ភ្នំពេញ: ចំការកៅស៊ូជប់ ស្ថិតក្នុងខេត្តត្បូងឃ្មុំ ដែលនៅសល់ដើមកៅស៊ូអាយុកាល ៩៩ឆ្នាំ ប្រមាណ ៤៧៧ដើម។

នៅពេលអនាគតខាងមុខនេះ ក្រសួងកសិកម្ម រុក្ខាប្រមាញ់ និងនេសាទ គ្រោងនឹងរៀបចំជាសារៈមន្ទីរកៅស៊ូ ដើម្បីទុកជាទ្រព្យសម្បត្តិរបស់ជាតិដ៏មានតម្លៃបំផុត ព្រោះគ្មាននៅកន្លែងណាផ្សេងទៀតទេ ដែលនៅសល់ដើមកៅស៊ូចាស់បែបនេះ។

ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ក្នុងដំណើរទស្សនកិច្ចនៅវិទ្យាស្ថានស្រាវជ្រាវកៅស៊ូកម្ពុជា ស្ថិតនៅក្នុងឃុំជីរោរិ៍ទី២ ស្រុក/ខេត្តត្បូងឃ្មុំ ដើម្បីឈ្វេងយល់ពីស្ថានភាពមូលដ្ឋាន និងការកាត់បន្ថយថ្លៃដើម តាមរយៈការបង្កើតពូជថ្មីមានទិន្នផលខ្ពស់ ធន់នឹងជំងឺ ការរក្សានូវគុណភាពដី និងកាត់បន្ថយនូវការចំណាយផ្សេងៗក្នុងផលិតកម្ម កាលពីរសៀលថ្ងៃទី២៤ ខែមករា ឆ្នាំ២០២៣កន្លងទៅនេះ បានមានប្រសាសន៍ឲ្យដឹងថា “ចំការកៅស៊ូជប់ មានកៅស៊ូដែលនៅសល់តាំងពីជំនាន់មុនមក យោងតាមឯកសារគឺឆ្នាំ១៩២៤ និងគិតមកដល់ពេលនេះមានអាយុកាល ៩៩ឆ្នាំ។” ឯកឧត្តម បានបន្តថា បន្ទាប់ពីបានស្តាប់នូវការបង្ហាញអំពីការបង្កាត់ពូជកៅស៊ូ ការជ្រើសរើសក្លូន (Clone) និងផលិតកម្មដំណាំកៅស៊ូ ដែលមានលក្ខណៈខុសៗគ្នា ថែមទាំងបានធ្វើការសាកល្បងចៀរជ័រកៅស៊ូដោយផ្ទាល់ ដើម្បីមើលលំហូរជ័រ និងបានណែនាំឱ្យធ្វើការសិក្សាពីផលិតកម្ម និងដំណើរការដាំដុះកៅស៊ូ ការរំញោចនៃប្រភេទពូជនីមួយៗ ឯកឧត្តមយល់ឃើញថា យើងត្រូវតែធ្វើការអភិរក្សចំការកៅស៊ូជប់នេះ ដើម្បីឱ្យជំនាញធ្វើការរៀបចំ ថែរក្សាទុក និងដាក់ស្លាកលេខសម្គាល់ដើមនិមួយៗ ទុកជាពូជថ្មីសម្រាប់កសិករដាំដុះ ព្រោះថា វាមានសារៈសំខាន់ណាស់ សម្រាប់ម្ចាស់ចំការកៅស៊ូមួយចំនួន ទាំងឯកជនលក្ខណៈគ្រួសារ និងឯកជនលក្ខណៈវិនិយោគធំៗ អាចទៅប្រើប្រាស់សេវារបស់មន្ទីរពិសោធន៍របស់រដ្ឋបាន។

ឯកឧត្តម ឌិត ទីណា សង្ឃឹមថា ក្រោយពីសិក្សានេះទៅយើងនឹងបានពូជថ្មីសម្រាប់កសិករ ដែលជាពូជដើម និងធ្លាប់នៅស្រុកខ្មែរយូរណាស់ហើយ និងមានភាពធន់នឹងអាកាសធាតុក្នុងស្រុកបានល្អ។

ឯកឧត្តម បានបន្ថែមទៀតថា នៅត្រង់កន្លែងនេះ ថ្ងៃក្រោយទៅ គឺថារាប់ជាសារៈមន្ទីរហើយ ក្នុងផ្ទៃជាង ១៤ហិចតា របស់ចំការកៅស៊ូជប់ ដោយយើងនឹងរៀបចំការពារឲ្យបានល្អ ហើយទុកសម្រាប់សិក្សាស្រាវជ្រាវសម្រាប់ពូជរបស់ជាតិផងដែរ។

យោងតាមផែនការយុទ្ធសាស្រ្តស្រាវជ្រាវ និងអភិវឌ្ឍន៍បច្ចេកវិទ្យាកៅស៊ូ នៃវិទ្យាស្ថានស្រាវជ្រាវកៅស៊ូកម្ពុជាឆ្នាំ២០២០-២០៣០ បានបញ្ជាក់ថា នៅក្នុងវិស័យកសិកម្ម ដំណាំកៅស៊ូជាដំនាំយុទ្ធសាស្រ្តមួយយ៉ាងសំខាន់ដែលផ្តល់ការងារ និងប្រាក់ចំណូលដល់ប្រជាពលរដ្ឋនៅជនបទ។ លើសពីនេះទៅទៀត កៅស៊ូធម្មជាតិក៏បានចូលរួមចំណែកយ៉ាងសកម្មនៅក្នុការការពារបរិស្ថានប្រកបដោយចីរភាព បង្កើតជាគម្របបៃតង រក្សាលំនឹងធម្មជាតិ និងការពារការហូរច្រោះដី។

បើតាមគោលដៅរយៈពេលវែងឆ្ពោះទៅឆ្នាំ២០៣០ នៃការអភិវឌ្ឍវិស័យកសិកម្ម គឺផ្តោតលើការលើកកម្ពស់ការធ្វើទំនើបកម្មកសិកម្ម មានលក្ខណៈបរិយាប័ន្ន ប្រកួតប្រជែងធន់នឹងការប្រែប្រួលអាកាសធាតុ និងនិរន្តរភាព៕