្តទុកជាខ្លាំងពីរាជរដ្ឋាភិបាលកម្ពុជា។ ជាក់ស្ដែងសេចក្ដីព្រាងច្បាប់ស្ដីពី ហិរញ្ញវត្ថុសម្រាប់ការគ្រប់គ្រងឆ្នាំ ២០២៣ បានបង្ហាញថា​ក្រសួងអប់រំ យុវជន និងកីឡា ទទួលបានថវិកាច្រើនជាងគេបង្អស់ ដោយអាចទទួល​បានរហូត​ដល់ជាង៩០០លានដុល្លារ។

ពាក់ព័ន្ធនឹងរឿងអប់រំនេះ ​សម្ដេចតេជោ ហ៊ុន សែន កាលពីម្សិលមិញ ក៏បានបញ្ជាក់ដែរថា គិតចាប់​ពីចុងឆ្នាំ២០២៣នេះទៅ គឺនឹងផ្ដល់ការបណ្ដុះបណ្ដាលវិជ្ជាជីវៈដោយ​ឥតគិតថ្លៃជូនសិស្ស​ក្រីក្រប្រមាណ ១លាន ៥សែននាក់ និងផ្ដល់ប្រាក់ឧបត្ថម្ភប្រចាំខែមួយចំនួនដល់​ពួកគេ​ថែមទៀតផង៕អត្ថបទ៖ គឹមហុក