ភ្នំពេញ៖ ក្រសួងធម្មការ និងសាសនា បានចេញសេចក្ដីណែនាំអំពីការរៀបចំពិធីបុណ្យមាឃបូជា នានាថ្ងៃទី៥-៦ ខែកុម្ភៈខាងមុខនេះ ​ដល់មន្ទីរធម្មការ ​និងសាសនា ​រាជធានី-ខេត្ត និងគ្រប់វត្តឱ្យ​រៀបចំ​ពិធីបុណ្យមាឃបូជា​ឱ្យស្របតាមទំនៀមទម្លាប់ប្រពៃណីជាតិ និងជ្រើសតាំងវត្តណា​មួយ​ក្នុងរាជធានី-ខេត្ត ប្រារព្ធ​ពិធីនេះ ​ជាផ្លូវការ ​ដោយត្រូវអនុវត្តតាមវិធានការសុខាភិបាល និង​វិធានការដ្ឋបាលរបស់អាជ្ញាធរដែនដី។

យោងតាមសេចក្ដីណែនាំស្តីពីការរៀបចំពិធីបុណ្យមាឃបូជារបស់ក្រសួងធម្មការ ឆ្នាំនេះពិធីបុណ្យ​ត្រូវប្រព្រឹត្តទៅរយៈពេល២ថ្ងៃ គឺថ្ងៃទី៥ ទី៦ ខែកុម្ភៈ ឆ្នាំ ២០២៣នេះ។

ក្រសួងបានទូលថ្វាយ-ប្រគេន ព្រះថេរានុត្ថេរៈគ្រប់ព្រះអង្គ ​និងណែនាំទៅគ្រប់ប្រធានមន្ទីរធម្មការ និង​សាសនារាជធានី-ខេត្ត ត្រូវណែនាំគ្រប់វត្ត ​ឱ្យរៀបចំពិធីបុណ្យមាឃបូជា ឱ្យស្របតាម​ទំនៀម​ទម្លាប់​ប្រពៃណីជាតិ ​និងជ្រើសតាំងវត្តណា​មួយក្នុងរាជធានី-ខេត្តប្រារព្ធពិធីបុណ្យ​មាឃបូជាជាផ្លូវការ។

ក្រសួងណែនាំដល់គ្រប់វត្តឱ្យសម្អាតទីធ្លាក្នុងវត្តទាំងមូល​ និងជាពិសេសកន្លែងសក្ការបូជា​របស់​ពុទ្ធបរិស័ទ​ព្រមទាំងតុបតែងលម្អដោយទង់ជាតិ ​ទង់ព្រះពុទ្ធសាសនា​ ទង់​ព្រះមហាក្សត្រ បដាពាក្យស្លោក ​ដើម្បីអបអរសាទរក្នុងពិធីបុណ្យនេះ។ត្រូវសហការជាមួយអាជ្ញាធរ​ដែនដី​គ្រប់​លំដាប់ថ្នាក់ ​ដើម្បី​ការពារសុវត្ថិភាពនៅក្នុងពិធីបុណ្យ ​និង​អំពាវនាវ សប្បុរសជន ពុទ្ធបរិស័ទ ប្រជាពលរដ្ឋ​ ចូលរួមបំពេញកុសលតាមសទ្ធាជ្រះថ្លាដើម្បីជា​គុណ​ប្រយោជន៍ដល់ ការថែរក្សា​នូវ​អត្តសញ្ញាណជាតិ​ ប្រពៃណីព្រះពុទ្ធសាសនា ​និងអនុមោទនាយកផល្លានិសង្សរៀងៗខ្លួន។

គួររម្លឹកថា បុណ្យមាឃបូជា គឺជាបុណ្យមួយក្នុងបណ្តាបុណ្យធំៗទាំងឡាយក្នុងព្រះពុទ្ធសាសនា ហើយប្រទេស​ដែលកាន់ព្រះពុទ្ធសាសនាលើសកលលោកតែងតែប្រារព្ធធ្វើជារៀងរាល់​ឆ្នាំ​ពុំដែលខកខាន។

ពិធីនេះប្រារព្ធធ្វើឡើងដើម្បីរម្លឹកដល់ថ្ងៃពេញបូណ៌មីខែមាឃ​ ជាថ្ងៃប្រជុំចតុរង្គសន្និបាតសម្តែង​ឱវាទប្បាតិមោក្ខនិងថ្ងៃដែលព្រះពុទ្ធអង្គប្រជុំប្រកាសដាក់កំណត់ព្រះជន្មាយុសង្ខារ។

ជារៀងរាល់ឆ្នាំពុទ្ធសាសនិកជនខ្មែរតែងតែ​ប្រារព្ធធ្វើបុណ្យមាឃបូជានៅថ្នាក់ជាតិ ​និង​គ្រប់វត្តទូទាំង​ប្រទេស​ដោយចាត់ទុកថា​ជាការបំពេញកុសលដ៏ថ្លៃថ្លាបំផុត ​និងធ្វើនូវកតញ្ញូកតវេទីដល់​ព្រះសាស្តាបរមគ្រូ។ ​ចំណែករាជរដ្ឋាភិបាលក៏បានអនុញ្ញាតឱ្យរៀបចំកម្មវិធីបុណ្យនេះ នៅ​បរិវេណព្រះមហាសក្យមុនីចេតិយភ្នំព្រះរាជទ្រព្យ ​(ឧត្ដុង្គ) ស្ថិតនៅស្រុកពញាឮ ​ខេត្តកណ្តាល ដោយមានថ្នាក់ដឹកនាំជាន់ខ្ពស់រាជរដ្ឋាភិបាល មន្ត្រីរាជការ និងពុទ្ធបរិស័ទចូលរួមបំពេញ​កុសល​តាម​ប្រពៃណីព្រះពុទ្ធសាសនាខ្មែរស្របតាមរដ្ឋធម្មនុញ្ញ ​នៃព្រះរាជាណាចក្រកម្ពុជា ដែលចែង​ថាព្រះពុទ្ធសាសនាជាសាសនារបស់រដ្ឋផងដែរ៕អត្ថបទ៖ វ៉ន ដារ៉ា